සමස්ත දිවයිනම ආවරණය කරමින් ක්‍රියාත්මක කර තිබෙන පොලිස් වැටලීම් අනුව අධිකරණය මගින් වරෙන්තු නිකුත් වී සැඟව සිටි වරෙන්තුකරුවන්  2,561 දෙනෙකු මේ වනවිට අත්අඩංගුවට ගෙන ඇත.

ඊට අමතරව අපරාධවලට ඍජුව සම්බන්ධ පුද්ගලයන් 167 දෙනෙකු ද අත්අඩංගුවට ගෙන තිබෙන බව පොලීසිය පවසයි.

වැඩබලන පොලිස්පති ප්‍රියන්ත වීරසූරිය මහතාගේ උපදෙස් මත දිවයිනේ පොලිස් ස්ථාන 607ම සහ අනෙකුත් විශේෂ අංශයන් ඒකාබද්ධව මෙම මෙහෙයුම ක්‍රියාත්මක වේ.

අපරාධ වැළැක්වීම, මත්ද්‍රව්‍ය නිවාරණයන් සහ අපරාධ සඳහා ඍජුව සම්බන්ධබවට හදුනාගත් සැකකරුවන් අත්අඩංගුවට ගැනීමේ සඳහා ජනවාරි 12වනදා මෙම මෙහෙයුම ආරම්භ කළේය.

ඒ අනුව ගත වූ දින 10 තුළ සිදුකරන ලද කටයුතු වල ප්‍රගතිය පිළිබඳ පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා අද (22) පස්වරුවේ පැවති මාධ්‍ය හමුවකී මේ බව පැවසීය.

සමස්ත දිවයිනම ආවරණය වන පරිදි ක්‍රියාත්මක කර තිබෙන අපරාධ වැළැක්වීමේ මෙහෙයුම යටතේ පසුගිය ජනවාරි 12 සිට මේ දක්වා ගත වූ දින 10 තුළ පුද්ගලයන් පරීක්ෂා කිරීම් එක්ලක්ෂ 72,877 සිදුකර ඇත.

එහිදී ගිනි අවි 06ක් සිය භාරයට ගැනීමට පොලීසිය සමත්ව ඇත. ඒ අතර ටී-56 3ක් හා පිත්තෝල 3ක් වේ.

එමෙන්ම මත්ද්‍රව්‍ය නිවාරණය මෙහෙයුම යටතේ කේරල ගංජා කිලෝ 462ක්, 
හෂීශ් කිලෝ 15ක් හා අයිස් කිලෝ 8ක් පොලීසිය විසින් සිය භාරයට ගෙන ඇත.

මීට අමතරව වාහන 64,258ක් පරීක්ෂාකර ඇත.

මෙය සාමාන්‍ය රථවාහන නිලධාරීන් සිදුකරන රථවාහන මෙහෙයුම්වලට අමතරව සිදුකරන ලද මෙහෙයුම්ය.

වත්මන් ආණ්ඩුව විවිධ කතා කියමින් රටේ අනෙකුත් ප්‍රශ්න අමතක කරවීමේ උත්සාහයක නිරතව සිටින බව ජාතික නිදහස් පෙරමුණේ නායක විමල් වීරවංශ මහතා පවසයි.

බත්තරමුල්ලේ පිහිටි එම පක්ෂ මූලස්ථානයේ අද (22) පැවති ප්‍රවෘත්ති සාකච්ඡාවකට එක්වෙමින් ඔහු ඒ බව සඳහන් කළේය.

විමල් වීරවංශ මහතා මෙහිදී කියා සිටියේ ඩිජිටල් හැඳුනුම්පත සකස් කිරීම සඳහා ඉන්දියාව සමග කටයුතු කිරීම තුළින් මෙරට ජනතාවගේ දත්ත වෙනත් බාහිර පාර්ශ්වයන් අතට පත්වීමේ අවදානමක්ද පවතින බවය.

