Pasidol
Sathosa Ad Final Sinhala
15976 BM WEB BANNER 01
"දැන් (අවුරුදු) හයෙන් එකක් ඒගොල්ලෝ අඩු කරලා තියෙනවා, පහෙන් ගෙදර යන්න ඒක මගේ ප්‍රතිපත්තිය" -ජනාධිපති සිරිසේන "දැන් (අවුරුදු) හයෙන් එකක් ඒගොල්ලෝ අඩු කරලා තියෙනවා, පහෙන් ගෙදර යන්න ඒක මගේ ප්‍රතිපත්තිය" -ජනාධිපති සිරිසේන
Jan 11, 2018

05 ද? 06 ද? : අධිකරණය දෙන තීන්දුව කුමක්ද? Featured

 ජනාධිපති මෛත්‍රීපාල සිරිසේනට වසර හයක කාලයක් පදවියේ කටයුතු කළ හැකිය යන්න තම මතය බව නීතිපතිවරයා පවසයි.

නීතිපති ජයන්ත ජයසූරිය එම අදහස ඉදිරිපත් කළේ, ජනාධිපති මෛත්‍රීපාල සිරිසේන සිය නිල කාලය අවසන් වෙන නිශ්චිත කාල සීමාව පිළිබඳව විමසමින් ශ්‍රේෂ්ඨාධිකරණය වෙත යොමු කර ඇති ඉල්ලීම අගවිනිසුරු ප්‍රියසාත් ඩෙප් ප්‍රමුඛ පංච පුද්ගල විනිසුරු මඩුල්ලක් ඉදිරියේ අද (ජනවාරි 11) සළකා බලන ලද අවස්ථාවේදීය.

ජනාධිපති මෛත්‍රීපාල සිරිසේන සිය නිල කාලය 19 වන සංශෝධනය සම්මත කිරීමට පෙර ආරම්භ කර ඇති හෙයින් එම සංශෝධනයේ සඳහන් වන පරිදි ජනාධිපතිවරයාගේ ධූරකාලය වසර පහකට සීමා කරනු ලැබීම ඔහුට බල නොපාන බව නීතිපතිවරයාගේ තර්කය විය.

ජනතාව වසර හයකට පත් කළ ජනාධිපතිවරයකුගේ ධූර කාලය අඩු කිරීම ජනතාවගේ ඡන්ද බලය හා පරමාධිපත්‍යයට බලපාන කරුණක් වන හෙයින් ඒ සඳහා පාර්ලිමේන්තුවේ 2/3 ඡන්දයට අමතරව ජනමත විචාරණයක් මගින් ජනතා කැමැත්ත ද අවශ්‍ය කරන බව නීතිපතිවරයා පවසයි.

"එහෙම නැත්නම් ජනාධිපතිවරයෙක් පත් වුනාම බලයේ සිටින ජනාධිපතිවරයකුගේ කාල සීමාව වසර දෙකක් හෝ තුනක් විය යුතු යයි නීති ගෙනැවිත් එම කාලය සීමා කරන්න පාර්ලිමේන්තුවට පුළුවන් වෙනවා. ජනමත විචාරණයක් අවශ්‍ය ඒ නිසයි" නීතිපති ජයන්ත ජයසුරිය, ශ්‍රේෂ්ඨාධිකරණය ඉදිරියේ කියා සිටියේය.

MS get 1
19 සංශෝධනය අගමැති නිල කාලයටත් බල පැවැත්වෙයි

19 වන ආණ්ඩුක්‍රම සංශෝධනයේ සඳහන් වසර පහක ධූරකාලය මීළඟට පත් වෙන ජනාධිපතිවරයාගේ පටන් අනාගතයට වලංගු වන බව ඔහුගේ මතය විය.

නීතිපතිගේ තර්කය අභියෝගයට !

