Pasidol
Sathosa Ad Final Sinhala
Mar 08, 2018

"මගේම නෑදෑයෝ ඇනකොටා ගන්නවා" - නිලාර් එන් කාසිම් Featured

ස්වාමිනේ ලෝ අඳුරින් මුදවා
ආලෝකය දී අප නෙත් පාදවා

සිල් සුවඳයි ස්වාමිනේ මල් ආසනයම
ඒ තරමට සුවඳ නැද්ද මේ මුළු ලෝකෙම

එක අත්තේ බෝකොළ මෙන් රැඳෙන්න පින් මඳි වෙලාද
නැත්නම් පින් දහම්වලට හිතේ ඉඩක් නැති වෙලාද

බුදුන් දහම් සඟුන් බලෙන් ලෝකෙට මෙත් නොවැඩුවාද
මල් ආසන වන හිත්මත එක මලකුදු නොරැදුනාද

මේ ගීතයේ පද නිර්මාණය නිලාර් එන් කාසිම්. ගායනය සජ්ජාඩ් හසන්. සංගීතය සමන්ත පෙරේරා. දූෂණය ,භීෂණය, වාර්ගිකත්වයෙන් තොරවූ නිවහල් ජිවන සිහිනයක් පිළිබඳව මෙහි කියවෙයි.

නිලාර් එන් කාසිම් කියන්නේ ප්‍රවීණ ගේය පද රචකයෙක් . ඔහුගේ මාධ්‍ය සිංහල , ජාතිය මුස්ලිම්, ඉන්නෙ ලංකාවේ..අපි හැමෝමත් එක්ක. දැන් ඔහුව කොතනටද කොටු කරන්න පුළුවන්? මේ ඇති වුන වර්ගවාදී කෝලාහලය හැම මානව හිතවාදියෙකුටම දැනුන ආකාරයට ඔහුටත් දැනුණා. ඔහු මේ ගැන කෙටියෙන්ම කියන්නේ, " අපි නෑදෑයෝ.. මට ලැජ්ජයි " කියලා.

ඔහු අපිත් එක්ක කියපු දේ සටහන් වුණේ මෙහෙමයි.,

"මේ සිද්ධවෙමින් තියෙන්නෙ සිද්ධවියයුතු දෙයක් නෙවෙයි. කවුරු කළත් මේක මනුෂ්‍යත්වයට නිගාවක්. අපි පැවත එන්නෙ ශිෂ්ට සම්පන්න ඇරඹුමකින්. මේ වන තෙක් අපි ජීවත් වුනේ ඒ ශිෂ්ට සම්පන්න බව රැකගෙන. අපි ජීවත්වෙන්නෙ නවීකරණය වූ ලෝකයක. නමුත් අපි යම් ප්‍රශ්නයකට මුහුණ දෙන්නෙ අතිශය ගෝත්‍රික ස්වරූපයකින්. අපිට අපි ගැනම ලැජ්ජාවක් ඇති වෙනවා".

"අපි දන්නවා දියුණු ප්‍රජාතන්ත්‍රවාදයක් තියෙන රටවල ප්‍රසිද්ධියේ කෙනෙකුගෙ ජාතිය , ආගම ගැන කතා කරන්නේ නෑ. මේ ගැටුම් තුළ වාර්ගිකත්වය,ආගමිකත්වය ඉස්මතු කරගෙන අනෙකාට එරෙහිව පෙළගැහෙනවා . මම විශ්වාස කරන හැටියට එහෙම විය යුතු නෑ. ලංකාවේ සිංහල මුස්ලිම් ජන කොටස් ගත්තම සෙසු සියලු ජන කොටස්වලට වඩා අපි අතර තියෙන්නේ ලොකු නෑ කමක්. ලංකාවේ මුස්ලිම් ජනතාවගේ , පිය පාර්ශවය මුස්ලිම්වරුන්ගෙන් පැවත එන අතර මව් පාර්ශවය පැවත එන්නේ සිංහල ජනතාවගෙන්. වෙළඳාමේදී මුස්ලිම් පිරිමි ලංකාවට ආවා. පස්සේ ඒ කාලේ හිටපු රජවරුන්ගේ අනුග්‍රහය මත ලංකාවේ සිංහල කාන්තාවන් සරණපාවා ගත්තා. මේ අයගෙන් පැවත එන පරම්පරාව තමයි ශ්‍රී ලාංකික මුස්ලිම්වරු. ඉතින් අපි නෑදෑයෝ". අනික පොඩි දේකට මෙහෙම ගැටෙනවා කියන්නේ නිර්ලජ්ජිත වැඩක්. මේක ඇතුළේ වෙන දේශපාලන න්‍යාය පත්‍රයක් තියෙන්න පුළුවන්. කිසියම් හුදෙකලා සිද්ධියක් පදනම් කරගෙන සමස්ත ජන කොටසක් එක්ක ගැටෙන මට්ටමට ආයුතු නෑ."

"මම යෝජනා කරන්නේ අපි මීට වඩා සබුද්ධිකව කල්පනා කරමු කියලා. හැඟීම්වලට වඩා බුද්ධියට ඉඩදෙමු. මේ සිද්ධිය හරහා දේශීයවවත් ජාත්‍යන්තරවත් වාසි ලබන පිරිස් ඉන්නවා. අපි ඔවුන්ගේ ඉත්තන් විය යුතු නෑ. පෞද්ගලිකව මම මුස්ලිම් කලාකරුවෙක් වුණාට මම හිතන්නේ සිංහලෙන් . ආදරය කරන්නේ සිංහල භාෂාවට . මට දැනෙන්නේ ශ්‍රී ලාංකිකයෙක් කියන හැඟීම විතරයි. මට පේන්නේ මගේම නෑදෑයෝ දෙපිරිසක් ඇනකොටා ගන්නවා වගේ . මට ඒක ලැජ්ජාවක්".

පැහැසර අරුණක ඉරමල පිපුණාවේ
යුගදුරු යුගදුම සැනකින් නිවුණාවේ
හිමිදිරියේ... සීතල හීනෙක තැවරීවත්
පරෙවි පියාපත් ඇසුණාවේ

සිත සිරකොට බැදි දඬු වැට බිදුණාවේ
සිත සිත යා කර සෙනෙහස හැමුවාවේ //

පැහැසර අරුණක ඉරමල පිපුණාවේ
යුගදුරු යුගදුම සැනකින් නිවුණාවේ
හිමිදිරියේ... සීතල හීනෙක තැවරීවත්
පරෙවි පියාපත් ඇසුණාවේ

ලියවැල් ඇහැරී යලි මල් පිපුණාවේ
දෑලම යා කල ඉඳු සැව් ඇදුණාවේ //

පැහැසර අරුණක ඉරමල පිපුණාවේ
යුගදුරු යුගදුම සැනකින් නිවුණාවේ
හිමිදිරියේ... සීතල හීනෙක තැවරීවත්
පරෙවි පියාපත් ඇසුණාවේ

පද රචනය - නිලාර් එන් කාසිම්

සටහන - ශිරන්තනි මානවඩු

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - [email protected] දුරකථන - +94 114 546 362

Top