Dec 27, 2016

රවිරාජ් තීන්දුව : ජාත්‍යන්තර යුද අපරාධ පරීක්ෂණ යෝජනාවට ශක්තියක්' - මනෝ (වීඩියෝ) Featured

හිටපු මන්ත්‍රී නඩරාජා රවිරාජ් ඝාතනයට චෝදනා ලද නාවික හමුදා බුද්ධි අංශ නිලධාරීන් ඇතුළු සියලුදෙනා නොදොස් කොට නිදහස් කර යැවීම ශ්‍රී ලංකාවේ අධිකරණ පද්ධතිය පිලිබඳ විශ්වාසය බිඳ වැටීමටත්, යුද අපරාධ සම්බන්ධයෙන් ජාත්‍යන්තර විභාගයක් වෙනුවෙන් කෙරෙන ඉල්ලීම යුක්ති සහගත වීමටත් හේතු වනු ඇති බවට රජය තුලින්ම බිය පලවෙමින් පවතී.

ඉකුත් සතියේ දුන් නඩු තීන්දුවෙන් තමන් ඇතුළු රජයේ මැති ඇමැතිවරුන් කිහිප පලක්ම කලකිරීමට පත්ව සිටින බව ප්‍රකාශ කළ ජාතික සහජීවනය, සංවාද හා රාජ්‍ය භාෂා අමාත්‍යවරයා කියා සිටියේ, රටේ නීති පද්ධතිය පිළිබඳව විශ්වාසය තබන ලෙස අධිකරණ අමාත්‍යවරයා කොපමණ ඉල්ලා සිටියත්, තවදුරටත් එසේ කළ නොහැකි බවයි.

දස අවුරුද්දකට ඉහතදී දෙමළ ජාතික සන්ධාන මන්ත්‍රී නඩරාජා රවිරාජ් සහ ඔහුගේ ශරීරාරක්ෂක ලක්ෂ්මන් ලොකුවැල්ල මහමග මරා දැමීමේ අපරාධයට නඩු පැවරුනු ප්‍රදීප් චමින්ද හෙවත් වජිර, ප්‍රසාද් චන්දන කුමාර හෙවත් නේවි සම්පත්, ගාමිණි සෙනෙවිරත්න, පලන සාමි සුරේෂ්, චරන් හෙවත් සිවකාන්තන් විවේකානන්දන් සහ ෆේබියන් රොයිස්ටන් තුසෝන් සති අන්තයේදී සර්ව සිංහල ජූරි සභාවක් විසින් නිදොස් කොට නිදහස් කර යවන ලදී.

බලාපොරොත්තු කඩවීම :

රවිරාජ් ඝාතන නඩුවෙන් සාධාරණ තීන්දුවක් ලැබෙනු ඇතැයි විශ්වාස කළ දෙමළ ජනතාව ඇතුළු “යහපාලනයට අයිතිවාසිකම් කියන” ප්‍රගතිශීලී කොටස් අධිකරණය කෙරේ තැබූ බලාපොරොත්තු කඩවූ බව මනෝ ගනේෂන් අමාත්‍යවරයා ප්‍රකාශ කළේ දැඩි කම්පාවෙන් යුතුවය.

“ජාත්‍යන්තර විමර්ශනයක් අවශ්‍යයි කියන අයගේ අත ශක්තිමත් වීමයි මේකෙන් වෙලා තියෙන්නේ,” යි අමාත්‍යවරයා පැවසීය.

මීට අමතරව මාධ්‍යවේදී ප්‍රගීත් එක්නැලිගොඩ සහ ලසන්ත වික්‍රමතුංග ගේ ඝාතන වලට සැක කෙරෙන හමුදා නිලධාරීන්ද අදියරෙන් අදියර නිදහස් කර යැවීම ගැනත් මනෝ ගනේෂන් අමාත්‍යවරයා නොසතුට පල කළේය.