ඒකාබද්ධ විපක්ෂයේ ජී.එල්.පීරිස් වෙනුවෙන් පෙනී සිටි ජනාධිපති නීතිඥ මනෝහර සිල්වා නීතිපතිවරයාගේ මතය අභියෝගයට ලක් කරමින් ජනාධිපතිවරයාට ධූරයේ කටයුතු කළ හැක්කේ වසර පහක් පමණක් බව ආණ්ඩුක්‍රම ව්‍යවස්ථාවේ ඉතා පැහැදිලිව සඳහන් බව පෙන්වා දුන්නේය.

19 වැනි ආණ්ඩුක්‍රම ව්‍යවස්ථා සංශෝධනය වත්මන් ජනාධිපතිවරයාට ද බලපාන බව එහි පැහැදිලිව සඳහන් කර ඇති බව පැවසූ ජනාධිපති නීතිඥ මනෝහර සිල්වා, ජනාධිපතිවරයාට ඒ ගැන ගැටළුවක් තිබුණේ නම් එම අවස්ථාවේ ඒ ගැන අධිකරණය යා හැකිව තිබු බවත් සඳහන් කළේය.

ජනාධිපති මෛත්‍රිපාල සිරිසේනගේ නිල වෙබ් අඩවියෙන් උපුටා ගත් ජනාධිපතිවරයාගේ ප්‍රකාශයක් ඉදිරිපත් කළ නීතිවේදියා මෛත්‍රීපාල සිරිසේන ජනාධිපතිවරයාත් සිය ධූරකාලය අඩු කිරීමට කැමැත්ත පළ කර ඇතිබව පැවසීය.

පදවියේ නිල කාලය වසර හතරකට සීමා කළ යුතු යයි තමා යෝජනා කළ බව ජනාධිපතිවරයා පවසා ඇත.

MS get 2
පදවියේ නිල කාලය වසර හතරකට සීමා කළ යුතු යයි තමා යෝජනා කළ බව ජනාධිපතිවරයා පවසා ඇත.

19 වැනි ව්‍යවස්ථා සංශෝධනයට පෙර 2015 ජනවාරි 26 වැනි දින උත්සවයක් අමතමින් ජනාධිපති මෛත්‍රීපාල සිරිසේන තම ධූරකාලය ගැන මෙලෙස අදහස් දක්වා තිබුණි.

"විධායක ජනාධිපතිවරයකුට තියෙන අසීමිත බලතල ඉවත් කරලා පාර්ලිමේන්තුවට වැඩි බලයක් දීලා කටයුතු කිරීමේ කටයුතු මේ දිනවල කර ගෙන යනවා. මම පෙරේදා ඒ සාකච්ඡාවට සහභාගී වෙලා කිව්වා - මගේ නිල කාලයට තියෙනවා අවුරුදු හයක්. මේක අවුරුදු හතරක් කරමුයි කියලා හිටන්. ඒත් ව්‍යවස්ථා විශේෂඥ කමිටුව සහ දේශපාලන නායකයන් අවුරුදු හතරට කැමති වුනේ නැහැ. අවුරුදු හතරකට සැරයක් මැතිවරණයකට යාම රටට හොඳ නැහැ කියල හිටන්. මගේ දැඩි ඉල්ලීම උඩ අවුරුදු හය පහ කරන්න ඒ ගොල්ලෝ කැමති වුනා. දැන් (අවුරුදු) හයෙන් එකක් ඒගොල්ලෝ අඩු කරලා තියෙනවා, පහෙන් ගෙදර යන්න ඒක මගේ ප්‍රතිපත්තිය"

වීඩියෝ

ජනපති එදා කිව්වෙ මෙහෙමයි from SRI LANKA MIRROR on Vimeo.

ජනාධිපතිවරයාගේ ඉහත කී ප්‍රකාශය ඔහුගේ ධුර කාලය වසර පහක් කිරීමට කැමැත්ත දීමේ ප්‍රකාශයක් ලෙස ජනාධිපති නීතිඥ මනෝහර සිල්වා විසින් විග්‍රහ කරනු ලැබුණි.

