Jan 13, 2017

'සංහිඳියාවට දිගු කාලීන පියවරයන් අවශ්‍යයි' – ජැක්සන්

සංහිඳියාව පිළිබඳව ප්‍රජාතාන්ත්‍රීය ලෙස හා ජනතා හිතවාදී ලෙස දකිමින් සාධාරණ හේතු මත ජනතාවට පක්ෂපාති ලෙස බලා දිගු කාලීන පියවරයන් ගෙන ප්‍රගතිශිලි ලෙස සංහිඳියාව ඇති කරවීමට ක්‍රියා නොකළහොත් හිඟන්නාගේ තුවලය සේ එම ප්‍රශ්නය පවතිනු ඇති බව ප්‍රවීන රංගන ශිල්පී හා චිත්‍රපට අධ්‍යක්ෂ ජැක්සන් ඇන්තනී පවසයි.

වර්තමානයේ සංහිඳියාව ඇති කරවීම ගැටලුවක් බවට පත් වී ඇති බව පෙන්වා දෙන ජැක්සන් ඇන්තනී අවධාරණය කරන්නේ එසේ වීමට මේ රටේ සිංහල, දෙමළ හෝ මුස්ලිම් කිසිදු ජන කොටසක් වග කිව යුතු නැති අතර සංහිඳයාව ගැටලුවක් බවට පත් කරන ලද්දේ දේශපාලන නායකයන් විසින් බවයි.

ඉතිහාසයේ කවරදාකවත් මෙරට වර්ගවාදය හා ජාතිවාදය නොපැවති අතර ඉතාම පිරිසිදුව සියලු ජන කොටස් සංහිඳියාවෙන් ජිවත් වු බව පවසන ඔහු 'සිලෝන් ජර්නල්ස්' වෙත කියා සිටියේ සර්ව ජන ජන්ද බලයත් සමගම සියලු ජන කොටස් වල නායකයන් ජන්ද ගුණ්ඩු ලෙස වර්ගවාදය ඇති කරමින් ජන කොටස් අතර පැවති සංහිඳියාව විනාශ කළ බවයි.

ජන්ද ගුණ්ඩු :

පනහට පනහ, චෙල්වනායගම් ගිවිසුම, සිංහලට මුල් තැන, දෙමළ මුල් තැන වැනි කතා පාලකයන් විසින් ජනතාව බේද බින්න කිරීමට යොදා ගන්නා ලද ජන්ද ගුණ්ඩු ලෙස චිත්‍රපට අධ්‍යක්ෂක ජැක්සන් පවසා සිටියේ රජය විසින් ප්‍රකාශයට පත් කරන ලද සංහිඳියා සතිය සම්බන්ධයෙන් අදහස් දක්වමිනි.

ශ්‍රී ලංකාව ආක්‍රමණය කරන ලද විදේශිකයන්ට මෙරට ජීවත් වු කිසිදු ජන කොටසක් පිළිබඳව වෙනසක් නොතිබු අතර සිංහලේ ලෙස ආක්‍රමණිකයන් විසින් හඳුන්වනු ලැබුවේ සිංහල, දෙමළ, මුස්ලිම් ඇතුලු සියලු ජන කොටස් ජීවත් වු ලංකාව බව ජැක්සන් ඇන්තනී පවසයි.

එකල සිංහලේ යන නාමය භාවිතා කරන ලද්දේ ලංකාව හැඳින්වීමට බව අතර එහි සිංහල, දෙමළ, මුස්ලිම් ඇතුළු සියලු ජන කොටස් ජිවත් වු බව ඔහුගේ විග්‍රහයයි.

