Pasidol
Sathosa Ad Final Sinhala
Feb 09, 2018

සරසවි චිත්‍රාගාරයේ ඕජස් ගලයි - පිහිටවන්න

"සිනමාවේ ආන්දෝලනාත්මක වෙනස් කම් ඇති කරපු සිනමාකරුවො කීපදෙනා අතරට මාවත් ගැනුනා. ඉතින් මට හිතෙනවා මම තනිවම වම් ඉවුරේ හිටගෙන ඇති වැඩකුත් නැහැ කියලා. බලාගෙන ඉන්දැද්දි තමන්ගේ නිර්මාණ නැතිවෙලා යනවා"

මේ හඬ අවදිකරන්නේ ප්‍රවීණ චිත්‍රපට අධ්‍යක්ෂක ධර්මසිරි බණ්ඩාරනායකයි,

මෙරට විශිෂ්ට ගණයේ සිනමා නිර්මාණයක් වන තුන්වෙනි යාමය සිනමාපටයේ, ධර්මසිරි බණ්ඩාරනායක සතු පටල පිටපත විනාශවී යාමත් සමඟ සිනමා සංරක්ෂණය ගැන නැවත කතාබහක් ආරම්භ වී ඇත. දැනට ලේඛනාරක්ෂක දෙපාර්තමේන්තුවේ චිත්‍රපට සංරක්ෂණාගාරය තුළ අප රටේ නිපදවු චිත්‍රපට දෙසිය හතලිස් ගණනක ප්‍රමාණයක් තැන්පත් කරල තිබෙන බවත් එම චිත්‍රපටත් මෙලෙස විනාශවිය හැකි බව ඔහු පවසයි.

රටක පැරණි සිනමා කෘතීන් යනු ඒ රටේ ඉතිහාසයයි. එවැනි තත්ත්වයක් යටතේ මෙලෙස විනාශවන්නේ රටේ ඉතිහාසයයි. මේ තත්ත්වයට ප්‍රධානම හේතුව සිනමා කෘතීන් සංරක්ෂණය සඳහා සංරක්ෂණාගාරයක් රට තුළ නොපැවතීමය.

මේ පිළිබඳව තව දුරටත් අදහස් දක්වන ධර්මසිරි බණ්ඩාරනායක මහතා,

"තුන්වෙනි යාමය චිත්‍රපටය මම ආරක්ෂා කරා. ඒ ආරක්ෂා කරපු චිත්‍රපටිය 2008 වර්ෂයේදී ගාල්ලේ පැවති සිනමා උත්සවයකට චිත්‍රපට අධ්‍යක්ෂකවරයෙක් මගෙන් ඉල්ලා සිටියා. මම ඒක ලබා දුන්නා. ඒ ලබාදීමෙන් අනතුරුම ඒ චිත්‍රපටය නැවත මා අතට පත් වුණේ නැහැ. පත් නොවුන නිසා මම මේ ගැන සොයා බලන්න හිතුවා. චිත්‍රපටි පිටපත ගැන නැවත මගේ අවධානය මේ සඳහා යොමු වුණේ 2017 ප්‍රේමසිරි කේමදාස චිත්‍රපටි උළෙලට ඉදිරිපත් කරන්න ඉල්ලපු අවස්ථාවේ.

"ඒ අවස්ථාවේ එක්තරා ස්ථානයක තිබිලා මට මේ චිත්‍රපටිය සොයාගන්න පුළුවන් වුණා. නමුත් ඒක සම්පූර්ණයෙන්ම විනාශයට පත්වෙලා තිබුණා. චිත්‍රපටයේ දළ සේයපටය රඳවා තිබුණේ සරසවි චිත්‍රාගාරයේ. එහි තිබුණ නෙගටිව් පටය සොයාගෙන ගියාම එය තිබුණෙ සම්පූර්ණයෙන්ම විනාශයට වෙලා. ඒ වගේම මා සතුව පැවති 2017 සොයාගන්නට තිබුණු ප්‍රදර්ශන පිටපතත් සම්පූර්ණයෙන්ම විනාශයට පත්වෙලා තිබුණා. හැම කෑන් එකක්ම ඇරල බැලුවම චිත්‍රපටය ඇතුළේ ලොකු දියරයක් ගලමින් තිබුණා. තාර හා සමාන තත්ත්වයට පත් වෙලා තිබුණා. මම චිත්‍රපටි සංස්ථාවෙනුත් ඉල්ලුවා මට මේ‍කෙ DCP පිටපතක් ලබා දෙන්න කියලා. මොකද මීට පෙර මගේ "රේඛාව" චිත්‍රපටයත් මගේ "හංස විලක්" චිත්‍රපටත්, චිත්‍රපට සංස්ථාව විසින් DCP ක්‍රමයට සකස් කර දුන්නා .

