15976 BM WEB BANNER 01
Nov 15, 2016

යහපාලනයේ වදදීම් ගැන එක්සත් ජාතීන්ට පැමිණිලි

වර්තමාන පාලනය යටතේත් පැහැරගෙන ගොස් වධහිංසා පමුණුවනු ලැබූ දෙමළ ජාතිකයින් තිස් හය දෙනකු ගැන එක්සත් ජාතීන්ට පැමිණිල්ලක් කරන ජාත්‍යන්තර මානව හිමිකම් සංවිධානයක් ශ්‍රී ලංකාවේ තවමත් රහසිගත වධ කඳවුරු පවත්වාගෙන යන බවට චෝදනා කර ඇත.

එම වධකාගාර සම්බන්ධයෙන් විමර්ශනයක් කිරීම සඳහා ශ්‍රී ලංකාවට යන මෙන් ශ්‍රී ලංකාවේ යුද්ධයේ අවසාන අදියර පිලිබඳ විමර්ශනය කළ එක්සත් ජාතීන්ගේ විශේෂඥ මණ්ඩලයේ හිටපු සාමාජිකා යැස්මින් සුකාගේ ප්‍රධානත්වයෙන් යුත් දකුණු අප්‍රිකාවේ ජොහැන්නස්බර්ග් නුවර මුලස්ථාන කොටගත් සත්‍ය හා යුක්තිය සඳහා වන ජාත්‍යන්තර ව්‍යාපෘතිය (ITJP) වධහිංසාවට එරෙහි එක්සත් ජාතීන්ගේ කමිටුවෙන් (UNCAT) ඉල්ලා තිබේ.

අලුත් ආණ්ඩුවට මේ අපරාධ නවත්වාලීමේ හැකියාවක් ලැබී නැති බව පවසන ITJP ව්‍යාපෘතිය, තම ඉල්ලීම ඉදිරිපත් කර ඇත්තේ UNCAT සංවිධානයේ 59 වැනි සමුළුව හමුවේ නැගෙන චෝදනා වලට පිළිතුරු දීමට නීතිපති ජයන්ත ජයසුරිය මහතාගේ ප්‍රධානත්වයෙන් ශ්‍රී ලංකාවේ ඉහළ මට්ටමේ රාජ්‍ය නියෝජිත පිරිසක් ජිනීවා නුවරට ගොස් සිටියදීය.

දඬුවමින් ගැලවී යාම:

“2015 ජනවාරියේ ආණ්ඩු මාරුවක් සිදුවුනද, දණ්ඩ මුක්තිය භුක්ති විඳින බුද්ධි සහ ආරක්ෂක කණ්ඩායම් විසින් රහසිගත ස්ථාන වල නීති විරෝධී ලෙස රඳවාගෙන සිටින දෙමළ පිරිස් මත්තේ භයංකර වධහිංසා සහ ලිංගික ප්‍රචණ්ඩතා මුදාහරිනු ලැබේ,” යි ITJP අධ්‍යක්ෂිකා යැස්මින් සූකා නිවේදනයක් නිකුත් කරමින් පවසයි.

එම ව්‍යාපෘතිය තොරතුරු රැස් කරගෙන ඇත්තේ වධහිංසාවට ලක්වීමෙන් අනතුරුව රටින් පලාගොස් විදේශගතව සිටින අයගෙනි.

2015 – 2016 කාල වකවානුවේ බුද්ධි සහ ආරක්ෂක නිලධාරීන් අතින් පැහැරගෙන යාමට, නීති විරෝධී රඳවා තබා ගැනීමට, වධහිංසාවට සහ/ හෝ ලිංගික ප්‍රචණ්ඩතාවට ගොදුරු වූ දෙමළ වින්දිත ගැහැණු පිරිමි 36 දෙනකුගෙන් යුරෝපා රටවල් තුනකදී ලබාගත් ප්‍රකාශ මත පදනම් වී තමන් විසින් UNCAT වෙත සවිස්තර වාර්තාවක් දී ඇති බව ITJP පවසයි.

