Oct 17, 2017

මාලිංග හා උපුල් ලාහෝර් යන්න බෑ කියති ! Featured

ලබන 29 වැනිදා පාකිස්තානයේ ලාහෝර් නුවර ගඩාෆි ක්‍රීඩාංගනයේ දී තරග වැදීමට නියමිත ශ්‍රී ලංකා විස්සයි - 20 කණ්ඩායමට නායක උපුල් තරංග හෝ හිටපු නායක ලසිත් මාලිංග සහභාගි නොවන බව වාර්තා වේ.

දිනේෂ් චන්දිමාල් සහ ඇන්ජලෝ මැතිව්ස් යන ජ්‍යෙෂ්ඨ ක්‍රීඩකයන් ද පාකිස්තාන සංචාරයට සහභාගි නොවීමට තීරණය කර ඇති බවද ක්‍රිකට් අභ්‍යන්තර ආරංචි මාර්ගවලින් පැවසේ.

වසර 2009 මාර්තු මාසයේ දී ගඩාෆි ක්‍රීඩාංගණය ආසන්නයේ දී ත්‍රස්තවාදී ප්‍රහාරයකට ලක්වීමෙන් අනතුරුව ශ්‍රී ලංකා කණ්ඩායම පාකිස්තානයේ සංචාරයක යෙදෙන ප්‍රථම අවස්ථාව මෙය වේ.

ප්‍රහාරය එල්ල වූයේ සිය කණ්ඩායමට බැවින් එරට සංචාරය කරන පළමු කණ්ඩායම වීම පිළිබඳව කණ්ඩායමේ ජ්‍යෙෂ්ඨ ක්‍රීඩකයෝ දැඩි විරෝධයක් දක්වා ඇති බව පැවසේ.

වෙනත් ජාත්‍යන්තර කණ්ඩායම් සංචාරය කිරීමෙන් අනතුරුව ආරක්ෂක වාතාවරණය යහපත් නම් තමන්ට ද පාකිස්තානයේ සංචාරයක නිරත විය හැකි බව ඔවුන්ගේ ස්ථාවරය වී තිබේ.

සිය තීරණයෙන් අනතුරුව, සංචාරයට සහභාගි වෙන මෙන් කණ්ඩායමේ අනෙක් දක්ෂ ක්‍රීඩකයන්ට බලපෑම් එල්ල කරන බවට ඔවුහු ක්‍රීඩා බලධාරීන්ට චෝදනා කරති.

ලබන 29 වෙනි දින පැවැත්වෙන තරගයට ශ්‍රී ලංකා ක්‍රිකට් කණ්ඩායම සහභාගි කරවන බව ශ්‍රී ලංකා ක්‍රිකට් ආයතනය සඳුදා (ඔක්තෝබර් 16) සවස නිවේදනයක් නිකුත්කරමින් කියා සිටයේය.

ශ්‍රී ලංකා ආණ්ඩුවේ, පාකිස්තාන ආණ්ඩුවේ, ආරක්ෂක කටයුතු පිළිබඳ ස්වාධීන විශේෂඥයන්ගේ සහ පාකිස්තාන ක්‍රිකට් පාලක මණ්ඩලයේ සහාය සහිතව පසුගිය මාස කිහිපය මුළුල්ලේ පාකිස්තානයේ ආරක්ෂාව පිළිබඳව පුළුල් විශ්ලේෂණයක් කළ අතර, එම වාර්තා සහ අයිසීසී ජගත් ක්‍රිකට් පාලක මණ්ඩලයේ නිර්දේශය ප්‍රකාර එම තීන්දුවට එළඹුණ බව ද ශ්‍රී ලංකා ක්‍රිකට් ආයතනය නිකුත් කළ නිවේදනයක දැක්වේ.

 98346767 1810d670 b3e4 4a17 8438 0f2aa7735706
තුවාල ලැබූ තිලාන් සමරවීර පාකිස්තානයේ සිට කොළඹට පැමිණි පසු සිය බිරිඳ සහ දියණිය සමග ගිලන් රථයකින් රෝහලට රැගෙන ගිය අවස්ථාව

කණ්ඩායමේ කිසියම් ක්‍රීඩකයෙකු පාකිස්තාන සංචාරයට සහභාගි නොවීමට තීරණය කළ හොත් තමන් එම තීන්දුවට ගරු කරන බව ශ්‍රී ලංකා ක්‍රිකට් ආයතනයේ සභාපති තිලංග සුමතිපාල පසුගිය සිකුරාදා බීබීසී සිංහල සේවයට පවසා තිබිණි.

"තාමත් ක්‍රීඩකයන් කිහිප දෙනෙක් මේ සංචිතවල ඉන්නවනේ එදා 2009 ඒ ප්‍රශ්නෙට මුහුණ පාපු අය. බොහොම සාධාරණයි ඒ අයට කිසියම් භීතියක් තියෙනව. අපිට ඒ ගැන අවබෝධයක් තියෙනව,” යනුවෙන්ද ඔහු පවසා තිබිණි.

කෙසේ වුවත් පාකිස්තානය සමග පැවැත්වෙන විස්සයි විස්ස තරග තුනටම ක්‍රීඩා කිරීමට කැමති ක්‍රීඩකයන් පමණක් සංචාරයට එක්කර ගැනීමට ද ක්‍රිකට් ආයතනය තීරණය කර තිබේ.

ජ්‍යෙෂ්ඨ ක්‍රීඩකයන් සියලු දෙනා අකැමැත්ත පළ කිරීම හේතුවෙන් තිසර පෙරේරාගේ නායකත්වයෙන් යුත් කණ්ඩායමක් සංචාරය සඳහා එක් කර ගැනීම පිළිබඳව ක්‍රීඩා බලධාරීන් සලකා බලමින් සිටින බව පැවසේ.


 98346768 8f25eaee deb9 4e4b 8237 17768ef7bbf1පාකිස්තාන සංචාරය පිළිබඳව එය සංවිධානය කළ අමාත්‍ය අර්ජුන රණතුංග සහ එවක උප නායකයා වූ කුමාර් සංගක්කාර අතර පසුගියදා වාග් සංග්‍රාමයක් හටගත්තේය

තමන් යළිත් කිසි දිනෙක පාකිස්තානයේ සංචාරය නොකරන බව ප්‍රහාරයෙන් බරපතලම තුවාල ලැබූ තිලාන් සමරවීර පසුගියදා බීබීසී ක්‍රීඩා වෙබ් අඩවිය පවසා තිබිණි.

2009 සංචාරයේදී කණ්ඩායමේ ආරක්ෂාව සම්බන්ධයෙන් ප්‍රමාණවත් පියවර නොගත් බවට එවකට උප නායකයා වූ කුමාර් සංගක්කාර මීට මාස කිහිපයකට ඉහතදී ද ක්‍රීඩා බලධාරීන්ට චෝදනා කළේය.

ක්‍රිකට් ආයතනයේ සභාපතිවරයා ද ශ්‍රී ලංකා කණ්ඩායම සමග පාකිස්තාන සංචාරයට සහභාගි වීමට නියමිතය.

මූලාශ්‍රය බීබීසී සංදේශය

Leave a comment

Make sure you enter all the required information, indicated by an asterisk (*). HTML code is not allowed.

Top