15976 BM WEB BANNER 01
Nov 29, 2017

බයිපාස් සැත්කමේ අඳුරු හෙළිදරව්ව

හෘද කිරීටක ධමනි බද්ධ කිරීම හෙවත් බයිපාස් සැත්කම අපේකෂාවෙන් පොරොත්තු ලේඛනවල සිටින රෝගීන් දහස් ගණනකගේ ජීවිත දැඩි අවදානම් තත්ත්වයකට පත්ව ඇති බව සමස්ත ලංකා වෛද්‍ය නිලධාරීන්ගේ සංගමය මාධ්‍ය නිවේදනයක් නිකුත් කරමින් කියා සිටී.

අද වන විට ශ‍්‍රී ලංකාවේ සෞඛ්‍ය සේවාව බරපතල අර්බුදකාරී තත්ත්වයකට පත්ව ඇති බවත් ඒ නිසා ජනතාවගේ සෞඛ්‍ය ගැටලු දිනෙන් දින උග‍්‍ර වෙමින් පවතින බවත් පවසන එම සංගමය , පාලකයන් හා විවිධ මතධාරීන් ශ‍්‍රී ලංකාවේ සෞඛ්‍ය සේවාව ලෝකයේ ඉහල මට්ටමක ඇති බවත් ශ‍්‍රී ලංකාවේ නිදහස් සෞඛ්‍ය සේවාවක් ඇති බවටත් ව්‍යාජ මතයක් පතුරවමින් සිටින බවද කියා සිටී.

ඔවුන් එම මාධ්‍ය නිවේදනයේ මෙසේද සඳහන් කර ඇත.

මේ වන විට අප රටේ හෘද කිරීටක ධමනි අවහිරවීම (coronary artery occlusion) නිසා කිරීටක ධමනි බද්ධ කිරීමේ සැත්කම හෙවත් බයිපාස් සැත්කම (CABG-coronary artery bypass graft) සඳහා යොමු වී පොරොත්තු ලේඛනවල දිගු කාලයක් රැදී සිටීමට සිදු වු රෝගීන් ගණන හය හත් දහස ඉක්මවයි.

එම රෝගීන් දැඩි ජීවිත අවදානම් තත්ත්වයක පසුවන අතර විශාල පිරිසක් පොරොත්තු ලේඛනවල සිටියදීම මිය යයි. තවද එම රෝගීන් එම පොරොත්තු ලේඛනවලට එක්වීමට පෙරද රෝග විනිශ්චය සඳහා එක්සසයිස් ඊසීජී හා ඇන්ජියෝග‍්‍රෑම් පරීක්ෂණ කර ගැනීමටද කාලයක් ගතකරයි. එම පරීක්ෂණ සදහාද වසරක් පමණ පොරොත්තු කාලයක් ඇත. ඒ අනුව සියලු පරීක්ෂණ කර ශල්‍යකර්ම සදහා යොමුවීමට ගතවන කාලය සාමාන්‍යයෙන් වසර දෙකක් තුනක් පමණ වේ.

මරණ මංචකයේ සිටින්නවුන්ගෙනුත් බදු ගැනීම

පුද්ගලික අංශයෙන් මෙම ශල්‍යකර්මය කරගැනීම සඳහා රුපියල් ලක්ෂ 8 ත් 9 ත් අතර මුදලක් වැය වේ. එයින් වැට් බද්ධ ලෙස රුපියල් 120000 - 135000 ආණ්ඩුවට ගෙවීමට සිදු වී ඇත. ජනාධිපති අරමුදලින් රුපියල් ලක්ෂ එකහමාරක් පමණ ලැබුණද එය අනෙක් අතින් වැට් බදු ලෙස ගෙවූ විට ඉතිරි වන්නේ සොච්චමකි. මේ ආකාරයෙන් ජීවිතයත් මරණයත් අතර ගත කරන රෝගීන්ගෙන් මේ සා විශාල බදු මුදලක් අය කර ගැනීම බරපතල ඛේදවාචකයකි. මුදල් නොමැතිකම නිසා ජීවිතය අත්හැරීමට දුප්පතුන්ට සිදු වී ඇති රටක ප‍්‍රභූ දේශපාලකයන් මහජන මුදලින් ප‍්‍රතිකාර සදහා විදෙස් ගතවීම පිළිකුල් සහගතය.

