Oct 31, 2016

සාධාරණය ඉල්ලා සාලාවේ ජනතාව අඛණ්ඩ සත්‍යග්‍රහයකට සැරසේ

සාලාව අවි ගබඩාව පිපිරීම නිසා සම්පූර්ණයෙන්ම නිවාස අහිමි වූ පවුල්වලට නිවාස සකස්කර ගන්නාතුරු ලබාදෙන බවට පොරොන්දු වූ රුපියල් 50,000ක මුදල ලබාදීමත් අගෝස්තු මාසයේ සිට නවතා දමා තිබෙන බැවින් නොවැම්බර් මස 03 වන දින සිට අඛණ්ඩ සත්‍යග්‍රහයක් ආරම්භ කරන බව සාලාව අවි ගබඩාව පිපිරීමෙන් විපතට පත් ජනතා එකමුතුව සඳහන් කරයි.

අවි ගබඩාව පිපිරීම නිසා පවුල් 168ක් අසරණ තත්ත්වයකට පත්ව තිබෙන බවද එම සංවිධානයේ ලේකම් චන්දන සූරියආරච්චි මහතා සඳහන් කළේය.

නිවාස හා වෙළෙඳ ව්‍යපාර අහිමි වූ පුද්ගලයන්ට ඊට අදාළ වන්දි මුදල් ලබාදෙන බවට සඳහන් කළත්, එම කටයුතුත් නිසිලෙස සිදු නොවන බවත්, වගා හානි ගණනය කිරීම හා තුන්වන පාර්ශ්වයට අයත් රථවාහන සඳහා වන්දි ලබාදීම ගණනය කිරීමවත් මෙතෙක් සිදුකර නොමැති බවද පවසා සිටියේය.

මේ පිළිබඳව අවස්ථා ගණනාවකදී බලධාරීන් සමග සාකච්ඡා කළත් ඊට නිසි විසඳුමක් මෙතෙක් ලැබී නොමැති අතර, මෙයින් 2070කට අධික පවුල් ප්‍රමාණයක් දැඩි පීඩාවට ලක්ව තිබෙන බවද ලේකම්වරයා සඳහන් කළේය.

වන්දි ගණනය කළ නිවාසවලට පවා වන්දි ලබාදීමේදී රුපියල් ලක්ෂ 10කට වැඩි වන්දි මුදල්වලින් මෙතෙක් ලබාදී තිබෙන්නේ 50%ක ප්‍රමාණයක් බවත් මේ නිසා තමන්ට සාධාරණය ඉටුකරන ලෙස ඉල්ලා සාලාව නගරයේදී මෙම උපවාසය ආරම්භ කිරීමට සැලසුම්කර තිබෙන බවත්, එය මාරාන්තික උපවාසයක් දක්වා වුවද ක්‍රියාත්මක විය හැකි බවද චන්දන සූරියආරච්චි මහතා වැඩිදුරටත් පවසා සිටියේය.

Leave a comment

Make sure you enter all the required information, indicated by an asterisk (*). HTML code is not allowed.

Top