Connect with us

පුවත්

අධිකරණයට අපහාස කළ නීතිඥවරයකු රිමාන්ඩ්(Update)

Published

on

විවෘත අධිකරණයේ නඩු විභාගයක් පැවැත්වෙන අවස්ථාවේදී අධිකරණයට අපහාස වන ආකාරයට කරුණු ඉදිරිපත් කළ බවට චෝදනාවට ලක් වූ නීතිඥවරයකුගේ නීතිඥභාවය අත්හිටුවීමට නියම කළ ශ්‍රේෂ්ඨාධිකරණය අදාළ නඩු විභාගය අවසන් වන තෙක් ඔහු රක්ෂිත බන්ධනාගාරගත කිරීමට ඊයේ (20) නියෝග කළේය.

ජයතුංග පටබැඳිගේ සුසිල් ප්‍රියන්ත ජයතුංග නමැති නීතිඥවරයා මෙලෙස රක්ෂිත බන්ධනාගාරගත කරන ලදි. අධිකරණයට අපහාස කිරීම සහ නීතිඥ වෘත්තීය ආචාර ධර්ම කඩකිරීම යටතේ චෝදනාපත්‍ර දෙකක් ඔහුට එරෙහිව කඩිනමින් සකස් කොට අධිකරණයට ඉදිරිපත් කරන ලෙස නීතිපතිවරයාට නියම කෙරිණි. එම පුද්ගලයාගේ මානසික සෞඛ්‍ය තත්ත්වය පරීක්ෂා කිරීම සඳහා මානසික විශේෂඥ වෛද්‍යවරයකු හමුවට ඉදිරිපත් කර ඒ සම්බන්ධ වාර්තාව අධිකරණයට ඉදිරිපත් කරන ලෙස බන්ධනාගාර අධිකාරිවරයාට නියම කෙරිණි.

එසේම මෙම පුද්ගලයාගේ රෝගී තත්ත්වයන් පරීක්ෂා කිරීම සඳහා ඔහු අධිකරණ වෛද්‍ය නිලධාරිවරයා වෙත යොමු කරන ලෙස ද බන්ධනාගාර අධිකාරිවරයාට නියම කළේය.

අනතුරුව අප්‍රේල් මස 3 වැනිදා නැවත ඔහු ශ්‍රේෂ්ඨාධිකරණය හමුවට ඉදිරිපත් කරන ලෙස ද බන්ධනාගාර අධිකාරිවරයාට නියම කරන ලදි.

ප්‍රීති පද්මන් සූරසේන, ගාමිණී අමරසේකර සහ කුමුදුනී වික්‍රමසිංහ යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් විසින් මෙම නියමයන් කෙරිණි.

ශ්‍රේෂ්ඨාධිකරණය හමුවේ සුපුරුදු පරිදි නඩු විභාග පවතින අතරතුර අදාළ නීතිඥවරයාගේ දේපොළ ආරවුලක් සම්බන්ධයෙන් ඉදිරිපත් වූ අභියාචන පෙත්සමක් සම්බන්ධයෙන් ඔහුම අධිකරණය හමුවේ පෙනී සිටිමින් පෞද්ගලිකව කරුණු දැක්වීම සිදු කළේය.

එහිදී ඔහු කියා සිටියේ මෙම විනිසුරු මඬුල්ලේ සාමාජිකයන්ට එරෙහිව තමන් මහේස්ත්‍රාත් අධිකරණය හමුවේ නඩුවක් ගොනු කර ඇති බැවින් මෙම විනිසුරු මඬුල්ලට එම නඩුව විභාග කිරීමට හැකියාවක් නැති බවය.

වෙනත් විනිසුරු මඬුල්ලක් හමුවට එම නඩුව යොමු කරන ලෙස ඉල්ලා සිටින බව ද අදාළ ඉල්ලීම ඇතුළත් මෝසමක් අධිකරණයට ගොනු කර ඇති බව ද ඔහු සඳහන් කළේය.

අනතුරුව දිගින් දිගටම ඔහු විනිසුරු මඬුල්ලට බාධා වන අයුරින් කරුණු ඉදිරිපත් කිරීමට කටයුතු කළේය.

