Pasidol
Sathosa Ad Final Sinhala
15976 BM WEB BANNER 01
Dec 10, 2017

අලුත් ෆිජ් හා ඒසීවලට බදු සහනයක් ! Featured

ලබන වසරේ (2018) සිට හයි‍ඩ්‍රෝ ක්ලෝරෝ ෆ්ලූරෝ කාබන් අඩංගු ශීතකරණ සහ වායු සමීකරණ යන්ත්‍ර මෙරටට ගෙන්වීම තහනම් කිරීමට රජය තීරණය කර ඇතැයි පරිසර සහ මහවැලි අමාත්‍යාංශයේ වායු සම්පත් කළමනාකරණ ඒකකයේ අධ්‍යක්ෂ ජානක ගුණවර්ධන මහතා කියයි.

 

ඊට අදාළ ගැසට් නිවේදනය 2018 ජනවාරි පළමු වැනිදා නිකුත් කිරීමට නියමිත බවද ඒ මහතා පැවසීය.

HCFC වායුව විෂ සහිත බැව් අනාවරණය වීමෙන් පසුව මේ තීරණය ගෙන ඇති බවද ඒ මහතා පැවසීය.

එම ගැසට් නිවේදනය අනුව විදේශ රටවල භාවිත කරන ලද ශීතකරණ සහ වායුසමීකරණ යන්ත්‍ර මෙරටට රැගෙන ඒමද තහනම් කෙරෙන බවද ඔහු කීය.

මේ ශීතකරණ සහ වායු සමීකරණ යන්ත්‍රවලින් අධික විදුලි නාස්තියක් සිදු වන බවද පැවසේ.

මීට පෙර ශීතකරණ සහ වායු සමීකරණ යන්ත්‍ර නිෂ්පාදනය කිරීම සඳහා ක්ලෝරො ෆ්ලූ‍රෝ කාබන් යොදාගත් අතර එය විෂ සහිත වීම නිසා භාවිතයෙන් ඉවත්කරනු ලැබීය.

පසුව, හයිඩ්‍රෝ ක්ලෝරෝ ෆ්ලූරෝ කාබන් (HCFC) යොදා ගනු ලැබුවේ ඊට විකල්පයක් වශයෙනි.

බදු සහනයක්

මේ විෂ සහිත ද්‍රව්‍යයන්ගෙන් තොර නවීන ශීතකරණ සහ වායු සමීකරණ යන්ත්‍ර ආනයනය කිරීම දිරිගැන්වීම සඳහා රජය විසින් බදු සහන ලබාදීමට වැඩපිළිවෙළක් සකස් කිරීමට රජය සැලැසුම් කර ඇති බවද පැවසේ.

විෂ සහිත බවින් තොර විදුලිය පිරිමැස්ම සහිත නවීන කාර්යක්ෂම ශීතකරණ සහ වායුසමීකරණ යන්ත්‍ර මෙරට ජනතාවට හඳුන්වාදීම සඳහා ආනයනකරුවන් දිරිගැන්වීමට තවත් සහන ගණනාවක් ලබාදීමට නියමිත බවත් අධ්‍යක්ෂවරයා වැඩිදුරටත් සඳහන් කළේය.

මෙරට විදුලි පරිභෝජනයෙන් විදුලි ඒකක විශාල ප්‍රමාණයක් ශීතකරණ සහ වායු සමීකරණ යන්ත්‍ර භාවිතය වෙනුවෙන් වැය කෙරෙන බවත් මධ්‍යම පාන්තික පවුලක සමස්ත විදුලි පරිභෝජනයෙන් 50%ක් පමණ වැය වන්නේ ශීතකරණයට බවත් ඉහළ මධ්‍යම පාංතිකයන්ගේ සමස්ත විදුලි බිලෙන් 50%කට වැඩියෙන් වැය වන්නේ වායු සමීකරණ යන්ත්‍ර භාවිතය මගින් බවද ගුණවර්ධන මහතා කියා සිටී.

නොරච්චෝලේ බලාගාරයෙන් නිපදවන විදුලිබලය හා සමාන විදුලි ඒකක සංඛ්‍යාවක් ශීතකරණ සහ වායු සමීකරණ යන්ත්‍ර භාවිතය සඳහා දැනට වැය කෙරෙන බවද ඔහු සඳහන් කරයි.

මූලාශ්‍රය - සිළුමිණ

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top