"ඉතින් මේ අවස්ථාවේ ඩොලර් 16000 ක මුදලක් සමග ඉන්දියාවේ රාම් ප්‍රසාද් රසායනාගාරය වෙත එම විනාශයට පත් වුණ ප්‍රදර්ශන පිටපත නොපමාව එවන්න කියලා ඔවුන් කියා සිටියේ පිටතේ දැන් තිබෙන තත්ත්වය තව මාසයක් පමණ යන විට සම්පූර්ණයෙන්ම නැතිවෙලා යන්න ඉඩතියෙනවා කියලා".

"මේ වේදනාවෙන් මම මුහුණු පොතේ තිබූ සටහනට දැකලා ගොඩක් දෙනෙක් මගෙන් ඉල්ලලා එවල තිබුනා ඩොලර් 16000 ක් හොයාගන්න අපි උදවු කරන්නම් කියල. චිත්‍රපටිය අපි බේරගමු කියලා. ඒ විශ්වාසයෙන් මම ගිහින් වාණිජ බැංකුවේ ගිණුමක් ආරම්භ කළා. කෙනෙකුට පුලුවන් මගේ චිත්‍රපටය බේරගන්න මේ මාසය ඇතුළත උදව් කරන්න. ඒ අයටත් නොහැකි වෙතොත් ඒ චිත්‍රපටය මගේ සිනමා ජීවිතෙන් මකා දමන්නට මම කල්පනා කරනවා".

"ඒක මේ රටේ මේ චිත්‍රපටය නැරඹූ, 80 දශකය තුළ මේ චිත්‍රපටයට ආදරය කළ, මේ චිත්‍රපටයේ පැවති ප්‍රේමසිරි කේමදාසයන්ගෙ සංගීත නිර්මාණයට ආදරය කළ ඒ වගේම මේ චිත්‍රපටය රඟපෑ ඒ නළු නිළි පරම්පරාවට ආදරය කළ ඒ සියලුම අයට ඒ චිත්‍රපටය ආයිත් දකින එක හීනයක් බවට පත්වෙනවා.ඒ වගේම මා ඇතුළු සෑම දෙනාටම". යැයි පැවසීය.

ගිණුම් හිමිකරු - කේ. ඩී. බණ්ඩාරනායක
ගිණුම් අංකය - 8116030966

බැංකුව - ලංකා වාණිජ බැංකුව (Commercial Bank )

ශාඛාව - රීඩ් ඇවනියුව් - කොළඹ 04

සම්පූර්ණ මුදල ගෙවා චිත්‍රපටය සංරක්ෂණය කරගන්නට යම් මහතෙකු හෝ ආයතනයක් ඉදිරිපත්වන්නේ නම් එම පාර්ශවයට චිත්‍රපටය පවරාදීමට හෝ මම එකග වෙමි.

Leave a comment

Make sure you enter all the required information, indicated by an asterisk (*). HTML code is not allowed.

මෙම ප්‍රවෘත්තිය පූර්ණවශයෙන් පිළිනොගන්නේ නම් ඔබට පිළිතුරු පල කර ගැනීමේ අයිතිය තිබේ. ඔබේ අනන්‍යතාවය සමඟ ඔබට පිළිතුරුදීමට හැකිය.
ඊමේල් - editor@srilankamirror.com දුරකථන - +94 114 546 362

Top