මේ සම්බන්ධයෙන් පියවර ගැනීමට තීරණය කළ ශ්‍රේෂ්ඨාධිකරණ විනිසුරු මඬුල්ල නීතිඥවරයාගෙන් විමසා සිටියේ “මෙම විනිසුරු මඬුල්ල සම්බන්ධයෙන් තමන් දක්වන ස්ථාවරය වෙනසක් තිබේද?” යන්නය.

එහිදී විත්තිකාර නීතිඥවරයා:

“මගේ ස්ථාවරයේ කිසිදු වෙනසක් නෑ.

මෙම විනිසුරුතුමන්ලා ව්‍යවස්ථාපිත යුතුකම් චේතනා‍න්විතව කඩ කිරීම යටතේ මෙම විනිසුරුවරුන්ට විරුද්ධව මහේස්ත්‍රාත් අධිකරණය හමුවේ නඩු පැවරුවා.”

විනිසුරු ප්‍රීති පද්මන් සූරසේන මහතා:

“තමන් අගවිනිසුරුතුමාටත් එරෙහිව නඩුවක් ගොනු කරලා තියෙනවාද?”

විත්තිකාර නීතිඥවරයා:

“ඔව් මම අගවිනිසුරුවරයාට එරෙහිව නඩු දෙකක් මහේස්ත්‍රාත් අධිකරණයේ ගොනු කළා.”

විනිසුරු කුමුදුනී වික්‍රමසිංහ:

“ඔබ ශ්‍රේෂ්ඨාධිකරණ විනිසුරුවරුන් කිහිපදෙනකුටත් එරෙහිව නඩු ගොනු කර තිබෙනවා.”

විත්තිකාර නීතිඥවරයා:

“විනිසුරුවරු අට දෙනකුට එරෙහිව නඩු ගොනු කර තිබෙනවා‍ ව්‍යවස්ථාපිත රාජකාරි ඉටු නොකිරීම සම්බන්ධයෙන්.”

විනිසුරු කුමුදුනී වික්‍රමසිංහ මහත්මිය:

“ශ්‍රේෂ්ඨාධිකරණ විනිසුරුවරුන් ගණනාවකටම නඩු ගොනු කර තියෙනවා. එසේ නම් ඔබේ නඩු විමසීමට අලුතෙන් විනිසුරුවරුන් පත් කළ යුතුයි.”

විත්තිකාර නීතිඥවරයා:

“විනිසුරුවරුන් අට දෙනෙක් තමයි ඉන්නේ. මේ නඩුව මෙන්ම වෙනත් නඩුවලදී ඔවුන් මට විරුද්ධව කටයුතු කළා.”

විනිසුරු ප්‍රීති පද්මන් සූරසේන මහතා:

“තමන් උසාවියේ ඉන්න බවත් තේරුම් අරගෙනද මේ ප්‍රකාශ කරන්නේ? තමන් නීතිඥ වෘත්තීයේ යෙදෙන නීතිඥවරයෙක්ද?”

විත්තිකාර නීතිඥවරයා:

“ඔව් මම නීතිඥ වෘත්තියේ යෙදෙන නීතිඥවරයෙක්. පෞද්ගලික හේතු මත පසුගිය වසර හතරක් පමණ හරියට කටයුතු කළේ නෑ. මම වරදක් කර නෑ.”

විනිසුරු ප්‍රීති පද්මන් සූරසේන මහතා:

“ඒ බව අප තීරණය කරන්නම්.”

“ඔබ අගවිනිසුරුවරයාට එරෙහිව නඩු පවරා තිබෙනවාද?”

විත්තිකාර නීතිඥවරයා :

289 වගන්තිය සහ මානව හිමිකම් උල්ලංඝනය කිරීම යටතේ නඩු පවරා තිබෙනවා. ව්‍යවස්ථාපිත රාජකාරි කටයුතු චේතනාන්විතව කඩ කිරීම සම්බන්ධයෙන් අගවිනිසුරුවරයාට එරෙහිව පැමිණිලි කර තිබෙනවා.”

විනිසුරු කුමුදුනී වික්‍රමසිංහ මහත්මිය:

“ඔබ අගවිනිසුරුටත් එරෙහිව අල්ලස් කොමිසමක නඩු පවරා තිබෙනවාද?”

විත්තිකාර නීතිඥවරයා:

“ඔව්”

විනිසුරු කුමුදුනී වික්‍රමසිංහ මහත්මිය:

“අගවිනිසුරුතුමාට ඔබ නඩු දාලා තියෙනවා. නව විනිසුරුවරුන් පත් කරන්න ඉතින් ඔබතුමා ද අගවිනිසුරුට නියෝග දෙන්නේ.”

