Pasidol
Sathosa Ad Final Sinhala
15976 BM WEB BANNER 01
Dec 19, 2017

ඒ කූඩු නොවූ කුරුල්ලා කෝ?

නික්මීම කියන්නෙ මුණගැහීමත් එක්ක බැඳිල තියෙන අනිවාර්ය ඉරණමක් වුණත්, සමහර නික්මීම් ඇතුළෙ අපිට දැනෙන්නෙ වෙන් වීමකට වැඩිය සමීප වීමක්. අත් නොහැරෙන, සදාකාලික තැනකට බැඳීම් තල්ලු වීමක් විදියටයි ඒක තේරුම් ගන්න වෙන්නෙ. තවත් විදියකට කිව්වොත්, සමහර වෙන්වීම් අපේ ජීවිතවලට ඉතුරු කරන්නෙ මහා ආදරණීය රිදුමක්.

පහුගිය සතියෙත් ඒ වගේ ආදරණීයයෙක් හදිසියේම යන්න ගියා. ඉන්දික ගුණවර්ධන. කවියෙක්, පරිවර්තකයෙක් සහ ස්වතන්ත්‍ර නවකතාකරුවෙක් විදියට ඉතාම කෙටි කාලයක් ඇතුළත දැනෙන වැඩ කීපයක් කරපු ඉන්දික තමුන්ගෙ හතලිස් වෙනි උපන්දිනේට දවස් කිහිපයකට කළින් ගමන නතර කරනවා.

ඇත්තටම ඒක පුදුමාකාර ජීවන විලාසයක්. කවදාවත් ඉවර නොවෙන, අසීමිත ජීවිතයක් ඉන්දිකට තිබුණෙ. තමුන්ට ඕන විදියට හැම තත්පරයක්ම ජීවත්වීම කියන්නෙ මේ වගේ රටක් ඇතුළෙ ගන්න පුළුවන් දරුණුම අවදානමක් වුණත් එයා ඒ තීරණය ගන්නවා. නානාප්‍රකාර අවස්ථා, වරප්‍රසාද මැද වුණත් ඉන්දික තමුන් විශ්වාස කරන දේ වෙනුවෙන් පෙනී ඉන්නවා ගොඩාක් ශක්තිමත්ව. කොටින්ම කිව්වොත්, ඒ වගේ ජීවිත මෙහෙම රටවල්වලට ඔරොත්තු නොදෙන තරම් දැවැන්තයි, සංකීර්ණයි.

සයිබර් අවකාශය හරහා ඇවිත් ප්‍රධාන ධාරාවේ සාහිත්‍යය තුළ ස්ථානගත වුණු තරුණ කවීන් අතරෙ ප්‍රධානම තැනක් හිමිවෙන්නෙ ඉන්දිකට. තවත් නිශ්චිතව කිව්වොත්, ෆේස්බුක් වගේ සමාජ අවකාශයක සිංහල කවිය ස්ථානගත කරන්න පුරෝගාමී වුණු පුද්ගලයෙක් හැටියට ඉන්දිකව හැඳින්වීමේ වරදක් නැහැ. වැදගත්ම දේ තමයි ඒක සිද්ධවුණේ සිංහල යුනිකෝඩ් පවා හරියට නැති, අවුරුදු දහයකට එකොළහකට එහා දුෂ්කර සයිබර් අතීතයකදි.

Artz indika gunawardhane 2 ඉන්දිකගෙ කවිය අපේ රටේ ප්‍රධාන ධාරාවේ සාහිත්‍යයට දරුණු විදියට මගහැරුණා. ‘හිතේ කෙටූ ටැටූ’ වගේ පොතක් හරහා කවිය ඇතුළෙ සිද්ධවුණු බරපතල මැදිහත්වීම, හැරවුම ගොඩක් අයට ඒ මොහොතේ තේරුම් ගන්න පුළුවන් වුණේ නැහැ. මහා සම්ප්‍රදාය විදියට අපි කවිය ඇතුළෙ අඳුනගෙන තිබුණු දේවල් වෙනුවට ඉන්දික ටිකක් වෙනස් හැඩයක් තමුන්ගෙ පරම්පරාවෙ කවියට ගේනවා. ‘සයිබර් කවිය කියන එක වෙනම ශානරයක් විදියට වර්ධනය විය යුතුයි. ඒ වගේම මේ වෙනකොටත් ඒක එහෙම වෙමින් තියෙනවා…’ කියන කාරණය ඉන්දික නිතර නිතර කියපු සහ විශ්වාස කරපු දෙයක්.

