Jan 08, 2017

'යුක්තිය ඉටු නොවන තාක් සංහිඳියාව ඇති නොවේ' - භාෂණ Featured

යුද්ධයෙන් අට වසරකට පසුත් තමන්ගේ ගේ දොර ඉඩකඩම්වලට ගොස් නිදහසේ ජීවත්විය නොහැකි, මළවුන් වෙනුවෙන් පොදු ස්මාරකයක් ඉදි කර ඔවුන් සිහි කරන්න බැරි, තමන්ගේ අතුරුදහන් වූ පවුලේ සාමාජිකයන්ගේ ඉරණම ගැන පිළිතුරක් සොයාගන්න බැරි, සිදුවුනු සාහසික අපරාධ ගැන අපක්‍ෂපාතී පරීක්‍ෂණයක් ලබාගන්න බැරි ජන කොට්ඨාශයකට ‘සතියක සහජීවන’ සැළැස්මක ඇති වැදගත්කම කුමක්ද යන්න පිටුවහලේ ජීවත් වන ජ්‍යෙෂ්ඨ මාධ්‍යවේදියෙක් යහපාලන රජයෙන් ප්‍රශ්න කර සිටී.

දෙමළ ජනයා මුහුණ දී සිටින්නේ සිංහල කෑම කන්න, සිංහල සිංදු අහන්න, සිංහල කවි කතා ඇසුරු කරන්න, රබන් ගහන්න, වෙසක් කූඩු අළවන්න නැතිකමින් හටගත්ත අර්බුදයකට නොව දේශපාලන බලයේ සමාන කොටස්කරුවන් වීමෙන් ඔවුන්ව වළක්වා වෙනස්කම් ආයතනගත කරපු දේශපාලන ගැටළුවකට බව 'ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ' (JDS) සංවිධානයේ රෝහිත භාෂණ අබේවර්ධන අවධාරණය කරයි.


නොවිසඳුණ දේශපාලන ගැටළුවක් :


“සහජීවනය කියන්නේ අවුරුදු පණිවුඩවල ලියන අලංකාරිකයක් නෙවෙයි. දශක හතකට ආසන්න කාලයක් නොවිසඳුණ දේශපාලන ගැටළුවක්. දෙමළ ජනයාගේ සාමූහික ජාතික ජීවිතයේ පදනම් සැළසුම් සහගතව විනාශ කිරීමේ රාජ්‍ය පිළිවෙත් එක පීල්ලක දුවවන ගමන්, අනෙක් පීල්ලේ සහජීවන කෝච්චි දුවවන්න බැහැ” යනුවෙන් භාෂණ පවසා සිටියේ, රජය විසින් ප්‍රකාශයට පත් කර ඇති ජාතික ඒකාබද්ධතා හා සහජීවන සතිය සම්බන්ධයෙන් 'සිලෝන් ජර්නල්ස්' වෙත අදහස් දක්වමිනි.

පසුගිය 2015 වසරේ රාජ්‍ය නත්තල් උත්සවයට ගිය ජනාධිපතිවරයා යාපනයේ සංචාරය කළ අවස්ථාවේදී යුද අනාථ දෙමළ ජනයා ජීවත්වන කඳවුරුවලට ගොස් ඔවුන් හමුවී ප්‍රකාශ කර සිටියේ අනාථ කඳවුරුවල ඉන්නා ජනයා ගැන තමන් මේ දක්වා දැන නොසිටි බව යයි සිහිපත් කර දෙන රෝහිත භාෂණ පවසන්නේ, ඉන් දෙවසරක් ගතවුවද තම මුල් ගම්බිම් අහිමි වු දෙමළ ජනයා තවමත් ජීවත් වන්නේ එම කඳවුරු තුළම බවයි.

උතුරේ විශාල භුමි ප්‍රමාණයක් තවමත් හමුදාව යටතේ ඇති අතර වර්තමානයේ පවතින්නේ යුද යථාර්ථයක් නොව ‘පශ්චාත් යුද’ යථාර්ථයක් බවත් යුද්ධය නිම වු බවට නිළ වශයෙන් ප්‍රකාශ කර අට වසරක් ගතවී තිබියදීත් තමන්ගේ මුල් ගම් බිම් වලට ගොස් නිදහසේ ජිවත් වීමට නොහැකි පරිසරයක් තුළ සංහිඳියාව ඇති කිරිම සිහිනයක් පමණක් බව ඔහු අවධාරණය කරයි.