වසර හයකට පත් වූ ජනාධිපතිවරයකුගේ ධූර කාලය අඩු කිරීම ජනතාවගේ ඡන්ද බලය හා පරමාධිපත්‍යයට බලපාන කරුණක් වන බවට නීතිපතිවරයා ඉදිරිපත් කළ තර්කයට අභියෝග කළ ජනාධිපති නීතිඥ මනෝහර සිල්වා, එවැනි බලපෑමක් ඇති කෙරෙන්නේ ඡන්දයක් කල් දැමීම නිසා වන අතර ඡන්දයක් පෙරට ගැනීම තුළින් එවැනි බලපෑමක් ඇති නොවන බවට ප්‍රතිතර්කයක් ඉදිරිපත් කළේය.

MS get 3
19 සංශෝධනය වත්මන් ජනාධිපතිට බල නොපාන්නේ නම් එය හිටපු ජනපතිවරුන්ටත් බල නොපාන බවට තර්කයක් ඉදිරිපත්ව් ඈත.

ජනාධිපතිවරයාට 19 ව්‍යවස්ථා සංශෝධනය බල නොපාන්නේ නම් හිටපු ජනාධිපති මහින්ද රාජපක්ෂට හා චන්ද්‍රිකා කුමාරතුංගට ද එම සංශෝධනය බල නොපාන බව ශ්‍රේෂ්ඨාධිකරණය ඉදිරියේ අදහස් දැක්වූ ජනාධිපති නීතිඥ අලි සබ්රි ගේ අදහස විය.

ජනාධිපති පදවිය දැරිය හැක්කේ දෙවරක් පමණක් බවට 19 වන සංශෝධනය මගින් ගෙන ආ නීතිය බලපාන්නේ 19 වන සංශෝධනය යටතේ ජනාධිපති පදවියට පත්වූ අයට පමණක් බවට ඔවුන් දෙදෙනාටත් කියා සිටිය හැකි බව පැවසූ ජනාධිපති නීතිඥ අලි සබ්රි ජනාධිපති මෛත්‍රීපාල සිරිසේනගේ නිල කාලය වසර පහක් පමණක් බව තම මතය බව කියා සිටියේය.

ආචාරය ගුණදාස අමරසේකර වෙනුවෙන් පෙනී සිටි නීතිවේදියා අදහස් දක්වමින්, 2015 ජනාධිපතිවරණයේදී ලක්ෂ හැට දෙකක් ජනතාව ජනාධිපති මෛත්‍රිපාල සිරිසේනගේ බලතල හා ධුර කාලය අඩු කිරීම අනුමත කර ඇති බව සඳහන් කළේය.

දූෂණ විරෝධී පෙරමුණේ උලපනේ සුමංගල හිමියන්, ජනාධිපති නීතිඥ සාලිය පිරිස් සහ ශ්‍රී ලංකා නිදහස් පක්ෂයේ මහලේකම් දුමින්ද දිසානායක වෙනුවෙන් පෙනී සිටි ජනාධිපති නීතිඥ ෆායිස් මුස්තාෆා ජනාධිපතිවරයාට වසර හයක් කටයුතු කළ හැකි බවට තර්ක කළේය.

MS get 4
19 අතීතයට බල නොපාන්නේ නම් චන්ද්‍රිකාටත් යළිත් අවස්ථාවක්?

විකල්ප ප්‍රතිපත්ති කේන්ද්‍රය හා 'කැෆේ' මැතිවරණ නිරීක්ෂණ කණ්ඩායමේ රජිත් කීර්ති තෙන්නකෝන් ද තම නීතිවේදීන් මාර්ගයෙන් ජනාධිපතිවරයාගේ කාලය 2020 දී වසර පහක කාලයකින් අවසන් වන බව ශ්‍රේෂ්ඨාධිකරණය හමුවේ කියා සිටියහ.

ශ්‍රේෂ්ඨාධිකරණය මේ පිළිබඳව තම මතය ලබන 14 වෙනිදාට පෙර ජනාධිපතිවරයාට දැනුම් දෙනු ඇත.

ශ්‍රේෂ්ඨාධිකරණයේ මතය ප්‍රසිද්ධ කිරීම හෝ නොකිරීම ජනාධිපති මෛත්‍රිපාල සිරිසේනගේ අභිමතය අනුව සිදු වෙයි.

(බීබීසී සිංහල සේවය)

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top