පින්තූර සහ ප්‍රකාශන :

වධහිංසාවට ලක්‌වූ ඇතැමුන්ගේ තුවාල කැළැල් දැක්වෙන ඡායාරූප සහ ප්‍රකාශ ද ITJP විසින් ජනමාධ්‍ය වෙත ලබා දී තිබේ.

“ශ්‍රී ලංකාවේ තවමත් වධහිංසා කරන බවත්, මම වින්ද වද වේදනාත් පිටස්තර ලෝකයා දැනගැනීම මගේ උවමනාවයි,”යනුවෙන් මේ අවුරුද්දේ සුදු වෑන් රියකින් පැහැරගෙන ගොස්, උතුරේදී නීති විරෝධී ලෙස රඳවා තබාගෙන, කල්ලි ගැසී දූෂණය කරනු ලැබූ දෙමළ තරුණියක් පැවසූ අයුරු එහි සඳහන් වේ.

“මට වද දුන්නා. මට සිද්ධ වුණේ මොකක්ද කියා ජනතාවට දැනගැනීමටත්, මේ වගේ දෙයක් නැවත කාටවත් සිදු නොවීම සහතික කරගැනීමටත් මට අවශ්‍යයි,” කියා වින්දිත තරුණයෙක් ITJP වෙත ප්‍රකාශ කර තිබේ. “ඒ ගොල්ලෝ තුවක්කු අරං මාව මරන්න එනවා කියා හුඟක් වෙලාවට මට හීනෙන් පෙනිලා බයවෙනවා”.

යුද අපරාධ, පශ්චාත් යුද වධ හිංසා සහ ලිංගික ප්‍රචණ්ඩතාවෙන් පීඩා විඳි බවට චෝදනා කරන රටින් පලා ආ දෙසීයකට අධික පිරිසකගේ සාක්ෂි තමන් සතුව ඇති බව ITJP පවසයි.

මානව හිමිකම් කොමිසම :

වර්තමාන පාලනය යටතේත් රජයේ අත් අඩංගුවේ කරන ලද වධහිංසා හයසියයකට අධික ප්‍රමාණයක් පිලිබඳ පැමිණිලි තමන්ට ලැබී ඇති බව ශ්‍රී ලංකා මානව හිමිකම් කොමිසම ද එක්සත් ජාතීන්ට ලබා දුන් වාර්තාවකින් හෙළි කර තිබේ.

වධහිංසාවට එරෙහි එක්සත් ජාතීන්ගේ කමිටුව (UNCAT) වෙත ශ්‍රී ලංකා මානව හිමිකම් කොමිසම සපයා ඇති අලුත්ම වාර්තාවේ දැක්වෙන පරිදි මේ අවුරුද්දේ මුල් මාස අට තුලදී පමණක් වධහිංසාවට ලක්වී ඇති සංඛ්‍යාව 208 කි.

ශ්‍රී ලංකාව පිලිබඳ පස්වැනි වාරික විමර්ශනය UNCAT විසින් අද සහ හෙට (15-16 )දෙදින රජයට එල්ලවන චෝදනා පිළිබඳව ප්‍රශ්න කිරීමට නියමිතය.

(radiogagana)

සබැඳි පුවත් :

'පොලිස් වදහිංසාවල අඩුවක් නැහැ' - රජය ජිනීවා'හිදී අර්බුදයක

මානව හිමිකම් උල්ලංඝනය කරලා : පොලිසිය ජිනීවා කැඳවයි

'පොලිසිය දිගටම මානව හිමිකම් උල්ලංඝනය කරලා' -HRW කියයි

වධහිංසා කිරීම් : ශ්‍රී ලංකා ආණ්ඩුවට එරෙහිව නඩු පැවරීමේ පියවර (වීඩියෝ) 

පොලිස් වද බන්ධන දිගටම: HRW කියයි 

Leave a comment

Make sure you enter all the required information, indicated by an asterisk (*). HTML code is not allowed.

Top