විත්තිකාර නීතිඥවරයා:

“මා ඒ ගැන දැනුවත් නෑ.”

එම අවස්ථාවේදී ශ්‍රේෂ්ඨාධිකරණ රෙජිස්ට්‍රාර්වරයා විවෘත අධිකරණයට කැඳවූ විනිසුරු මඬුල්ල මෙම නීතිඥවරයාට එරෙහිව වෙනත් චෝදනා ලැබී තිබේදැයි විමසා සිටියේය.

එහිදී ශ්‍රේෂ්ඨාධිකරණ රෙජිස්ට්‍රාර්වරයා සඳහන් කර සිටියේ ඔහුට එරෙහිව වෘත්තීය ආචාරධර්ම කඩ කිරීම් යටතේ පැමිණිලි හයක් ලැබී ඇති බවය.

ඉන් එක් පැමිණිල්ලක් පිළිබඳ කරුණු විමසා අවසන් කර ඇති අතර චෝදනා ගොනු කිරීම ඇතුළු සුදුසු පියවර ගැනීම සඳහා නීතිපතිවරයා වෙත යොමු කර තිබෙන බව ද රෙජිස්ට්‍රාර්වරයා දන්වා සිටියේය.

එහිදී විවෘත අධිකරණය හමුවේ ප්‍රකාශයක් කළ විත්තිකාර නීතිඥවරයා:

“මේ රෙජිස්ට්‍රාර්වරයා මේ ප්‍රකාශ වගකීමෙන් කළ යුතුයි. මට එරෙහිව බොරු පැමිණිලි කිහිපයක් ඉදිරිපත් කර ඒවා නිෂ්ප්‍රභ වුණා. එකක් මගේ බිරිය විසින් ඉදිරිපත් කළ එකක්. ඒ හැර වෙනත් පැමිණිලි නෑ.” යනුවෙන් සඳහන් කළේය.

මෙහිදී අධිකරණය හමුවේ පෙනී සිටි නියෝජ්‍ය සොලිසිටර් ජෙනරාල් නිර්මලන් විග්නේෂ්වරන් මහතා සඳහන් කළේ ශ්‍රේෂ්ඨාධිකරණය මෙම විත්තිකාර නීතිඥවරයාට එල්ල වූ චෝදනා සම්බන්ධයෙන් නිවැරදි කරුණු දැක්වීම සඳහා ප්‍රමාණවත් අවස්ථාවන් ලබා දී ඇති බවය.

එහෙත් ඔහු එම අවස්ථාවන් වැරදි ලෙස භාවිත කරන බව ද විත්තිකාර නීතිඥවරයා නීතිපතිට විරුද්ධ නඩු දෙකක් ගොනුකර ඇතැයි නියෝජ්‍ය සොලිසිටර් ජෙනරාල්වරයා සඳහන් කළේය.

විනිසුරු ප්‍රීති පද්මන් සුරසේන මහතා:

“තමන් අධිකරණයේ කියන දේවල් අධිකරණයට අපහාසයක් වන බවට සිහි තබාගත යුතුයි. නියෝජ්‍ය සොලිස්ටර් ජෙනරාල් මහතා කරුණු ඉදිරිපත් කරන්නේ ඒ පිළිබඳවයි. මේ කරුණු සම්බන්ධයෙන් ඔබට කියන්න තියෙන්නේ කුමක්ද?”

විත්තිකාර නීතිඥවරයා:

“නීතිපති දෙපාර්තමේන්තුව මා සමඟ තරහයි. නීතිපති සංජය රාජරත්නම් මහතා මා සමඟ ඇති වෛරය නිසා මට විරුද්ධව කටයුතු කරනවා.”

විනිසුරු ප්‍රීති පද්මන් සූරසේන මහතා:

“අධිකරණය පිළිබඳ තමන් අරගෙන තියෙන ස්ථාවරය හරිද?

