ජනතා විමුක්ති පෙරමුණේ නිර්මාතෘ රෝහණ විජේවීර මහතා ගේ පුත් උවිඳු විජේවීර මහතා ඉදිරි පාර්ලිමේන්තු මැතිවරණයට කුරුණෑගල දිස්ත්‍රික්කයෙන් ඉදිරිපත් වීමට නියමිත බව වාර්තා වේ. 

උවිඳු විජේවීර දෙවැනි පරපුර දේශපාලන පක්ෂයේ නායකයා වශයෙන් කටයුතු කරන අතර, ඔහු මේ වනවිට කුරුණෑගල දිස්ත්‍රික්කය තුළ එම පක්ෂයේ සංවිධාන කටයුතු සම්පූර්ණයෙන්ම අවසන් කර තිබීම හේතුවෙන් මෙසේ කුරුණෑගල දිස්ත්‍රික්කයෙන් මැතිවරණයට තරග කිරීමට තීරණය කර ඇති බවද පැවැසේ. 

මේ වනවිට ශ්‍රී ලංකා පොදුජන පෙරමුණේ නායක නාමල් රාජපක්ෂ මහතා ද කුරුණෑගල දිස්ත්‍රික්කයෙන් මහා මැතිවරණයට ඉදිරිපත් වීමට සූදානමින් සිටින බවට පැතිර යන ආරංචිය ඔහු  විසින් ප්‍රතික්ෂේප කර තිබුණද බොහෝ විට එය සිදුවිය හැකි බව ද මේ අතර වාර්තා වේ.

හිටපු ජනාධිපති රනිල් වික්‍රමසිංහ මහතාගේ ආරක්ෂාව ඉවත්කර ඇති බවට පැතිර යන ප්‍රචාර සම්පූර්ණයෙන්ම අසත්‍ය බව පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා කියයි.

හිටපු ජනාධිපතිවරයාගේ ආරක්ෂාවට යොදවා ඇති පොලිස් විශේෂ කාර්ය බලකායේ නිලධාරීන් 50 දෙනෙකු ඇතුළු ආරක්ෂක අංශ නිලධාරීන් තවදුරටත් එළෙසම කටයුතු කරන බව පොලිස් මාධ්‍ය ප්‍රකාශකවරයා මාධ්‍යට පවසා ඇත.

හිටපු ජනාධිපති රනිල් වික්‍රමසිංහ මහතාගේ ආරක්ෂාව ඉවත්කර ඇති බවට පැතිර යන ප්‍රචාර සම්බන්ධයෙන් මාධ්‍ය සිදුකළ විමසීමකට පිළිතුරු දෙමින් පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා මේ බව පවසා තිබේ.

කෙසේ වෙතත් හිටපු ජනාධිපතිවරයාට ලබාදිය යුතු නිලධාරීන් ගණන කඩිනමින් තීරණය කර ස්ථාපිත කිරීමට බලාපොරොත්තු වන බවද ඔහු මෙහිදී පවසා ඇත.

මේ අතර වත්මන් ජනාධිපති අනුර කුමාර දිසානායක මහතාගේ ජනාධිපති ආරක්ෂක කොට්ඨාසය ස්ථාපිත කිරීම සඳහා අවශ්‍ය නිලධාරීන් සංඛ්‍යාව මේ වනවිට තීරණය කර ඇති අතර, අතිරික්ත නිලධාරීන් ඉවත්කිරීම ද සිදුව ඇති බව ද වාර්තා වේ.

Last Update – October 6 11:24 pm

රනිල්ගේ පොලිස් ආරක්ෂාව ඉවතට ; පුද්ගලික ආරක්ෂකයාත් නැවත කැඳවයි

හිටපු ජනපති රනිල් වික්‍රමසිංහ මහතාට ලබාදී තිබූ 300ක පොලිස් බලඇනිය නැවත කැඳවා තිබේ.

එසේ නැවත කැඳවූ පිරිස අතර වික්‍රමසිංහ මහතාගේ පුද්ගලික ආරක්ෂකයා ලෙස දීර්ඝ කාලයක් කටයුතු කළ අශෝක ආරියවංශ මහතා ද සිටීම විශේෂිතය.

වැඩබලන පොලිස්පතිවරයා විසින් අදාළ නියෝගය අද (06) පස්වරුවේදී සිදු කර ඇත.

අන්තර්ජාලය ඔස්සේ සංවිධානාත්මක ලෙස මුදල් වංචා සිදුකළ විදෙස් ජාතිකයින් පිරිසක් අත්අඩංගුවට ගෙන ඇත.

අපරාධ පරීක්ෂණ දෙපාර්තමේන්තුව වෙත ලද තොරතුරක් මත හංවැල්ල පාර, ගම්පහ ලිපිනයේ පිහිටි හෝටලයක් සහ අවිස්සාවේල්ල පාර, හංවැල්ල ලිපිනයේ පිහිටි පුද්ගලික ආයතනයක් වටලා සිදුකළ පරීක්ෂා කිරීමකින් අනතුරුව මෙම විදෙස් ජාතික සැකකරුවන් අත්අඩංගුවට ගත් බව පොලීසිය පවසයි.

මෙම පිරිස සමාජ මාධ්‍ය ජාල සහ දුරකථන ඇමතුම් මගින් මූල්‍ය වංචා සිදුකර ඇති බව අනාවරණ වී තිබේ.

අත්අඩංගුවට ගත් සැකකරුවන් සහ සැකකාරියන් අතර චීන ජාතික පිරිමි පුද්ගලයින් 29ක්, චීන ජාතික කාන්තාවක්, ඉන්දීය ජාතික පිරිමි පුද්ගලයෙකු සහ කාන්තාවන් තිදෙනෙක්, තායිලන්ත ජාතික පිරිමි පුද්ගලයින් දෙදෙනෙක් හා කාන්තාවන් සිව් දෙනෙකු සිට ඇත.

ඔවුන් සන්තකයේ තිබී මූල්‍ය වංචාවන් සඳහා යොදා ගත් ජංගම දුරකථන 499ක් ලැප්ටොප් 24ක් හා ඩෙක්ස්ටොප් 29ක් විමර්ශන නිලධාරීන් භාරයට ගෙන ඇත.

සැකකරුවන් සම්බන්ධයෙන් සිදුකළ වැඩිදුර විමර්ශනයේ දී මොවුන් විසින් Investment Scam, Pig butchering Scam යන ක්‍රම ඔස්සේ ද මූල්‍ය වංචාවල යෙදී සිට ඇති බව නිරීක්ෂණය වී තිබේ.

එමෙන්ම මෙම සැකකරුවන් විසින් නැගෙනහිර ආසියානු රටවල් වන චීනය, ඉන්දුනීසියාව හා තායිලන්තය වැනි රටවල් වල පිරිස් මෙන්ම දකුණු ආසියානු රටවල් වල තැන්පත්කරුවන් ද එම වංචාවට හසුකරගෙන ඇති බව නිරීක්ෂණය වී ඇත.

අපරාධ පරීක්ෂණ දෙපාර්තමේන්තුව ජාත්‍යාන්තර පොලීසිය හා යුරෝපොල් මගින් ද අවශ්‍ය සහාය ලබා ගනිමින් වැඩිදුර විමර්ශන සිදුකරන බව පොලිස් මාධ්‍ය අංශය වැඩිදුරටත් සඳහන් කරයි.