රවිරාජ් ඝාතන අවිය සැකකාර සිවකාන්තන් විවේකානන්දන් හට දීම සඳහා පිල්ලෙයාන් අතට ලබා දුන් බවට ජනමාධ්‍ය විසින් හෙළි කොට තිබූ ප්‍රගීත් එක්නැලිගොඩ පැහැරගෙන යාමට සම්බන්ධ බවට චෝදනා ලබන ලුතිනන් කර්නල් ශම්මි කුමාරරත්න ද ඇප පිට නිදහස් කරනු ලැබීමෙන් පසු දෙසැම්බර් 23 සිට යුද හමුදා බුද්ධි අංශයේ සේවයේ යොදවා තිබේ.

කිසිම බේදයකින් තොරව නීතිය සැමට සමාන විය යුතු බවට වන මූලධර්මය ශ්‍රී ලංකාව තුල රැකෙන්නේද යන ගැටලුව අද රට හමුවේ මතුවී ඇති බව මනෝ ගනේෂන් අමාත්‍යවරයා මෙහිදී පෙන්වා දෙයි.

මේ සමගින් සැබෑ ඝාතකයන් සොයා දඬුවම් කිරීමේ වගකීම තවත් කල් යන බව ප්‍රකාශ කළ මනෝ ගනේෂන් අමාත්‍යවරයා එවිට යුක්තිය ඉටුවීම ‘විහිළුවක්’ වී ඇතැයි පැවසීය.

රවිරාජ් ‘තමන්ම මරාගැනීම’

“එතුමාම එතුමාගේ ආරක්ෂක නිලධාරියාට වෙඩි තියලා එතුමාම එතුමාව මරාගත්තා කියලා විහිළුවක් වෙලා තියෙනවා,” යි ඔහු පැවසීය.

තීන්දුවට එරෙහිව අභියාචනයක් ගොනු කරන බව නඩුව වෙනුවෙන් පෙනී සිටි දෙමළ ජාතික සන්ධාන පාර්ලිමේන්තු මන්ත්‍රී නීතිඥ එම් ඒ සුමන්දිරන් මහතා විසින් ප්‍රකාශයට පත් කර තිබේ.

දේශපාලන වශයෙන් සංවේදී නඩු විභාගයකදී ත්‍රස්තවාදය වැළක්වීමේ පනත යටතේ අත් අඩංගුවට ගන්නා ලද සැකකරුවන් සම්බන්ධයෙන් තීන්දුවක් දීමට ජූරියක් පත් කරගැනීම නීතියට පටහැනි බව පෙන්වා දුන්නත්, අධිකරණය තම තර්කය ඉවත ලූ බව නඩරාජා රවිරාජ් පවුලේ සාමාජිකයන් වෙනුවෙන් පෙනීසිටි නීතිඥ සුමන්දිරන් මහතා පවසයි.

රාජ්‍ය රහස් ඔත්තු සේවාවද සිද්ධියට සම්බන්ධ බවට නීතිපති දෙපාර්තමේන්තුව විසින් කරුණු දක්වා ඇතැයි පෙන්වා දෙන ඔහු ඝාතනයට අණ දුන් අයද සොයා ගැනීමේ අවශ්‍යතාව ඇති බව අවධාරණය කරයි.

“යුද අපරාධ සම්බන්ධයෙන් පරීක්ෂණ පැවැත්වීම ජාත්‍යන්තර දායකත්වයෙන් සිදුවිය යුතු බව අප තදින් කියා සිටින්නේ ඒ නිසා,” යි දෙමළ ජාතික සන්ධාන මන්ත්‍රීවරයා ප්‍රකාශ කළේය.

එන වසරේ මාර්තු මාසයේ ජිනීවා නුවර මුළුදෙන ජගත් මානව හිමිකම් සමුළුවේදී ඒ සම්බන්ධ සාකච්ඡාව නැවත මතු වනු ඇති බවට මනෝ ගනේෂන් ඇමැතිවරයා අනතුරු අඟවා සිටී.

(radiogagana)

සබැඳි පුවත්

රවිරාජ් ඝාතන තීන්දුවට එරෙහිව අභියාචනයක්

රවිරාජ් ඝාතන නඩුවෙන් බුද්ධි අංශ නිලධාරීන් නිදහස්

Leave a comment

Make sure you enter all the required information, indicated by an asterisk (*). HTML code is not allowed.

Top