විතිකාර නීතිඥවරයා:

“ඔව්. ලක්ෂ 700ක මගේ දේපොළ අහිමි කිරීමට මේ පිරිස කටයුතු කළා. නඩුවකදී මට විරුද්ධව කටයුතු කරා. එය ස්වභාවික යුක්ති මූලධර්මයට පටහැනියි. මා කියා සිටින්නේ ඔබ වහන්සේලාට මේ නඩුව පිළිබඳ කරුණු විමසීමට හැකියාවක් නෑ. ඒ සම්බන්ධයෙන් මම මෝසමක් ගොනු කරා. ඔබ වහන්සේලා මෙම නඩුවෙන් ඉවත් වෙලා වෙනත් විනිසුරුවරුන්ට යොමු කරන්න. එවිට එම විනිසුරුවරුන්ට මට කියන්න තියෙන දේ කියන්නම්. අධිකරණයට අපහාස කිරීම සඳහා මම නඩු පැවරුවේ නෑ. මට වුණු අසාධාරණය සම්බන්ධයෙන් නීතියේ හස්තයේ පිළිසරණ පැතීමයි සිදු කරේ. ඒ හැර වෙන විකල්පයක් මට තිබුණේ නෑ.”

මෙහිදී නියෝජ්‍ය සොලිස්ටර් ජෙනරාල් නිර්මලන් විග්නේෂ්වරන් මහතා අධිකරණයෙන් ඉල්ලා සිටියේ මෙම විත්තිකාර නීතිඥවරයා දිගින් දිගටම අධිකරණයට අපහාස කිරීමක් සිදු කරන බව පෙනී යන බැවින් ඒ සම්බන්ධයෙන් නියෝගයක් ලබා දෙන ලෙසය.

එහිදී විනිසුරු ප්‍රීති පද්මන් සූරසේන මහතා:

“අවසන් වරට අහන්නේ. තමන්ගේ ස්ථාවරයේ වෙනසක් තියෙනවද?”

විත්තිකාර නීතිඥවරයා:

“මගේ ස්ථාවරයේ වෙනසක් නෑ.”

එහිදී අදාළ නියෝගය ප්‍රකාශ කරමින් විනිසුරු ප්‍රීති පද්මන් සූරසේන මහතා සඳහන් කළේ අධිකරණයේ ඉදිරිපත් වූ කරුණු සහ ලේඛන පිළිබඳ විනිසුරු මඬුල්ලේ අවධානය යොමු කළ බවය.

ඒ අනුව විත්තිකාර නීතිඥවරයා අධිකරණයට අපහාස වන ආකාරයෙන් සහ අධිකරණයේ ගෞරවයට හානි වන ආකාරයෙන් කටයුතු කරන බවට පෙනී යන බව විනිසුරුවරයා සඳහන් කළේය.

එසේම විත්තිකාර නීතිඥවරයාට එරෙහිව මේ වන විට පැමිණිලි හයක් ශ්‍රේෂ්ඨාධිකරණයට ඉදිරිපත් වී තිබීම සම්බන්ධයෙන් ද විනිසුරු මඬුල්ලේ අවධානය යොමු කෙරිණි.

අනතුරුව මෙම විත්තිකාර නීතිඥවරයා සම්බන්ධයෙන් සිය තීන්දුව ප්‍රකාශ කළ විනිසුරු මඬුල්ල අධිකරණයට අපහාසාත්මක ලෙස හැසිරීම සම්බන්ධයෙන් ඔහුට එරෙහිව පියවර ගැනීමට තීරණය කළේය.

ඒ අනුව වෘත්තීය ආචාරධර්ම කඩ කිරීම සම්බන්ධයෙන් නීතිඥවරයාට එරෙහිව චෝදනා පත්‍රයක් ගොනු කරන ලෙස නීතිපතිවරයාට නියම කළේය.

එසේම 2024 අපහාස කිරීමේ පනතේ අංක 8(1) a යටතේ අධිකරණයට අපහාස කිරීම සම්බන්ධයෙන් ඔහුට එරෙහිව චෝදනා ගොනු කරන ලෙස නියම කෙරිණි.

එසේම නඩුව විභාගය අවසන් වන තෙක් විත්තිකරු බන්ධනාගාරගත කිරීමට නියෝග කළේය.

ශ්‍රේෂ්ඨාධිකරණ රෙගුලාසි 42(3) වගන්තිය යටතේ නීතිඥවරයාගේ නීතිඥ වෘත්තීයභාවය අත්හිටුවීමට නියම කෙරණි.

අදාළ චෝදනා පත්‍ර හැකි ඉක්මනින් අධිකරණයට ඉදිරිපත් කරන ලෙස නීතිපතිවරයාට නියම කෙරිණි.