ජාතික ප්‍රශ්නය ජන්ද ගුණ්ඩුවක් ලෙස භාවිතා කල දේශපාලකයන් මෙරටේ උග්‍ර ලෙස ජාතිවාදය පැතිර වු බව පෙන්වා දෙන ප්‍රවීන රංගන ශිල්පී ජැක්සන් ඇන්තනි, වැඩිදුරටත් පැවසුයේ “උතුරේ බෙදුම්වාදය ඉතා ඉහළින් ක්‍රියාත්මක වුනා. දකුණේ දේශපලනය එයට විරුද්ධව වැඩ කටයුතු කළා. 1983 එවකට සිටි ආණ්ඩු විසින් නිර්මාණය කල ජාත්‍යන්තර කිල්ල, ජූලි අන්ධකාරය ලෝකය පුරා ඩයස්පෝරාවක් බිහි කළා. එතැන් සිට ජාත්‍යන්තර බෙදුම්වාදය අනාදිමත් කාලයක සිට සංහිඳියාවෙන් සිට සියලු ජන කොටස් බේද බින්න කළා,” යනුවෙනි.

ජාතිවාදී තුවාලය :

එසේ බේද බින්න කළ ජාතියකට වසරක, දින හතක් නියම කිරීමකින් සංහිඳියාව ඇති කළ නොහැකි බව පවසන ඔහු අවධාරණය කරන්නේ අදටත් සියලු ජන කොටස්වල ඇතැම් දේශපාලන නායකයන් රට තුළ ඇති වු ජාතිවාදී තුවාලය පරිස්සම් කරමින් ප්‍රයෝජන ලබමින් සිටින විට සංහිඳියාව ඇති කළ නොහැකි හැකි බවයි.

සාධාරණ හේතු කාරණා යටතේ, සංස්කෘතික කාරණා යටතේ, ජනතාවගේ ඕනෑ එපාකම් යටතේ සංහිඳියාව ඇති කිරීමට කැපවිය යුතු බව ඔහුගේ මතය වී ඇත.

ජනයා නොදන්නා දේ :

ආණ්ඩුක්‍රම ව්‍යවස්ථාව, නීතිය පිළිබඳව, කෙටුම්පත් ගැන රටේ ජනතාවට අවම දැනුමක් ඇති බැවින් ඒකීය රාජ්‍ය, එක්සත් රාජ්‍ය හා ෆෙඩරල්වාදය කුමක්ද යන්න රටේ සාමාන්‍ය ජනයා නොදන්න‍ා නිසා එයින් දේශපාලකයන් වාසි ලබා ගනිමින් සිටින බවටද ජැක්සන් ඇන්තනී චෝදනා කරයි.

ව්‍යවස්ථාව සම්බන්ධයෙන් කරන ප්‍රකාශ, සංහිඳියාව සම්බන්ධව සුන්දර වචන තුළින් ජනතාවට කොළේ වහමින් සිටිනවාට වඩා වැඩ් ජන සහභාගිත්වයකින් සිවිල් බුද්ධිමතුන් එකතු කර ගිනිමින් ප්‍රජාතාන්ත්‍රීයව පාරදෘශ්‍ය ලෙස මෙවැනි දේ ක්‍රියාත්මක වනවා නම් සුදුසු යැයි ප්‍රවීන රංගන ශිල්පී හා චිත්‍රපට අධ්‍යක්ෂ ජැක්සන් ඇන්තනී යෝජනා කර සිටියේය.

(ceylonjournals)


සබැඳි පුවත් :

සංහිඳියාව : 'නීතිමය හා ව්‍යුහමය වෙනසක් අවශ්‍යයි' – අමරකීර්ති

'සංහිඳියාවට නාමකරණයට එහා ගිය මැදිහත් වීමක් අවශ්‍යයි' – සමනලී

සංහිඳියාව කාලීන අවශ්‍යතාවයක් – චිත්‍රාල් සෝමපාල

'යුක්තිය ඉටු නොවන තාක් සංහිඳියාව ඇති නොවේ' - භාෂණ

Leave a comment

Make sure you enter all the required information, indicated by an asterisk (*). HTML code is not allowed.

Top