nsb

Jan 05, 2017

'යුද අපරාධ' විභාගයට විදෙස් විනිසුරන් නැහැ -රජය Featured

යුද අපරාධ චෝදනා ඇතුළු බරපතල මානව හිමිකම් උල්ලංඝන පරීක්ෂා කරන විනිසුරු මඬුල්ල සඳහා එක් විදේශීය විනිසුරුවකුවත් අසුන් නොගන්නා බව අමාත්‍ය රාජිත සේනාරත්න මහතා අවධාරණය කර සිටියි.

එක් එක් සංවිධානවලට හෝ ආයතන වලට ඕනෑම ආකාරයේ යෝජනාවක් කළ හැකි වුවද රජයේ ස්ථාවර ප්‍රතිපත්තිය වන්නේ මෙම අධිකරණ ක්‍රියාදාමය සඳහා විදේශ විනිසුරන් සම්බන්ධ කර නොගැනීම බව ඔහු කියා සිටියේය.

අදාළ අධිකරණ යාන්ත්‍රණයට එක් විදේශීය විනිසුරුවකු හෝ සම්බන්ධ විය යුතු බවට සංහිඳියාව උදෙසා වන ප්‍රවිචාරණ කාර්ය සාධක බලකාය කර ඇති නිර්දේශය පිලිබඳ ඊයේ (04) පැවති මාධ්‍ය හමුවකදී අදහස් දක්වමින් ඔහු මේ බව පැවසීය.

'බුද්ධිමතුන් නොවෙයි'
මෙවැනි කමිටු වාර්තා සැකසීම පිණිස රජය විශාල වියදමක් මෙන්ම කාලයක් වැය කරන නමුත් එම කමිටු මගින් කරන නිර්දේශ පිළිගැනීමට රජය කටයුතු නොකරන්නේ මන්දැයි ඇසූ විට අමාත්‍යවරයා පැවසුවේ කමිටුවකට පත්වූ පමණින් ඔවුන් 'බුද්ධිමතුන්' ලෙස පිළිගත නොහැකි බවය.

"එහෙම පත්කරයි කියල ඒ ගොල්ලෝ තාම එහෙම අමුතු විඥානයක් තියන, මහලොකු ශ්‍රේෂ්ඨ, ලෝකේ පහළවුණු මහ බුද්ධිමතුන් නෙවෙයිනෙ. ඔය අපේ කට්ටියනෙ පත්කරල තියෙන්නෙ" යනුවෙන් ඔහු වැඩිදුරටත් පැවසීය.

විදේශීය විනිසුරන් අවශ්‍ය බව පවසන්නේ රජය විසින් පත්කළ කමිටුවක් විසින් නොවේදැයි ඇසූවිට රාජිත සේනාරත්න අමාත්‍යවරයා කියාසිටියේ රජය පත්කළ කමිටුවකට වුවද ඕනෑම යෝජනාවක් කළ හැකි වන අතර ඒවා ක්‍රියාත්මක කිරීම පිළිබඳ රජයේ තීන්දුවලට යටත්ව කැබිනට් මණ්ඩලය තීරණයක් ගන්නා බවය.

'අනුමැතිය ලැබුණා'
ප්‍රවිචාරණ කාර්ය සාධක බලකාය විසින් කරනු ලැබ ඇති යෝජනා සලකා බැලීමට කටයුතු කරන බව පවසන අමාත්‍යවරයා රජයේ ස්ථාවරය වන දේශීය විනිසුරන් පමණක් යොදාගැනීම සඳහා එක්සත් ජාතීන්ගේ සංවිධානය පවා අනුමැතිය ලබා දී ඇති බව පැවසීය.

"මෙතෙන්ට ආපු අල් හුසේන් පිළිගත්තනෙ, ඒකට එකඟතාවය පළ කළානෙ" යනුවෙන් ඔහු වැඩිදුරටත් ප්‍රකාශ කළේය.

"රජයේ ස්ථාවරය, විදේශ නියෝජිතයො නැහැ. විදේශ නියෝජිතයො එන්න පුළුවන්, මේකට තාක්ෂණික දැනුම, නීතිමය උපදෙස් ලබාදෙන්නට ඇවිල්ල ඕනෑම උපදෙසක් ලබාදෙන්න පුළුවන්. විනිශ්චයකාරයෝ විදියට වාඩිවෙන්නෙ ලංකාවෙ කට්ටිය" යනුවෙන් අමාත්‍යවරයා දැඩි ලෙස පැවසීය.


'වින්දිතයන්ගේ විශ්වාසයක් නෑ'
අමාත්‍ය රාජිත සේනාරත්න කැබිනට් මාධ්‍ය හමුවේදී කළ ප්‍රකාශය පිළිබඳව ප්‍රතිචාරය පළකරමින් සංහිඳියාව උදෙසා වන ප්‍රවිචාරණ කාර්ය සාධක බලකායේ ලේකම් ආචාර්ය පාක්‍යසෝති සරවනමුත්තු මහතා පැවසුයේ, යුද අපරාධ චෝදනා ඇතුළු බරපතල මානව හිමිකම් උල්ලංඝන සම්බන්ධයෙන් දේශීය යාන්ත්‍රණයක් මගින් තමන්ට සාධාරණය ඉටු වනු ඇතැයි වින්දිතයන්ගේ කිසිදු විශ්වාසයක් නැති බවයි.

එබැවින් සිය නිර්දේශ ක්‍රියාවට නගන මෙන් ආණ්ඩුවට බලකිරීම සිවිල් සමාජයේ වගකීම බවත් ඔහු කියා සිටියේය.

විදේශීය විනිසුරන් අවශ්‍ය නැතැයි ආණ්ඩුව දරන මතයට මානව හිමිකම් පිළිබඳ එක්සත් ජාතීන්ගේ මහකොමසාරිස්වරයාද අනුමැතිය පළ කළ බවට අමාත්‍ය රාජිත සේනාරත්න මහතා කරන ප්‍රකාශයද ගැටළු සහගත බව ආචාර්ය සරවනමුත්තු මහතා පවසයි. 

(මූලාශ්‍රය - බීබීසී සංදේශය)


සබැඳි පුවත් 

'අධිකරණ යාන්ත්‍රණයට විදේශීය විනිසුරුවන් අවශ්‍යයි'

Leave a comment

Make sure you enter all the required information, indicated by an asterisk (*). HTML code is not allowed.

Top