එහිදී අධිකරණය හමුවට කැඳවා සිටි බන්ධනාගාර නිලධාරීන් ඇමතූ විනිසුරු මඬුල්ල මෙම නීතිඥවරයා බන්ධනාගාර භාරයට ගන්නා ලෙස නියම කළේය.

එහිදී අධිකරණය ඇමතූ විත්තිකරු:

“මම අසනීපෙන් ඉන්නේ. මාව බන්ධනාගාර රෝහලට යොමු කරන ලෙස ඉල්ලා සිටිනවා.” යැයි ඉල්ලා සිටියේය.

එහිදී විනිසුරු ප්‍රීති පද්මන් සුරසේන මහතා:

“ඔබට කතා කරන්න දුන් අවස්ථාව ඉවරයි. දැන් තියෙන්නේ දඬුවම් නියම කරන අවස්ථාව. ඔබ කතා කරන්නේ අධිකරණයේ සිට බව තේරුම්ගත යුතුයි. අපටත් කතා කරන්න දේවල් තියෙනවා. එහෙත් අප එසේ කතා නොකර සීමිත දේවල් පමණයි කතා කරන්නේ.”

අසනීප ගැන බන්ධනාගාර බලධාරීන් එක්ක කතා කරගන්න.” යනුවෙන් සඳහන් කළේය.

අනතුරුව මෙම විත්තිකාර නීතිඥවරයා බන්ධනාගාරයට රැගෙන යන ලෙස නියම කළ විනිසුරු මඬුල්ල ලබන අප්‍රේල් මස තුන්වැනිදා ඔහු නැවත අධිකරණයට ඉදිරිපත් කරන ලෙස බන්ධනාගාර අධිකාරිවරයාට නියම කළේය.

(දිනමිණ)

————————————————

(පෙර පුවත: 2024 මාර්තු 20, ප.ව.9:10)

අධිකරණයට අපහාස කළ නීතිඥවරයකු රිමාන්ඩ්  

අධිකරණයට අපහාසවන අයුරින් හැසිරුණු බව කියන නීතිඥවරයකු  ලබන 3 වැනි දා දක්වා රිමාන්ඩ් ගත කළ ශ්‍රේෂ්ඨාධිකරණය ඔහුට එරෙහිව අධිකරණයට අපහාස කිරී​මේ චෝදනා යටතේ චෝදනා පත්‍රයක් ගොනු කරන්නැයි නීතිපතිවරයාට නියම කළේය.

මෙලෙස රිමාන්ඩ් බාරයට පත් කරන ලද්දේ ජයතුංග නමැති නීතියඥවරයෙකි.ශ්‍රේෂ්ඨාධිකරණ විනිසුරුවරුන් වන ප්‍රීති පද්මන් සූරසේන, ගාමිණි අමරතුංග සහ කුමුදුනී වික්‍රමසිංහ යන මහත්ම මහත්මීන්ගෙන් සැදුම්ලත් විනිසුරු මඩුල්ල එලෙස නියම කළේය.

(ලංකාදීප)

පුවත්

බොරු මැණික් විකිණීමට ගිය 6ක්  අත්අඩංගුවට

Published

on

By

නිධානයකින් ලබාගත් ලද බවට පවසමින් ව්‍යාජ මැණික්ගල් පෙන්වා මුදල් වංචා කිරීමට තැත්කළ කාන්තාවක් ඇතුළු සැකකරුවන් 06 දෙනෙකු අත්අඩංගුවට ගෙන තිබේ.

ඊයේ (25) දහවල් කාලයේදී කටුගස්තොට පොලීසියට ලද තොරතුරක් මත කටුගස්තොට නගරයේදී එම සැකකරුවන් අත්අඩංගුවට ගෙන ඇත.

අත්අඩංගුවට ගත් සැකකරුවන් අවුරුදු 35 හා 51 අතර වයස්වල පසුවන හෙයියන්තුඩුව, ගාල්ල, හිනිදුම සහ ඇතුල්කෝට්ටේ ප්‍රදේශවල පදිංචිකරුවන් වන අතර සැකකාරිය හබරකඩ ප්‍රදේශයේ පදිංචි 35 හැවිරිදි කාන්තාවකි.