ශල්‍යාගාර වසා දැමීම

මේ වන විට ජාතික රෝහලේ හෘද රෝග අංශයේ ශල්‍යකර්ම සිදුකෙරෙමින් තිබූ ශල්‍යගාර දෙකක් හා දැඩිසත්කාර ඒකකය වසා දමා අවුරුද්දකුත් මාස 08ක් ගත වී ඇත. අලුත්වැඩියා කටයුත්තක් සඳහා මාස තුනක කාලයකට වසා දැමූ එම ඒකකය විවෘත කිරීමට තවමත් නොහැකි වී තිබේ. පස්වතාවක් කොන්ත‍්‍රාත්තුව සඳහා අවසන් නිවේදන ලබාදී තිබුණද මේ දක්වාම අළුත්වැඩියාව අවසන් කර නොමැත. මේ නිසා සතියේ දිනවල දිනකට සිදුකළ හැකිව තිබූ ශල්‍යකර්ම දෙක බැගින් පළමු මාස තුන අත්හල විට දළ වශයෙන් ශල්‍යකර්ම 700ක් සිදුකිරීමට නොහැකි වී ඇත. ඒ වෙනුවට ස්නායු ශල්‍ය ඒකකයෙන් ශල්‍යගාරයක් ලබා දී තිබුණද එය හෘද ශල්‍යකර්ම සිදුකිරීමට සුදුසු ස්ථානයක් නොවේ. කරාපිටිය රෝහලේ 2015 හා 2016 වර්ෂවල ශල්‍යගාරයේ අලුත්වැඩියාවන් හා කාර්යමණ්ඩල අතර පැවැති ගැටුම් හේතුවෙන් වරින් වර වසා දැමීමට සිදුවිය.

අනුරධපුර, යාපනය, කුරුණෑගල යන ශීක්ෂණ රෝහල්වලට හෘද ශල්‍ය වෛද්‍යවරු තිදෙනකු පත්කර ඇතත් අනෙකුත් පහසුකම් ලබා දී නොමැති නිසා මේ දක්වාම ශල්‍යකර්ම ආරම්භ කිරීමට නොහැකි වී ඇත. දැනට ශ‍්‍රී ලංකාවේ නොමිලේ හෘද ශල්‍ය කර්ම සිදු කරන රෝහල් වන්නේ කොළඹ ජාතික රෝහල, රිජ්වේ ආර්යා ළමා රෝහල, මහනුවර මහ රෝහල ,කරාපිටිය ශීක්ෂණ රෝහල යන ඒවා වේ. ජයවර්ධනපුර රෝහලේ සැත්කම් සිදුකිරීමට සාමාන්‍ය රෝගීන්ට රුපියල් ලක්ෂ හතර හමාරක්ද පෞද්ගලික රෝගීන්ට ලක්ෂ හය හමාරක්ද ගෙවීමට සිදුවේ. වෙනත් රජයේ රෝහලක හෘද ශල්‍ය අංශයකින් යොමු කළ විට නොමිලේ සිදු කරන අවස්ථාද තිබේ. මීට අමතරව පුද්ගලික රෝහල් 07ක සැත්කම් සිදුකරනු ලබයි.

විශේෂඥ ශල්‍ය වෛද්‍යවරුන් ලක්ෂ 10කට එකයි

විශේෂඥ හෘද ශල්‍ය වෛද්‍යවරුන් 22ක් රට තුළ සේවය කරන අතර එයින් 06 දෙනෙක් පුද්ගලික අංශයේ පමණක් සේවය කරයි අනෙකුත් වෛද්‍යවරුන්ගෙන් කිහිපදෙනෙකු පුද්ගලික අංශයේද සේවය කරයි. පුද්ගලික අංශයේ පමණක් සේවය කරන 06 දෙනාගෙන් තිදෙනෙක් ශ‍්‍රී ලාංකික වෛද්‍යවරුන් වන අතර ඉතිරි තිදෙනා ඉන්දියානු ජාතික වෛද්‍යවරුන්ය. රාජ්‍ය අංශයේ වෛද්‍යවරුන්ගෙන් බොහෝ දෙනෙකුට අවශ්‍ය යටිතල පහසුකම් නොමැතිවීම නිසා උපරිම ධාරිතාවයකින් ශල්‍යකර්ම කිරීමට නොහැකි වී ඇත.

අපේ රටේ ජන ගහණය මිලියන 21 ක් පමණ වේ. ඒ අනුව ආසන්න වශයෙන් ජනගහණයෙන් ලක්ෂ 10කට එක් විශේෂඥ ශල්‍ය වෛදවරයකු බැගින් සිටී. එය ලෝකයේ අනෙකුත් රටවල් සමග සලකා බැලීමේ දී ඉතාම අඩු ප‍්‍රමාණයකි. ඇමරිකා එක්සත් ජනපදයේ ලක්ෂයකට 1 බැගින් ද එංගලන්තයේ එක්ලක්ෂ පනස් දහසකට 1 බැගින් ද ඕස්ට්‍රේලියාවේ එක්ලක්ෂ අසූ දහසට 1 බැගින් ද මැලේසියාවේ ලක්ෂ පහකට 1 අයකු බැගින් ද සිටී. මැලේසියාව ඔවුන්ගේ රටේ හිඟයක් ඇති බව පිළිගනිමින් එය අඩු කර ගැනීමට කටයුතු කරමින් සිටී.