ඉන්දිකගෙ කවිය පිරිල තිබුණෙ කොන්දේසි විරහිත ප්‍රේමයකින්. ඒ වගේම සියුම් දේශපාලන උපහාසයකින්. සාහිත්‍යය හරහා මහා දැවැන්ත දේවල් කරන්න යෝජනා කරනවා වෙනුවට එයා කළේ මිනිස්සුන්ගෙ හදවත් එක්ක සමීප ගනුදෙනුවකට යන එක.

දැවැන්ත පොත් ප්‍රමාණයක් පරිවර්තනය නොකළට අතගහපු කෘති කිහිපය ඉතාම සාර්ථකව ඉවර කරන්න ඉන්දිකට පුළුවන් වෙනවා. ඇත්තටම ඒ සමහර පරිවර්තන ඒ තරම් බය නැතුව කරන්න සුළුපටු ධෛර්යයක් තියෙන කෙනෙකුට නම් බැහැ. විශේෂයෙන්ම මාරියෝ වර්ගාස් ලෝසාගෙ ‘Who Killed Palomino Molero?’ (නිර්නාමික ඝාතකයා) වගේ පොතක්.

ස්වතන්ත්‍ර නවකතාකරුවෙක් විදියටත් ඉන්දික තමුන්ගෙ පළවෙනි නවකතාව ‘සුළි මැද පිපි තඹර’ට විෂය කරගන්නෙත් අටුවන් බැහැපු ලේඛකයෙක් හීනෙකින්වත් තමුන්ගෙ ලිවීම් ඇතුළට වැද්ද නොගන්න විදියේ තේමාවක්.

සාහිත්‍යය වගේම සිනමාව පැත්තෙන් ගත්තත් ඉන්දිකට ගොඩක් දේවල් සම්බන්ධයෙන් තිබුණෙ තමුන්ගෙම අදහසක්. ඒ හැම අදහසක් කෙළවරේම හෙළිදරව් වුණු ප්‍රධානම කාරණය තමයි, ඒ ඒ විෂයයන් සම්බන්ධයෙන් ඉන්දිකට තිබුණු දැනුම. ඒ දේවල් එකිනෙකා අතරෙ බෙදාගන්නත් එයාට තිබුණෙ ලොකු උනන්දුවක්. ඒ වගේම, කවදාවත් ඉටු කරගන්න බැරිවුණු ‘සිනමාකරුවෙක්’ වීමේ හීනයකුත් අන්තිම මොහොත දක්වාම ඉන්දික ළඟ හුස්ම ගනිමින් තිබුණා.

අන්තිමට ඉන්දිකත් යන්න ගියා. යන්න තරම් කාලයක් ඉන්නෙ නැතුවම. ජීවිතේ අසීරුම මොහොතක, දෛවය දරුණු වෙන්න පුළුවන් උපරිම සීමාවත් ඉක්මවලා දරුණු වෙද්දි වුණත් හිනාවක් එක්ක හැම දේම බේරගන්න ඉන්දිකට තිබුණෙ සුවිශේෂී හැකියාවක්.

Shawshank Redemption චිත්‍රපටයෙ එක තැනක දෙබසක් තියෙනවා;

‘සමහර කුරුල්ලො කූඩු කිරීම තේරුමක් නැති දෙයක්. උන්ගෙ අත්තටු හයියයි. උන් පැනල ගියාම අපට තේරෙනවා කූඩු කිරීම පාපයක් කියලා. ඒත් තවමත් අපි අතරෙ උන් නැති අඩුව දැනෙනවා…’

ඉන්දික කියන්නෙත් එහෙම නිදහසක් හොයපු, අත්විඳපු කෙනෙක්. ඇත්තම කාරණය තමයි, ඉන්දික වගේ මිනිස්සු මෙහෙම රටවල්වලට ඔරොත්තු නොදීම. එයාල මහාද්වීපවල ඉපදෙන්න ඕන අය මිසක් මේ වගේ දූපත්වල ඉපදෙන්න ඕන මිනිස්සු නෙමෙයි. සමහර මිනිස්සු ගැන මතක සටහන් තැන්පත් වෙන්නෙ හදවතේ ගැඹුරුම තැන්වල. එයාල අපිත් එක්ක හිටියත්, නොහිටියත් ඒ මතක සටහන් හැමදාම අපිත් එක්ක ඉන්නවා. ඉන්දිකත් ඒ වගේ මතකයක්. ඒ වගේම එයාගෙ මධුලෝලී ජීවන සෞන්දර්යයත් ඕනම මොහොතක ‘ඇත්ත ජීවිතයක්’ වෙනුවෙන් හොඳ උදාහරණයක්.

සෞම්‍ය සඳරුවන් ලියනගේ

 

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top