Nov 27, 2016

නැගෙනහිර උප කුලපති අතුරුදහන් කර දස වසරක් (වීඩියෝ)

දස වසරකට ඉහත අතුරුදහන් කල හිටපු උප කුලපතිවරයා සොයා දෙන ලෙස ඉල්ලා නැගෙනහිර විශ්ව විද්‍යාල කාර්ය මණ්ඩල පසුගියදා උද්ඝෝෂණයක නිරත විය.

ශ්‍රී ලංකා විද්‍යාභිවර්ධන සංගමයේ සම්මන්ත්‍රණයකට සහභාගී වීම සඳහා ගමන් කරමින් සිටි උප කුලපති මහාචාර්ය සිවසුබ්‍රමනියම් රවීන්ද්‍රනාත් කොළඹ බෞද්ධාලෝක මාවතේදී මහ දවාලේ පැහැරගනු ලැබුවේ 2006 දෙසැම්බර් 15 දාය.

ඔහු සම්බන්ධයෙන් යුක්තිය ඉටු කරන ලෙස ඉල්ලා නැගෙනහිර විශ්ව විද්‍යාලය නොවැම්බර් 24 දා පැවැත්වූ උද්ඝෝෂණයෙන් අනතුරුව, අපක්ෂපාතී කඩිනම් පරීක්ෂණයක් පවත්වන ලෙස ඉල්ලා ජනාධිපතිවරයාට යවන සන්දේශයක් දිසා ලේකම්වරයාට භාරදෙනු ලැබිය.

“ප්‍රකට මාධ්‍යවේදීන්ගේ සහ දේශපාලකයන්ගේ ඝාතන ගැන මේ ආණ්ඩුව පරීක්ෂණ ආරම්භ කරලා තියෙනවා. බුද්ධිමතුන් ඝාතනය කිරීම ගැනත් අපක්ෂපාතී පරීක්ෂණ පවත්වා අපරාධකරුවන්ට දඬුවම් දිය යුතුයි,” යනුවෙන් නැගෙනහිර විශ්ව විද්‍යාල කම්කරු සංගමයේ සභාපති ජීවරත්නම් කෙනඩි මාධ්‍යවේදීන් අමතා පැවසීය.

මහාචාර්ය රවීන්ද්‍රනාත් පැහැරගැනීමට පෙර සැප්තැම්බර් 30 දා කලා පීඨාධිපති ආචාර්ය බාල සුකුමාර් පැහැරගත් සන්නද්ධ අතුරු කල්ලියක් ඔහු නිදහස් කිරීම සඳහා උප කුලපති වරයාට ඉල්ලා අස් වන ලෙස බල කොට තිබුනි.

ඔක්තෝබරයේ මහාචාර්ය රවීන්ද්‍රනාත් මහතා විසින් භාර දෙන ලද ඉල්ලා අස්වීමේ ලිපිය බාර ගැනීම විශ්ව විද්‍යාල බලධාරීන් විසින් ප්‍රතික්ෂේප කරන ලදී.

මානව හිමිකම් සංවිධාන ගණනාවක් ඔහුගේ නිදහස වෙනුවෙන් ඉල්ලීම් ඉදිරිපත් කොට ඇතත් අද වන තුරු ඔහු ආගිය අතක් නැත.

“ඔහු ගමන් කරමින් සිටියේ දැඩි ලෙස හමුදා රැකවල් ලා තිබූ ප්‍රදේශයකදී හෙයින්, ඔහු පැහැරගත්තේ ආරක්ෂක හමුදාවල නිහඬ සහාය ලබා ක්‍රියාත්මක වන සන්නද්ධ කල්ලියකින් බවට විශ්වාස කළ හැකිය,” යි මහාචාර්ය රවීන්ද්‍රනාත් මහතා පැහැරගත් වහාම ඇම්නෙස්ටි ජාත්‍යන්තරය නිවේදනයක් නිකුත් කරමින් කියා සිටියේය.

(radiogagana)

Leave a comment

Make sure you enter all the required information, indicated by an asterisk (*). HTML code is not allowed.

Top