මීට අමතරව හෘද පෙනහළු නිවේෂකයින්, හෙද හෙදියන්, භෞත චිකිත්සකයින් හා තාක්ෂණවේදීන්ගේ ද විශාල හිඟයක් පවතී. නිසි ප‍්‍රතිකාර සඳහා යොමු නොවීම නිසා දෛනිකව හෘදයාබාද හේතුවෙන් මිය යන රෝගීන් සංඛ්‍යාව සිය ගණනකි.

ලොක්කො ලෙඩ වුණාම කෙළින්ම පිටරට

මෙම තත්ත්වය වෙනස් කිරීම සඳහා වගකීම ඇත්තේ ආණ්ඩුවටය. නමුත් ආණ්ඩුවේ දේශපාලකයන් හා ප‍්‍රභූවරුන් බොහෝ පිරිසක් තමන්ට හෘදයාබාද වැළඳුණු විට විදෙස්ගත වී ප‍්‍රතිකාරගත් බව නොරහසකි. කථානායකවරයා, අගමැතිවරයා සහ '' සෞඛ්‍ය ඇමතිවරයා '' ඉන් කිහිපදෙනෙකි.

ඔවුන් ඒ සදහා වියදම් කර ඇත්තේ මහජන මුදල්ය. නමුත් ඉන්දියාවේ හිටපු අගමැති වූ මංමෝහන් සිං මහතා අගමැතිවරයා වශයෙන් සිටියදී තම බයි පාස් සැත්කම කරගෙන ඇත්තේ ඉන්දියානු රජයේ රෝහලකිනි (all india institute of health sciences). මැලේසියාවේ මහතීර් මොහොමඩ් මහතා අගමැතිවරයා වශයෙන් සිටියදී තම බයිපාස් සැත්කම සිදුකර ඇත්තේ ද තම රටේ රජයේ රෝහලකිනි. තායිලන්තයේ උප ජනාධිපතිවරයාද එසේමය. පාකිස්ථානයේ නවාස් ෂරීප් මහතා තම බයිපාස් සැත්කම පුද්ගලික වියදමින් එංගලන්තයේදී සිදුකරගෙන ඇත.

ගතයුතු පියවර

හෘද රෝග වැලදී ජීවිතයත් මරණයත් අතර ගත කරන අපේම රෝගීන් දහස් ගණනකගේ ශෝචනීය ඉරණම වෙනස් කිරීමට නම් කඩිනමින් ගත යුතු ක‍්‍රියාමාර්ග ගණනාවක් ඇත. පළමුවෙන්ම ජාතික රෝහලේ දැනට අවුරුද්දකුත් මාස 08ක තිස්සේ වසා දමා ඇති ශල්‍යාගාර සංකීර්ණය කඩිනමින් අළුත්වැඩියාවන් අවසන් කර විවෘත කළ යුතුය. දැනට යටිතල පහසුකම් සපයා නැති යාපනය, අනුරධපුර, කුරුණෑගල ශීක්ෂණ රෝහල්වල ඇති මධ්‍යස්ථානවලට අවශ්‍ය සම්පත් සපයා දී ඉතා ඉක්මණින් ශල්‍යකර්ම ආරම්භ කළ යුතුය.

සෞඛ්‍ය අමාත්‍යාංශයේ 2020 වැඩපිළිවෙල යටතේ ක‍්‍රියාත්මක කිරීමට නියමිතව ඇති සෑම පළාතක් සඳහාම එක් ශල්‍යකර්ම මධ්‍යස්ථානයක් පිහිටුවීමත් ඒ යටතේ රත්නපුර, බදුල්ල, මඩකළපුව යන පළාත් මහ රෝහල්වල නව හෘද සැත්කම් මධ්‍යස්ථාන ඇති කිරීමට පියවර ගැනීමත් දැනට පවත්වාගෙන යනු ලබන ආයතනවල පහසුකම් සම්පූර්ණ කිරීමටත් කටයුතු කළ යුතුය.

දැනට ශල්‍යකර්ම සිදුකරන මධ්‍යස්ථානවලද විවිධ අඩුපාඩුකම් නිසා ශල්‍යකර්ම සිදු කිරීම නැවතීමට ඉඩ ඇති බව විශේෂඥ වෛද්‍යවරුන් විසින් සෞඛ්‍ය අමාත්‍යාංශයට දැනුම් දී ඇත. ඉහත යෝජනා ක‍්‍රියාත්මක කිරීමට සෞඛ්‍ය අමාත්‍යාංශය ඇතුළු ආණ්ඩුව ක‍්‍රියාත්මක නොවුණහොත් ශල්‍යකර්ම බලාපොරොත්තුවෙන් සිටින දහස් ගණනකගේ ජීවිත අහිමි වී යනු ඇත. මේ පිළිබදව සම්පූර්ණ වගකීම ඇත්තේ ආණ්ඩුවටය. ඒ අනුව ආණ්ඩුව කඩිනමින් ක‍්‍රියාත්මක විය යුතුව ඇත.

Leave a comment

Make sure you enter all the required information, indicated by an asterisk (*). HTML code is not allowed.

Top