විශාල වෙළඳ ප්‍රචාරණයක් ලබාදෙමින් ව්‍යාපාරික අලි රාජා සුභාෂ්කරන් විසින් ආරම්භ කරන ලද ඔරුවන් දමිළ පුවත්පත මේවන විට වසා දැමීමට කටයුතු කර ඇතැයි මාධ්‍ය වාර්තා කර තිබේ.

ලයිකා සමූහ ව්‍යාපාරය යටතේ පවතින සවුත් අයි පෞද්ගලික සමාගම විසින් අදාළ පුවත්පත පවත්වාගෙන ගිය අතර හදිස්සියේම එහි සේවය කළ කර්තෘවරයා ඇතුළු පිරිසකගේ සේවය අවසන් කිරීමට එම සමාගම කටයුතුකරමින් සිටින බව පැවසේ.

එම සමාගම පාඩු ලබන බව පවසමින් මෙම තීරණය පිළිබඳව අදාළ ජනමාධ්‍යවේදීන්ට දැනුම්දී ඇත.

පසුගිය සතියේවල ලයිකා සමූහ ව්‍යාපාරයට අයත් ජනමාධ්‍ය ආයතන වෙනත් පාර්ශ්ව වෙත ලබාදෙන බවට පළ වූ වාර්තා සම්බන්ධයෙන් අනියත බියක් ඇති නොකර ගන්නා ලෙසට ප්‍රකාශ කර ඇති එහි මානව සම්පත් අංශය, ජනවාරි 28 වැනිදා සේවකයන් පෞද්ගලිකව ගෙන්වා ආයතනය ප්‍රතිව්‍යුහගතකරණය කිරීමට යන බව පවසා ස්වයං ඉල්ලා අස්වීමේ ලිපි ලබාදෙන ලෙසට ඉල්ලීමක් සිදු කර ඇති බවද වාර්තා වේ.

එලෙස සිදුකරන්නේ නම් මාසයක වැටුප වන්දියක් ලෙස දීමට කටයුතු කරන බව දැනුම්දී ඇත.

කෙසේවුවද, මේ තීන්දුවට එරෙහිව අදාළ මාධ්‍යවේදීන් විරෝධතා ව්‍යාපාරයක් ආරම්භ කරන බවට එහි පාලනාධිකාරියට දැනුම්දීමෙන් පසුව අද (03) දිනයේදී පාලානාධිකාරිය සමඟ සාකච්ඡාවකට එහි සේවකයන්ට ආරාධනා කර ඇතැයි වාර්තා වේ.

ඒ අනුව, ඔරුවන් දෙමළ ජාතික පුවත්පතේ සේවය කළ ජනමාධ්‍යවේදීන් 11 දෙනකු, ඔරුවන් වෙබ් අඩවිය සහ එහි යූ ටියුබ් නාලිකාවේ සේවය 05 දෙනකු, මොනරා වෙබ් අඩවියේ සහ යූටියුබ් නාලිකාවල සේවය කළ 12 දෙනකු ලෙස මේවන විට 28 දෙනකුගේ සේවය අවසන් කිරීමට කටයුතු කර ඇතැයි පැවසේ.

මේ අතර එම සමූහයට අයත් මොනරා පුවත්පතේ ජනමාධ්‍යවේදීන්ද සිය රැකියා පිළිබඳව සැකයෙන් පසුවෙති.

අදාළ සේවකයන් සේවය අවසන් කිරීම සම්බන්ධයෙන් ලිඛිතව දැනුම් දෙන ලෙසට සිදු කළ ඉල්ලීම ප්‍රථමයෙන් ප්‍රතික්ෂේප කළ මානව සම්පත් කළමනාකරණ අංශය අනතුරුව 30 වැනිදා පස්වරුවේ ලිපියක් ලබා දී තිබුණ ද එහි කිසිම ස්ථානයක සේවය අවසන් කරන බවට සඳහන් කර නැතැයි ද වාර්තා වේ.

