Mar 01, 2017

මිලියන 100 ක බැඳුම්කර මගඩිය සිදු වුනේ මෙහෙමයි !

අතිරේක විනාඩි 4 කින් මහ බැංකුවේ රුපියල් මිලියන 100 ක මගඩිය සිදු වූ ආකාරය 'කැෆේ' සංවිධානයේ විධායක අධ්‍යක්ෂ කීර්ති තෙන්නකෝන් මහතා ගාල්ලේ අද (01) පැවති පුවත්පත් සාකච්ඡාවක දී විග්‍රහ කළේය. 

බැදුම්කර වංචාව විමර්ශනය සදහා පත් කොට ඇති කොමිසමේ සමාජිකයින් අද ශ්‍රී ලංකා මහ බැංකුවේ වෙන්දේසිය නිරීක්ෂණය කිරීම තුලින් ‘බැදුම්කර මගඩියේ’ එක් අන්තයක් පිළිබදව ඔවුනට මනා අවබෝධයක් ලැබෙන්නට ඇති බව විශ්වාස කළ හැකි යැයි ඔහු එහිදී පැවසීය.

එහිදී අදහස් දැක්වූ කීර්ති තෙන්නකෝන් මහතා මෙසේද සඳහන් කළේය.

“මහ බැංකු බැදුම්කර වංචාවේ දී 2015 පෙබරවාරි 27 උදේ සිදු වූ දේ තුල බැදුම්කර වංචාවේ ප්‍රබලම සාක්ෂිය සැගවී තිබෙනවා.

මහ බැංකු වෙන්දේසියේ පරිගණක පද්ධතිය තවදුරටත් ලංසු ලබාගත නොහැකිව සාමාන්‍ය තත්වය යටතේ පෙ.ව. 11 ට ස්වයංක්‍රීයව වැසී යනවා.

නමුත්, ලංකා ඉතිහාසයේ විශාලතව මහ බැංකු මංකොල්ලය සිදු වූ දිනයේ පෙ.ව. 10.55 ට ලැබුණු දුරකථන ඇමතුමකින් මහ බැංකුවේ ස්වයංක්‍රීය පරිගණක පද්ධතිය තවත් විනාඩි 10 කට එනම් 11 සිට 11.10 දක්වා විවෘත කිරීමට නියෝගයක් ලැබෙනවා. “

එම නියෝගය ලැබුණු පසුව පෙ.ව. 11.04 ට එච්එස්බීසී බැංකුව මගින් රු. මිලියන 100 ක මුදලකට 12.5% කට මුදලක් සදහා ලංසුවක් ලැබුණා.

මෙය ඉතා වැදගත්.

මෙම බැංකුව දැනගෙන හිටියා නිශ්චිතව වෙනදා වගේ මහ බැංකුවේ ලංසු ගැනීම 11.00 ට ස්වයංක්‍රීයව අවසන් නොවන බව.

ඔවුන් දැනගෙන හිටියා අර හොර ගැසට් එකේ තියෙන අනුපාතයට (වෙනදා සාමාන්‍ය වෙළෙදපොල වටිනාකමට වඩා වැඩි පොළියකට) තමන්ට වාසි සහගත ගණුදෙණුවක් කළ හැකි බව.

පරිගණක පද්ධතිය වැසී යන බව :

අද කොමිසමේ නිරීක්ෂණය තුල ඔවුන් පෙ.ව. 11 ට අවසන් වන ස්වයංක්‍රීයව ලංසු සදහා පරිගණක පද්ධතිය වැසී යන බව අනිවාර්යෙන්ම නිරීක්ෂයට කරන්නට ඇතැයි අපි විශ්වාස කරනවා.

මේ වන විටත් එදා පෙ.ව. 10.55 ට ලැබුණු දුරකථන ඇමතුමකින් ලංසු ගැනීම විනාඩි දහයකට දික් කර බවත් ඒ විනාඩි දහයෙන් විනාඩි 4 ක් තුල ලංකාවේ විශාලතම බැංකු මංකොල්ලයෙන් කොටසක් රු. මිලියන 100 ක ගණුදෙනුව සිදු වූ බව විගණකාධිපති හා කෝප් වාර්තාවන් හි සදහන් වෙනවා යැයි ද තෙන්නකෝන් මහතා පැවසීය.

'' අද අපට ඇති අභියෝගය මේ මංකොල්ල කෑ මුදල් නැවත මහ බැංකුවට ලබා ගන්නේ කෙසේද යන්නයි. මේ මුදල් අයිති රටේ ජනතාවටයි. ඒ සදහා අප ක්‍රියාත්මක විය යුතුව තිබෙනවා. අප විශ්වාස කරනවා කොමිෂන් සභාවට එය කරන්න පුළුවන් වෙයි කියලා'' යැයි ද තෙන්නකෝන් මහතා වැඩිදුරටත් පැවසීය.

Leave a comment

Make sure you enter all the required information, indicated by an asterisk (*). HTML code is not allowed.

Top