විසඳුමක් ගැන සැකයි :


දෙමළ ජනයා මුහුණ දී සිටින්නේ දේශපාලන බලයේ සමාන කොටස්කරුවන් වීමෙන් ඔවුන් වළක්වා වාර්ගික අධිපතිවාදය ව්‍යුහගත කිරීමෙන් හටගත් ගැටළුවට බව අවධාරණය කරන භාෂණ පෙන්වා දෙන්නේ, සහජිවනය ඇති වීම වළක්වන එම ව්‍යුහත්මක ගැටලුවට පැරණි පිළිවෙතේම පිහිටා සිටින තාක් සතිපතා සහජීවන සැලසුම් සැකසුවද ජාතීන් අතර සම්බන්ධතාවයේ කිසිම මූලධාර්මික වෙනසක් සිදු නොවන බවයි.

පවතින ඒකීය රාජ්‍ය ව්‍යුහය දෙමළ ජනයා ප්‍රතික්‍ෂේප කළේ දෙමළ ජනයාගේ අරගලය ආයුධ සන්නද්ධ අදියරකට මාරුවීමට පෙර සිටම බව පෙන්වා දෙන භාෂණ,  යෝජිත නව ව්‍යවස්ථා තුළින් ඒකීය රාජ්‍ය ඇති කිරීම තුළින් දෙමළ ජනයාට පිළිගත හැකි විසඳුමක් නොලැබෙන බව තම විශ්වාසය බවට කියා සිටියි.

මූලධාර්මික කාරණා තුනක් ?


උතුරු නැගෙනහිර දෙමළ ජනයාගේ පාරම්පරික ජනාවාස ප්‍රදේශ ලෙස සැළකීමේ ඉල්ලීම ඇතුළුව තමන්ට පිළිගත හැකි විසඳුමකට පදනම් විය යුතු බව විශ්වාස කරන මූලධාර්මික කාරණා තුනක් 40 වසරක් තිස්සේ අඛණ්ඩව අවධාරණය කර ඇති අතර දෙමළ එක්සත් විමුක්ති පෙරමුණ හා දෙමළ ජාතික සන්ධානය ඇතුළු අනිකුත් දෙමළ තරුණ සංවිධාන බිහිවුයේත් එම මුලික කාරණා ඔස්සේ පිළිගත හැකි විසඳුමකින් තම දේශපාලනික ගැටලුව විසඳා ගැනීමට බව ඔහු අවධාරණය කරයි.

මහා මිනිස් ඝාතනයක් හරහා දෙමළ විමුක්ති කොටි සංවිධානය යුදමය වශයෙන් විනාශ කර දැමීමෙන් පසු 2010 සිට 2015 දක්වා පවත්වන ලද පළාත් සභා හා පාර්ලිමේන්තු මැතිවරණවලදි දෙමළ ජනයා බහුතර වශයෙන් ජීවත්වන පළාත්වලදි ප්‍රජාතන්ත්‍රික අභිලාෂය වශයෙන් බහුතරයක් විසින් ප්‍රකාශයට පත් කළේත් එම මූලධාර්මික කාරණා බව ඔහු 'සිලෝන් ජර්නල්ස්' වෙත පවසා සිටියේය.

ඒකිය රාජ්‍යය හා උතුරු නැගෙනහිර එක් නොකිරීම දෙමළ ජනයා විසින් තමන්ගේ සාමූහික අභිලාෂය වශයෙන් නැවත නැවතත් ප්‍රකාශ කළ කාරණාවලට සහමුලින්ම පසමිතුරු බවත් එවැනි ව්‍යවස්ථාවකින් දෙමළ ජනයාට පිළිගත හැකි විසඳුමක් කිසිසේත්ම නොලැබෙන බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානයේ රෝහිත භාෂණ අවධාරණය කරයි.

(ceylonjournals)

Leave a comment

Make sure you enter all the required information, indicated by an asterisk (*). HTML code is not allowed.

Top