එමෙන්ම ආයතන පාඩු ලබන බවට කළමනාකාරීත්වය ප්‍රකාශ කළ ද ලාභ ඉපයීම සඳහා ඔවුන් කිසිදු උත්සහයක් නොකළ බවත්, චේතනාන්විතව ආයතනය පාඩුවට පත්කිරීමට කටයුතු කළ බවත් එහි සේවයෝ චෝදනා කරති.

එමෙන්ම මේ වනවිට මොනරා වෙබ් අඩවිය සහ යූ-ටියුබ් නාලිකාවේ සේවකයන් භාවිත කළ පරිගණක අදාළ මේසවලින් ඉවත්කර වෙනම කාමරය දමා වසාදැමීමට කටයුතු කර ඇතැයි වාර්තා වේ.

ඔරුවන් පුවත්පත මුල් කාලයේදී පිටපත් 1500ක් මුද්‍රණය කර ඇතත්, එය වසා දැමීමට ආසන්න කාලයේදී මුද්‍රණය කර ඇත්තේ පිටපත් 900ක් පමණක් බවද පැවසේ.

කෙසේවුවද, එහි එක් පිටපතක් අලෙවි කරනු ලැබුවේ රුපියල් 40ක පමණ මුදලකට වුවත්, එහි එක් පිටපතක මුද්‍රණ වියදම රුපියල් 200ක් බවද පැවසේ.

මේ අතර, මුලින්ම දිනපතා මොනරා පුවත්පත පිටපත් 85,000ක් මුද්‍රණය කර ඇති අතර මේවන විට එය පිටපත් 35,000 දක්වා පහත වැටී ඇතැයි ද වාර්තා වේ.

සුභාෂ්කරන් අලිරාජාට අයත් පුවත්පත් ඇතුළු ජනමාධ්‍ය ආයතන වැසීයාම හා විකුණා දැමීමට මේවන විට කටයුතු සිදුවෙමින් තිබුණ ද අලිරාජා මහතාගේ දේශීය සම්බන්ධීකාරකවරිය ලෙස කටයුතු කරන නිලියක වන ජානකී විජේරත්න මහත්මිය තවදුරටත් අලිරාජා මහතාව ලංකාවේ ව්‍යාපාරික කටයුතුවලට සම්බන්ධ කිරීමට උත්සාහ ගනිමින් සිටින බව පැවසේ.

එසේම පසුගිය කාලයේදී ටෙලිකොම් හා ලංකා හොස්පිට්ල් හි කොටස් ගැනීමට සුභාෂ්කරන් උත්සාහ කළ අතර එය ව්‍යර්ථවූ පසු මේවන විට ඔහු එම ආයතන කොටස් විකිණීම අත්හිටුවීමට අධිකරණයේ නඩුවක් ද ගොනුකර තිබේ.

සබැඳි පුවත්

සුභාෂ්කරන් යළි ලංකාවට; පක්ෂයකුත් ගන්න ගිහින්; ටෙලිකොම් ගැන ජනපති එක්ක යළි කතා 

ටීවී, රේඩියෝ අල්ලාගත් අලිරාජා ටෙලිකොම් හා ලංකා රෝහලත් ගිලියි!

“රා” කියාගෙන සුභාෂ්කරන්ගේ මොණරා එයි

ETI දේපල විකුණා ඇත්තේ නීතියට පිටින්: ස්වර්ණවාහිනී ඩීල් එකත් ප්‍රශ්නගතයි 

ටෙලිකොම් ගන්න ඉන්න අලි රාජා ජනපතිව ලන්ඩනයේදී මුණගැහෙයි!

ටෙලිකොම්හි ෆයිබර් ඔප්ටික් කේබල් 5ත් වික්කම ලංකාවට අබ සරණයි

ටෙලිකොම් ඉන්දියාවට: අදානි,සුභාෂ්කරන් කාගේ හවුලක්ද?