“ඩිජිටල් හැඳුනුම්පතක් ලංකාවට අනවශ්‍යයි කියන එක නෙමයි අපේ ස්ථාවරය. ඉන්දියානු සමාගමක් හරහා මෙය කරගැනීමට යෑමෙන් දතත් ඔවුන් අතට පත්වීම වළක්වන්න බැහැ. ඔවුන්ට රිස පරිද එම දතත්ත භාවිත කිරීම වළක්වන්නත් බැහැ.”

ප්‍රශ්නය – හිටපු ජනාධිපති මහින්ද රාජපක්ෂ මහත්තයාගේ නිල නිවස සම්බන්ධයෙන් ගැටලුකාරී තත්ත්වයක් මතුවෙලා තියෙනවා. ඔබතුමා ඉන්නේ මොනවිදියේ මතයකද ?

“මට නම් පෙන්නේ මේ ආණ්ඩුව කයි පාලනයක් විදිහට. ආපු දවසේ ඉඳලා තවම හිතන් ඉන්නේ විපක්ෂයේ කියලා. මොකක් හරි එකක් අල්ලගෙන කයි ටෝක් එකක් දෙනවා. ඒ කෙන් අනික් ප්‍රශ්න අමතක කරනවා. දැන් ඉන්දියාවත් එක්ක ගහන්න යන ගිවිසුම් ගැන ප්‍රශ්න අමතක කරනවා. එට්කා ගිවිසුම ගැන ප්‍රශ්න අමතක කරවනවා. කයි පාලනය ඇවිල්ලා කවුරු හරි හිටපු රාජ්‍ය නායකයෙක් ගේ නිල නිවස ගන්න එක, ආරක්ෂකයෝ අයින් කරන එක, අපි කවුරු කැමති වුණත්, නැතත් පිළිගන්න ඕනේ මහින්ද රාජපක්ෂ මේ රටේ අවදානමක් අරගෙන ත්‍රස්තවාදය පරාජයට පත්කළා. එහෙම පුද්ගලයෙකුට ජීවිත අවදානමක් නැහැ කියන්න බැහැ. තවදුරටත් කයි නොදී මේ රටේ තියෙන ගැටලුවලට උත්තර දෙන්න. නැත්නම් කයි පාලනයට වැඩිකල් දුවන්න වෙන එකක් නැහැ.”

පාර්ලිමේන්තු මන්ත්‍රීවරියන්ගේ සංසදය එහි සභාපති අමාත්‍ය සරෝජා සාවිත්‍රි පෝල්රාජ් මහත්මියගේ මුලිකත්වයෙන් ඊයේ (21) පාර්ලිමේන්තුවේදී රැස්විය.

මේ අවස්ථාව සමගින් සංසදයේ නියෝජ්‍ය සම සභාපතිවරුන් වන පාර්ලිමේන්තු මන්ත්‍රී නීතීඥ චමින්ද්‍රානි කිරිඇල්ල සහ ගරු පාර්ලිමේන්තු මන්ත්‍රී සමන්මලී ගුණසිංහ මහත්මින් ද සහභාගිවී සිටියහ.

මෙදින රැස්වීමේ මූලික අරමුණ වූ සංසදය සඳහා දසවන පාර්ලිමේන්තුවට අදාළ වන ක්‍රියාකාරී සැලැස්ම සකස් කිරීම සම්බන්ධයෙන් සංසදයේ සාමාජික
මන්ත්‍රීවරියන් සමඟ සාකච්ඡා කිරීම සම්බන්ධයෙන් අදහස් දක්වමින් සංසදයේ සභාපති අමාත්‍ය සරෝජා සාවිත්‍රි පෝල්රාජ් මහත්මිය විසින් ලංකාවේ විවාහවන වයස් සීමාව සංශෝධනය කිරීම පිළිබඳවද සංසදයේ අවධානය යොමු කරන ලදී.

