ඉන්දියාවෙන් ආනයනය කෙරෙන බිත්තර සඳහා  අනුමැතිය ලබාදීමේ ප්‍රමාදය වළක්වා, දින එක හමාරක් තුළදී කඩිනමින් අනුමැතිය ලබාදීමට කෘෂිකර්ම අමාත්‍යාංශය සහ වෙළෙඳ අමාත්‍යාංශය අතර පැවැති සාකච්ඡාවකදී තීරණය කර ඇතැයි වාර්ති වේ.

එසේම, ඉන්දියාවෙන් බිත්තර සපයා ගතහැකි තවත් ගොවිපොළවල් පිළිබඳ සොයා බැලීම සඳහා  කෘෂිකර්ම අමාත්‍යාංශයේ නිලධාරීන් දෙදෙනකු ද ඇතුළු කණ්ඩායමක් එරටට යැවීමටද මෙහිදී තීරණය කර තිබේ.

ඉන්දියාවේ කුරුළු උණ රෝගය නොමැති ගොවිපොළවල් තුනකින් බිත්තර ආනයනය කෙරෙන බවත්, මෙරට අවශ්‍යතාවට එම බිත්තර තොගය ප්‍රමාණවත් නොවන නිසා කුරුළු උණ නොමැති තවත් ගොවිපොළවල් කීපයක් පිළිබඳ සොයා බැලීමට මෙම නිලධාරීන් ඉන්දියාවට යවන බව කෘෂිකර්ම ඇමැති මහින්ද අමරවීර මහතා  කියා  සිටී.

මෙරටට බිත්තර සපයා ගන්නා  ඉන්දියාවේ ගොවිපොළවල ප්‍රමාණවත් පරිදි බිත්තර නොමැති බවද ඔහු පැවසීය.

රජයේ ප්‍රවෘත්ති දෙපාර්තමේන්තුවේ ඊයේ (11) පැවැති ප්‍රවෘත්ති සාකච්ඡාවකදී ඇමැතිවරයා මේ බව පැවසුවේය.

ඉන්දියාවෙන් දිනකට බිත්තර මිලියනය බැගින්වත් මාස තුනක කාලයකට ආනයනය කළහොත් මෙරට බිත්තර ගැටලුවට යම් විසඳුමක් ලැබෙන බවත්, එසේ වුවහොත් බිත්තර කර්මාන්තය වැඩිපුර සිදුකෙරෙන ප්‍රදේශ හැර රටේ අනෙකුත් ප්‍රදේශවල බේකරි කර්මාන්තකරුවන් සඳහා ද ආනයනික බිත්තර ලබාදීමට හැකි බවත් ඇමැතිවරයා  කීවේය.

කෙසේ නමුත්, තවත් මාස පහකට පමණ පසුව බිත්තරයක් දේශීය වෙළෙඳපොළේ රුපියල් 30 කට අලෙවි කළහැකි බවද ඇමැතිවරයා සඳහන් කළේය.

මෙරට දෛනික බිත්තර පාරිභෝජනය බිත්තර මිලියන හතක් වුවද දෛනික බිත්තර නිෂ්පාදනය මිලියන පහක් පමණ වේ.

සබැඳි පුවත්

ඉන්දියාවෙන් තවත් බිත්තර මිලියනයක්; දැන් ඩොලර් වියදම ලක්ෂ 3 පනියි 

නලින් සුදු බිත්තරේ 44ට, දුඹුරු බිත්තරේ 46ට ගැසට් කරයි 

නලින් ඉන්දියාවෙන් මාසෙකට ඩොලර් ලක්ෂ 18ක බිත්තර ගේන්න යයි!