ශ්‍රී ලංකාවේ ජනාධිපති – රනිල් වික්‍රමසිංහ මහතා, අධ්‍යාපන අමාත්‍ය – සුසිල් ප්‍රේමජයන්ත මහතා, එක්සත් ජනපද තානාපති ජුලී චංග් මහත්මිය, සහ එ.ජ.-ශ්‍රී ලංකා ෆුල්බ්‍රයිට් කොමිෂන් සභාවේ අධ්‍යක්ෂ මණ්ඩලය, විධායක අධ්‍යක්ෂ හා කාර්යමණ්ඩලය ශ්‍රී ලංකාව සහ එක්සත් ජනපදය අතරේ ද්වි-ජාතීය ෆුල්බ්‍රයිට් හුවමාරු වැඩසටහන දියත් කර 70 වසරක් සම්පූර්ණ වීම ඊයේ (16) දිනයේදී සැමරූහ.

ඒ වෙනුවෙන් පැවැත්වූ රාත්‍රී භෝජන සංග්‍රහයට වත්මන් ශිෂ්‍යත්වධාරීන්, ආදිසිසුන්, ශාස්ත්‍රාලික උසස් නිලධාරීන්, සහ දශක හතක් මුළුල්ලේ වැඩසටහනට සහය දුන් අනෙකුත් අය සහභාගි වූහ.

එක්සත් ජනපදයෙන් අරමුදල් ලබා කොමිෂන් සභාව 1952 සිට ක්‍රියාත්මක කරන වැඩසටහන් හරහා අධ්‍යාපනය ලැබීමට, පශ්චාත් උපාධි ලැබීමට, ඉගැන්වීමට, පර්යේෂණවල නිරතවීමට, සහ වෘත්තීය සංවර්ධනය සඳහා 2000 ඉක්මවන ශ්‍රී ලාංකික සහ ඇමරිකානු සිසුන්, ශ්‍රාස්ත්‍රවේදීන්, ගුරුවරුන්, සහ වෘත්තිකයින් වෙත ඉඩ සැලසී තිබේ. උත්සවය අවස්ථාවේ අදහස් දක්වමින් චංග් තානාපතිතුමිය සඳහන් කළ පරිදි: “ෆුල්බ්‍රයිට් වැඩසටහන හරහා ශ්‍රී ලාංකිකයින් සහ ඇමරිකානුවන් දහස් ගණනකට අප දෙරටේ අධ්‍යාපනය ලැබීමේ හා ජීවත්වීමේ මාහැඟි අත්දැකීම ලබන්නටත්, දැනුම බෙදාහදා ගන්නටත්, වෘත්තීය සම්බන්ධතා සංවර්ධනය කරගන්නටත්, ජීවිත කාලය ම පවතිනා මිතුරු සම්බන්ධතා ඇති කරගන්නටත් අවස්ථාව සැලසී තිබෙනවා.”

දෙරටටම ප්‍රතිලාභ ගෙන දෙන දැනුම හුවමාරුව සහ වෘත්තීය සංවර්ධනය සංකේතවත් කළ ශ්‍රී ලංකාවේ සහ ඇමරිකානු වත්මන් ශිෂ්‍යත්වධාරීන් සහ ආදි ශිෂ්‍යයින් උත්සවයේ දී වික්‍රමසිංහ ජනාධිපතිතුමා, ප්‍රේමජයන්ත අධ්‍යාපන අමාත්‍යතුමා සහ චංග් තානාපතිතුමිය අතින් පැසසුමට පාත්‍ර වූහ.

එක්සත් ජනපදයේ ශාස්ත්‍රපති උපාධියක් සහ ආචාර්ය උපාධියක් ලබා නැවත පැමිණ ශ්‍රී ලංකා විශ්ව විද්‍යාලයක ජෛව ආරක්ෂණ විද්‍යාගාරයක් මෙහෙයවීම හරහා මෙරට ආහාර සුරක්ෂිතතාව සාක්ෂාත් කර ගැනීමේ හැකියාව ශක්තිමත් කරන තරුණ ශ්‍රී ලාංකික ජීව විද්‍යාඥවරියකගේ උදාහරණය තානාපතිනිය සිය අදහස් දැක්වීම තුළ සඳහන් කළාය. එසේම, පවතින ආර්ථික අර්බුදය නොතකා දැනට ශ්‍රී ලංකාවේ උපාධි අපේක්ෂකයින්ට ඉංග්‍රීසි ඉගැන්වීමේ නිරත වෙමින් ශ්‍රී ලංකාවේ සිටින ඇමරිකානු ගුරු සහායකවරියක සම්බන්ධයෙන් ද එතුමිය සඳහන් කළාය.