ලංකාවේ දැනට පවතින විවිධ විවාහ නීති අනුව පවතින විවාහවන වයස් සීමාව පොදු වයස් සීමාවකට ගෙන ඒමට අවශ්‍ය සංශෝධන සකස් කිරීම සඳහා සිවිල් සංවිධාන සහ අදාළ පාර්ශ්වයන්ගේ යෝජනා ලබාගැනීමටත් ඒ ඔස්සේ අවසන් නිර්දේශ සංසදය මගින් සකස් කිරීමත් යෝජනා විය. එමෙන්ම “ළමයා” යන්න නිවැරදි ලෙස අර්ථකතනයක් ලබාදීමට අවශ්‍ය සංශෝධන සිදු කිරීමටද පාර්ලිමේන්තු මන්ත්‍රීවරියන්ගේ සංසදයේ අවධානය යොමු විය.

එමෙන්ම නවවැනි පාර්ලිමේන්තුව විසුරුවා හැරීමත් සමග කාන්තා අභිවෘද්ධිය නගා සිටුවීම සහ සවිබල ගැන්වීම වෙනුවෙන්  පාර්ලිමේන්තු මන්ත්‍රී රෝහිණි විජේරත්න මහත්මිය විසින් ඉදිරිපත්කළ සංශෝධන කළ යුතු කරුණු ඇතුළත් පනත් කෙටුම්පත් නැවත ඉදිරිපත් කිරීමටත් යෝජනා කෙරිණි. එමෙන්ම පාර්ලිමේන්තු මන්ත්‍රීවරියන්ගේ සංසදයේ හිටපු සභාපති  සුදර්ශිනී ප්‍රනාන්දුපුල්ලේ මහත්මිය විසින් ගෙන ආ පෞද්ගලික මන්ත්‍රී පනත් කෙටුම්පත් සඳහා වන සංශෝධන තව දුරටත් අධ්‍යනය කර ඒ සඳහා නව යෝජනා ඇතුළත් කරමින් නැවත පාර්ලිමේන්තුවට ඉදිරිපත්කිරීමට තීරණය විය. එම සංශෝධන සඳහා පාර්ලිමේන්තු මන්ත්‍රීවරියන්ගේ සංසදයේ සාමාජික මන්ත්‍රීවරියන්ට අදහස් හා යෝජනා ඉදිරිපත් කරන ලෙස සංසදයේ සභාපතිවරිය වැඩි දුරටත් පැවැසීය.

එමෙන්ම කාන්තාවන් සවිබල ගැන්වීම උදෙසා පාර්ලිමේන්තු මන්ත්‍රීවරියන්ගේ සංසදය විසින් ගත හැකි උපරිම ක්‍රියාමාර්ග ගැනීමට අවශ්‍ය කටයුතු
සිදුකිරීමට මෙම දසවැනි පාර්ලිමේන්තුව තුලින් බලපොරොත්තුවන බවද පාර්ලිමේන්තු මන්ත්‍රීවරියන්ගේ සංසදයේ සභාපතිවරිය මෙහිදී ප්‍රකාශ කලාය.

මේ අවස්ථාව සඳහා ගරු පාර්ලිමේන්තු මන්ත්‍රීවරියන් වන දීප්ති වාසලගේ, (නීතිඥ) තුෂාරි ජයසිංහ, ඔෂානි උමංගා, (ආචාර්ය) කෞශල්‍ය ආරියරත්න,
ක්‍රිෂ්ණන් කලෙයිචෙල්වී, (නීතිඥ) ගීතා හේරත්, (නීතිඥ) හිරුණි විජේසිංහ, (නීතිඥ) අනුෂ්කා තිලකරත්න, (නීතිඥ) සාගරිකා අතාවුද, එම්.ඒ.සී. එස්. චතුරි ගංගානි, නිලුෂා ලක්මාලි ගමගේ, ඒ. එම්. එම්. එම්. රත්වත්තේ, (නීතිඥ) නිලන්ති කොට්ටහච්චි, (නීතිඥ) හසාර ලියනගේ, අම්බිකා සාමිවේල්, (නීතිඥ)
ලක්මාලි හේමවන්ද්‍ර, යන මහත්මීහු ඇතුළු පිරිසක් එක්ව සිටියහ.