මෙම සැකකරුවන් ව්‍යාජ මැණික්ගල් තැරැවුකරුවන් මාර්ගයෙන් ගැණුම්කරුවෙකු සම්බන්ධකර විකිණීම සඳහා ගාල්ල, නෙළුව ප්‍රදේශයේ සිට කටුගස්තොට ප්‍රදේශයට පැමිණ ඇත.

තරැවුකරුවන් විසින් මෙම මැණික්ගල් ව්‍යාජ මැණික්ගල් බවට අනාවරණය කරගෙන ඒ සම්බන්ධයෙන් කටුගස්තොට පොලීසිය දැනුම්වත් කිරීමෙන් පසු සැකකරුවන් අත්අඩංගුවට ගෙන තිබේ.

සැකකරුවන් හා සැකකාරිය ඊයේ (25) මහනුවර මහෙස්ත්‍රාත් අධිකරණය වෙත ඉදිරිපත් කිරීමෙන් පසු හෙට (27) දක්වා රක්ෂිත බන්ධනාගාර ගත කර ඇති අතර කටුගස්තොට පොලීසිය වැඩිදුර විමර්ශන සිදුකරයි.

Continue Reading

පුවත්

තද සුළං ගැන අනතුරු ඇඟවීමක්

Published

on

By

කාලගුණවිද්‍යා දෙපාර්තමේන්තුව විසින් තද සුළං පිළිබඳ අවවාදාත්මක නිවේදනයක් නිකුත් කර තිබේ.

අද (26) පෙ.ව 10.30ට නිකුත් කරන ලද එම නිවේදනය හෙට (27) පෙ.ව 10.30 තෙක් වලංගුවන බව කාලගුණ විද්‍යා දෙපාර්තමේන්තුව සඳහන් කරයි.

මධ්‍යම කඳුකරයේ බටහිර බෑවුම් ප්‍රදේශවල සහ උතුරු මැද, දකුණු, වයඹ පළාත් සහ ත්‍රිකුණාමලය දිස්ත්‍රික්කය සඳහා මෙම නිවේදනය වලංගුවන බව කාලගුණවිද්‍යා දෙපාර්තමේන්තුව පවසයි.

දිවයින හරහා නිරිතදිග මෝසම් සුළං ප්‍රවාහයේ වැඩිවීම හේතුවෙන්, මධ්‍යම කඳුකරයේ බටහිර බෑවුම් ප්‍රදේශවල සහ උතුරු, උතුරු මැද, බස්නාහිර, දකුණු සහ වයඹ පළාත්වලත් ත්‍රිකුණාමලය දිස්ත්‍රික්කයේත් විටින් විට හමන පැ.කි.මී. 50-60ක පමණ තද සුළං ඇතිවිය හැකිය.

දිවයිනේ සෙසු ප්‍රදේශවල විටින් විට හමන පැ.කි.මී 30-40 පමණ තරමක තද සුළං ඇතිවිය හැකි බව කාලගුණ විද්‍යා දෙපාර්මේන්තුව වැඩිදුරටත් නිවේදනය කරයි.

Continue Reading

පුවත්

“ලංකාවේ ලොකුම සන්ධානය අපි හදනවා”

Published

on

By

ඉදිරි මැතිවරණ ඉලක්ක කරමින් ශ්‍රී ලංකාවේ ලොකුම හා ශක්තිමත්ම සන්ධානය ශ්‍රී ලංකා නිදහස් පක්ෂය ප්‍රමුඛ කරගනිමින් ආරම්භ කරන බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පවසයි.

පාර්ලිමේන්තුව නියෝජනය කරන පක්ෂ ගණනාවක් මෙන්ම පාර්ලිමේන්තුව නියෝජනය නොකරන පක්ෂ ගණනාවක් දැනටමත් තම සන්ධානයට සහයෝගය පළ කර ඇති බව අමාත්‍යවරයා සඳහන් කරන්නේය.

එමෙන්ම විවිධ පක්ෂ නියෝජනය කරන පාර්ලිමේන්තු මන්ත්‍රීවරු රැසක් අම්බලන්තොට රැලියට ජුනි 8 වැනිදා සහභාගී වීමට නියමිතව ඇතැයි අමාත්‍ය මහින්ද අමරවීර මහතා පැවසීය.

Continue Reading
Advertisement

Trending

Copyright © 2023 Sri Lanka Mirror. All Rights Reserved