ෆුල්බ්‍රයිට් වැඩසටහනේ ශ්‍රී ලාංකික ඉතිහාසය තුළ ලබන්නට හැකි වූ ප්‍රතිලාභ සඳහා තවත් බොහෝ උදාහරණ තිබේ: සෞඛ්‍ය අමාත්‍යාංශයට අනුබද්ධව වැඩ කළ ජ්‍යෙෂ්ඨ ඇමරිකානු විද්වතෙක් සෞඛ්‍ය අධ්‍යාපන අංශයේ ශ්‍රී ලංකාවේ පළමු විද්‍යාපති උපාධිය සැලසුම් කිරීම; සහ ශ්‍රී ලාංකික විද්වතුන් දෙපලක් ආපසු ශ්‍රී ලංකාවට පැමිණි පසු තම ෆුල්බ්‍රයිට් අත්දැකීම් පදනම් කරගනිමින් ගෝලීය දේශපාලනය සහ ගැටුම් නිරාකරණය සම්බන්ධයෙන් පාඨමාලා හඳුන්වාදීම ඊට ඇතුළත් ය. ගෝලීය වශයෙන් ගත් කල, වත්මන් සහ හිටපු රාජ්‍ය නායකයින් 41 දෙනෙක් ද, නොබෙල් ත්‍යාගලාභීන් 62ක් ද ෆුල්බ්‍රයිට් ආදිසිසුන් වේ.

“ගෙවී ගිය වසර 70ක් මුළුල්ලේ සාර්ථකව දෙපසටම ගලාගිය සංස්කෘතික සහ ශ්‍රාස්ත්‍රඥ හුවමාරුවල සාර්ථකත්වය එ.ජ.-ශ්‍රී ලංකා ෆුල්බ්‍රයිට් කොමිෂන් සභාවේ හා එහි අධ්‍යක්ෂ මණ්ඩලයේ ඉමහත් වෑයමින් සහ ශ්‍රී ලංකා රජයෙන් ඊට ලැබුණු සහයෙන් සිදු වූ බවට සැකයක් නැහැ” යනුවෙන් සඳහන් කරමින් චංග් තානාපතිතුමිය කොළඹ පිහිටි ද්වි-ජාතීය ෆුල්බ්‍රයිට් කොමිෂන් සභාව සහ එහි කාර්යමණ්ඩලය අගය කිරීමට ලක් කළාය.

1952 දී දියත් කරන ලද, ශ්‍රී ලංකාවේ ආරම්භක ෆුල්බ්‍රයිට් වැඩසටහන හරහා කෙටි කාලීන ශාස්ත්‍රීය හුවමාරු සඳහා අනුග්‍රහය දැක්වූ අතර, වසර 12 කට පසුව, දෙරට අතර ස්ථිර ගිවිසුමක් බවට පත් කිරීම සඳහා එය පුළුල් කරන ලදී.

දැනට, ශ්‍රී ලංකාවේ ෆුල්බ්‍රයිට් වැඩසටහන සඳහා සම්පූර්ණයෙන් ම අරමුදල් සපයන්නේ එක්සත් ජනපද රජය විසින් වන අතර, ඒ හරහා දක්ෂ තරුණ විද්වතුන්ට උපාධි පාඨමාලා හැදෑරීමට ත්‍යාගශීලී ශිෂ්‍යත්ව සහාය ලබා දීම; විද්වතුන් සහ වෘත්තිකයන් හට ඉගැන්වීම සහ පර්යේෂණ පැවැත්වීම සඳහා සහාය ලබා දීම; සහ ගුරුවරුන්ට ඵලදායී පුහුණු ලබාදීම සඳහා මග සලසාලයි. තවද, එය ශ්‍රී ලංකා සහ ඇමරිකානු විශ්වවිද්‍යාල අතර සම්බන්ධතා දිරිමත් කරන අතර ශ්‍රී ලංකාවේ සහ ඇමරිකානු ජ්‍යෙෂ්ඨ විද්වතුන්ට ඒකාබද්ධ පර්යේෂණ සබඳතා වර්ධනය කර ගැනීමට අවස්ථාව සලසා දෙයි.