නිසි පරිදි ආහාර නොලැබීම නිසා පොලිස් අශ්වාරෝහක කොට්ඨාසයේ අශ්වයන් හත් දෙනෙකු හදිසියේ මියයාම පිළිබඳව මහජන ආරක්ෂක ඇමැති ටිරාන් අලස් මහතා පරීක්ෂණයක් ආරම්භ කර ඇතැයි වාර්තා වේ.
මෙම සත්වයන් හත්දෙනා මියයාම ගැන ඇමැතිවරයා පොලිස්පති සී.ඩී. වික්‍රමරත්න මහතාගෙන් කරුණු විමසා සිටියත් ඔහු ඇමැතිවරයා කියන තෙක් ඒ ගැන නොදැන ඇති බව මහජන ආරක්ෂක අමාත්‍යාංශයෙන් වාර්තා වේ.
පොලිස් අශ්වාරෝහක කොට්ඨාසයට ඇමරිකානු ඩොලර් තිස්පන්දහසක් බැගින් රුපියල් එක්කෝටි විසිනව ලක්ෂයක වියදමක් දරමින් මෙම අශ්වයෙකු ගෙන්වා ඇත.
ගෙන්වා ඇති අශ්වයන් හත්දෙනෙකු ආහාර හා නිසි පෝෂ්‍යපධාර්ත නිසි පරිදි නොලැබීමෙන් මියගොස් ඇති බවට මහජන ආරක්ෂක ඇමැතිවරයාට අනාවරණය වී තිබිණි.
ඒ සම්බන්ධයෙන් තොරතුරු ලද වහාම ඇමැතිවරයා විසින් මේ ගැන පරීක්ෂණයක් ආරම්භ කර තිබේ.
අශ්වාරෝහක කොට්ඨාසයේ අශ්වයන්ගේ ආහාර ඇතුළු සුබසාධන කටයුතු අධීක්ෂණය කිරීමේ වගකීම දරන උතුරු පළාත භාර ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය මහතාගේ මහජන ආරක්ෂක ඇමැතිවරයා මේ සම්බන්ධයෙන් විමසීමක් සිදුකර ඇත.
එහිදි අනාවරණය වී ඇත්තේ අශ්වයන්ගේ ආහාර ද්‍රව්‍ය සපයන සමාගම නිසි පරිදි ආහාර ද්‍රව්‍ය ලබා දී නොමැති බවය.
පසුගිය කාලයේ පැවති විශේෂ සැමරුම් උත්සව කිහිපයකටම මනා සෞඛ්‍ය තත්ත්වයේ පසුවූ තරුණ අශ්වයන් 23 දෙනෙකු වරින් වර ප්‍රවාහනය කර තිබෙන නමුත් සත්වයන්ගේ සෞඛ්‍ය තත්ත්වයට අනුව ඔවුන්ව ප්‍රවාහනය කර නොමැති බවද වාර්තා වී තිබේ.
එමෙන්ම අශ්වයන්ගේ සෞඛ්‍ය තත්ත්වය අධීක්ෂණය කිරීමේ වගකීමද පොලිස් නිල සුනඛයන්ගේ සෞඛ්‍ය තත්ත්වය අධීක්ෂණය කරන පශු වෛද්‍ය නිලධාරීවරයා බවද ඒ කෙරෙහි හෝ විශේෂ අවධානයක් පොලිස් ප්‍රධානින් යොමුකර නැති බවද මහජන ආරක්ෂක අමාත්‍යාංශයට අනාවරණය වී තිබේ.
මේ අතර, අශ්වයන් හත් දෙනෙකු මේ වසර තුළ මියගොස් ඇති බවද මේවන විට අනාවරණය වී ඇත.
ඔහු කියා සිටියේ අයහපත් සෞඛ්‍ය තත්ත්වයෙන් පසු වූ අශ්වයන් එලෙස මියගොස් තිබෙන බවය.
මීට පෙර වසරවලදි 16, 13, 09 දෙනෙකු වශයෙන් අශ්වයන් 38 දෙනෙකු මියගොස් තිබෙන බවත් පැවසේ.
