Dec 31, 2016

ලංකා බැංකුවේ සෙලාන් කොටස් අලෙවිය : අත යට ගනුදෙනුවක් ගැන විමර්ශනයක් Featured

ලංකා බැංකුවේ හිමිකාරීත්වය යටතේ පැවැති සෙලාන් බැංකුවේ කොටස් විකුණා දැමීමට අදාළ ගනුදෙනුව අවලංගු කිරීම සඳහා අග්‍රාමාත්‍යවරයා මැදිහත් වී ඇත්තේ කොටස් මිලියන 13ක් වූ එම ගනුදෙනුව තුළ ලංකා බැංකු ප්‍රධානියකු එක් කොටසකට රුපියල් 2.00 බැගින් අත යට ගනුදෙනුවක් සිදු කර ඇති බවට ලැබුණු පැමිණිල්ලකට අනුව බව ආණ්ඩුවේ ආරංචි මාර්ග සඳහන් කර සිටියි.

එසේම අදාළ අත යට ගනුදෙනුවට සම්බන්ධ පාර්ශ්ව නිශ්චිතව හඳුනා ගෙන රහස්‍ය වාර්තාවක් ලබා දෙන ලෙස අග්‍රාමාත්‍යවරයා දැනුම් දී ඇති බවත් මේ වන විට ඒ පිළිබඳ විමර්ශනයක් අරඹා ඇති බවත් එම ආරංචි මාර්ග වැඩිදුරටත් සඳහන් කර සිටියි.

මේ පිළිබඳ අප වෙත ලැබී ඇති තවත් විශ්වාසවන්ත තොරතුරකට අනුව මෙම ගනුදෙනුව වැළැක්වීම පිටුපස ආණ්ඩුවේ ප්‍රබල අමාත්‍යවරුන් දෙදෙනකු ද සිටින අතර අදාළ ගනුදෙනුව අත යට ගනුදෙනුවක් තුළ සිදු වූයේ එක් කොටසක් රුපියල් 110.00 බැගින් විකිණීමට අවස්ථාව තිබිය දී බව අමාත්‍ය දෙපළ අග්‍රාමාත්‍යවරයා හමුවේ කරුණු දක්වා ඇත.

මුළුමනින්ම නීත්‍යනුකුලයි :

කෙසේ වුවත් සිදු කළ ගනුදෙනුව පිළිබඳව ලංකා බැංකු ආරංචි මාර්ග සඳහන් කර සිටින්නේ එය මුළුමනින්ම නීත්‍යනුකුලව සිදු කරනු ලැබූවක් වන බවය.

2009 වසරේ කොටසක් රුපියල් 30.00 ලෙස මිලදීගත් සෙලාන් බැංකු කොටස් අදාළ ගනුදෙනුවේ දී රුපියල් 100.00 කට අලෙවි කළ බවත් ඒ හරහා ලංකා බැංකුවට 300%ක ලාභයක් අත්වූ බවත් ගනුදෙනුවේ නීත්‍යනුකූලභාවය පිළිබඳ කොටස් වෙළෙඳපොළ පවා තහවුරු කර ඇති බවත් එම ආරංචි මාර්ග පෙන්වා දෙයි.

මේ පිළිබඳ අප වෙත ලැබී ඇති වැඩිදුර තොරතුරුවලට අනුව ජපන් ජාතික කෝටිපති ව්‍යාපාරිකයා වන මොටොහිකෝ හොම්මා (Motohiko Homma) මෙම මිලදී ගැනීම සඳහා කැඳවාගෙන ආ ලාංකේය ව්‍යාපාරිකයා ප්‍රින්ස් ගුණසේකර වන අතර ඔහු එජාප පළාත් සභා මන්ත්‍රී නිරෝෂන් පාදුක්කගේ ද හිතවතෙකි.

JB Securities - Murtaza Jafferjee :

ව්‍යාපාරික ප්‍රින්ස් ගුණසේකර මහතා සිය ව්‍යාපාරික සහකරු වූ ජපන් ජාතික හොම්මා වෙනුවෙන් අදාළ ගනුදෙනුව සඳහා යොදාගෙන ඇති තැරැව්කාර සමාගම JB Securities වන අතර එහි කළමනාකර අධ්‍යක්ෂ වන්නේ Murtaza Jafferjee ය.

ඔහු CFA ආයතනයේ හිටපු සභාපතිවරයකු සහ නේෂන් ට්‍රස්ට් බැංකුවේ අධ්‍යක්ෂ මණ්ඩලය ද නියෝජනය කරයි.

එසේම ඔහු වත්මන් ආණ්ඩුවේ අමාත්‍යවරුන් කිහිප දෙනකුගේ ළඟම හිතවතෙක් සේම පසුගිය සමයේ මැතිවරණ ප්‍රචාරක කටයුතු වෙනුවෙන් එක්සත් ජාතික පක්ෂය වෙත මූල්‍යමය ආධාර කර ඇති බවත් වාර්තා වෙයි.

ප්‍රින්ස් ගුණසේකර සහ හොම්මා අදාළ ගනුදෙනුව සඳහා ඔහුව හමුවී ඇති අතර පසුව ලංකා බැංකුව සතු සෙලාන් කොටස් එක් කොටසක් රුපියල් 100.00 බැගින් විකිණීමට සූදානම් බව දැනුම් දී ඇත්තේ ද ඔහු විසින්ය.

එහි දී ඇති වූ එකඟතාව මත සිදු වීමට යන ගනුදෙනුව සම්බන්ධව රාජ්‍ය ව්‍යවසාය සංවර්ධන නියෝජ්‍ය අමාත්‍යවරයා වන එරාන් වික්‍රමරත්න මහතාගේ ප්‍රධානත්වයෙන් කොමිටියක් අනුමත කර ඇති බව ද දැනගන්නට ඇත.

මේ බව ලංකා බැංකු ආරංචි මාර්ග ද තහවුරු කරයි.

විධිමත් ක්‍රමවේදයක් :

කෙසේ වුවත් මෙම ගනුදෙනුව අත්හිටුවීමේ තීරණය දැනුම්දීමත් සමඟ කොළඹ කොටස් වෙළෙඳපොළ සීග්‍ර කඩා වැටීමක් පෙන්නුම් කළ අතර මූල්‍ය විශ්ලේෂකයන්ගේ අදහස වූයේ රාජ්‍ය අනුබද්ධ මූල්‍ය ආයතන ඇතුළත් ගනුදෙනුවලට අදාළ තීන්දු තීරණ ගැනීමේ දී මීට වඩා පරිස්සම් සහගතව කටයුතු කිරීම වැදගත් වන බවත්, නැතහොත් එය මෙරට ආයෝජනය කිරීමට ආයෝජකයන් අධෛර්යමත් කරවන පසුබිමක් නිර්මාණය කරනු ඇති බවත්ය.

කෙසේ වුවත් මේ වන විට ජනාධිපතිවරයා ද අදාළ ගනුදෙනුව පිළිබඳ අවධානය යොමු කර ඇති බව වාර්තා වන අතර එහි දී ජනාධිපතිවරයා වගකිවයුතු පාර්ශ්ව දැනුවත් කොට ඇත්තේ යළිත් රාජ්‍ය අනුබද්ධ මූල්‍ය සමාගම් මෙවැනි ගනුදෙනු වලට පිවිසීමේ දී වඩා විධිමත් ක්‍රමවේදයක් අනුගමනය කිරීමට කටයුතු කිරීම වැදගත් බවය.

(සංජය ලියනගේ)

Leave a comment

Make sure you enter all the required information, indicated by an asterisk (*). HTML code is not allowed.

Top