Jul 30, 2017

ICC දූෂණ මර්ධනයෙන් ක්‍රීඩක වැසිකිළියකට කඩාවදියි ?

සිම්බාබ්වේ හා ශ්‍රී ලංකා කණ්ඩායම් අතර පැවති එක්දින ක්‍රිකට් තරගාවලිය අතරතුරේදී ජාත්‍යන්තර ක්‍රිකට් කවුන්සිලයේ දූෂණ මර්ධක ඒකකයේ නිලධාරීන් හදිසියේම ක්‍රීඩක විවේකාගාර වැසිකිළියට කඩාවැදී ඇතැයි වාර්තා වේ.

ජාතික ක්‍රිකට් පිලේ ජ්‍යෙෂ්ට ක්‍රීඩකයන් දෙදෙනෙකු සිදුකළ පැමිණිල්ලකින් අනතුරුව මෙම නිලධාරීන් යම්කිසි උපාංගයක් (device) සොයමින් මෙලෙස ක්‍රීඩක විවේකාගාර වැසිකිළියට කඩාවැදී ඇතැයි සන්ඩේ ටයිම්ස් පුවත්පත වාර්තා කරයි.

එක් ක්‍රීඩකයෙකු ගේ හැසිරීම සැකසහිත වූ බැවින් මෙම පැමිණිල්ල කළ බව අදාල ජ්‍යෙෂ්ට ක්‍රීඩකයන් දෙදෙනා පැවසූ බව ක්‍රීඩාගාරය තුළ සිටියෙකු විසින් හිටපු ජාතික ක්‍රීඩකයෙකු ට සනාථ කර ඇතැයි ද එහි දැක්වේ.

වාර්තා වන අන්දමට මේ සම්බන්ධයෙන් පරීක්ෂණයක් ද ආරම්භ වී ඇතැයි සන්ඩේ ටයිම්ස් පුවත්පත වැඩිදුරටත් සඳහන් කරයි.

මේ සම්බන්ධයෙන් පුවත්පත වෙත අදහස් දක්වමින් ශ්‍රී ලංකා ක්‍රිකට් ප්‍රධාන විධායක නිලධාරී - ඈෂ්ලි ද සිල්වා මහතා පවසා ඇත්තේ මෙවැනි සිදුවීමක් පිළිබඳව නොදන්නා බවත්, මෙවැනි පරීක්ෂණ ජාත්‍යන්තර ක්‍රිකට් කවුන්සිලයේ දූෂණ මර්ධක ඒකකය විසින් ස්වාධීනව සිදුකරන බවත් ය.

සම්පත් ගේ අවුලක් නෑ ලු

මේ අතර, සන්ඩේ ටයිම්ස් පුවත්පත වැඩිදුරටත් සඳහන් කර ඇත්තේ ශ්‍රී ලංකා ක්‍රිකට් සභාපති තිලංග සුමතිපාල මහතා ගේ ඥාතියෙකු ලෙස සැලකෙන සම්පත් හෙට්ටිආරච්චි නම් පුද්ගලයෙකු සිම්බාබ්වේ සංචාරය අතරතුර පැවති කණ්ඩායම් රැස්වීම් වලට සහභාගී වී පසුව ඊට එරෙහිව තහනමකට ලක්ව ඇති බවට කසුකුසුවක් පවතින බවයි.

සම්පත් හෙට්ටිආරචිච් යනු ශ්‍රී ලංකා ක්‍රිකට් හි සේවකයෙකු බවත්, ඉදිරියේදී ස්ථාපිත කිරීමට නියමිත ‘brain centre’ නම් අංශය භාරදීමට හෙට්ටිආරච්චි මහතාව යෝජනා වී ඇති බවත් පවසන ඈෂ්ලි ද සිල්වා මහතා වැඩිදුරටත් සඳහන් කර තිබුණේ ඉදිරියේදී ඔහු විසින් භාරගැනීමට ඇති රාජකාරී සම්බන්ධයෙන් අදහසක් ලබාගැනීමට මෙවැනි රැස්වීම් වලට අවශ්‍ය විටකදී සහභාගී විමට සිදුවන බවයි. මෙම රැස්වීම් වලට සහභාගී වීම සම්බන්ධයෙන් ඔහුට කිසිඳු තහනමක් පනවා නැතැයි ද සිල්වා මහතා පවසා තිබේ.

Leave a comment

Make sure you enter all the required information, indicated by an asterisk (*). HTML code is not allowed.

Top