පුවත්
උතුරේ ආයෝජනය කරන්න චීන ව්‍යවසායකයන් උනන්දුයි – තානාපති
උතුරු පළාතේ ආයෝජනය කිරීමට චීන ව්‍යවසායන් උනන්දුවක් දක්වන බව මෙරට සිටින චීන තානාපති – චී ජන්හොං මහතා ප්‍රකාශ කරයි.
තානාපතිවරයා මේ බව පවසා ඇත්තේ නොවැම්බර් 05 – 07 දින වලදී උතුරු පළාතේ ක්‍රියාත්මක වූ ෆාෂියාන් පුණ්‍යාධාර ව්‍යාපෘතියේ නවතම අදියරට එක්වෙමිනි.
චීනය විසින් ලංකාවට මුහුදු ආහාර අපනයනය කරන බවට පසුගියදා පළ වූ වාර්තාවක් සම්බන්ධයෙන්ද තානාපතිවරයා මෙහිදී අදහස් දැක්වූයේය.
පසුගිය මාසයේදී චීනයේ සාර්ථක සංචාරයක නිරත වූ ජනාධිපති වික්‍රමසිංහ මහතා, ශ්‍රී ලංකාවේ මුහුදු ආහාර චීනයට අපනයනය කිරීම සදහා පහසුකම් සැලසීමට චීන ජනාධිපති ෂී ජින්පිං මහතා හා එකඟත්වයට පැමිණි බවද තානාපතිවරයා මෙහිදී සඳහන් කළේය.
“විශාල වෙළෙඳපොළක් සහිත චීනය ලොව දෙවැනි විශාලතම ආර්ථිකය ඇති රටයි. ඔබලාට මුහුදු ආහාර අපනයනය කිරීම වෙනුවට අප බලාපොරොත්තු වන්නේ ශ්‍රී ලංකාවෙන් මුහුදු ආහාර වැඩියෙන් චීනයට ආනයනය කිරීමටයි. උතුරු පළාතේ ආයෝජනය කිරීමට චීන ව්‍යවසායකයන් උනන්දුවක් දක්වන අතර, ඔවුන්ව පිළිගෙන ඔවුන්ට සහයෝගය ලබාදෙනු ඇතැයි මා බලාපොරොත්තු වෙනවා,” යැයි චීන තානාපතිවරයා වැඩිදුරටත් පැහැදිළි කළේය.
චීන – ශ්‍රී ලංකා මිත්‍ර සබඳතා අවධාරණය කරමින් චීන තානාපතිවරයා වැඩිදුරටත් සඳහන් කළේ, චීන රජය විසින් උතුරු පළාතට ආහාර සලාක, ධීවර දැල් මිලදී ගැනීමට සහ නිවාස ඒකක ඉදිකිරීමට රු. මිලියන 150ක ආධාර ලබාදීමට පොරොන්දු වී ඇති බවයි.
චීන බෞද්ධ සංගමය විසින් ක්‍රියාත්මක කරන මෙම ෆාෂියාන් පුණ්‍යාධාර ව්‍යාපාරයේ නවතම අදියර යටතේ රු. මිලියන 37.5ක් වටිනා වියළි සලාක සහිත පෙට්ටි 5,000ක් යාපනය, වව්නියාව, මුලතිව්, කිලිනොච්චි සහ මන්නාරම යන ප්‍රදේශවල ආර්ථික අපහසුතාවෙන් පෙළන පවුල් අතර බෙදා දෙනු ලැබීය.
දිස්ත්‍රික් ලේකම් කාර්යාලවල මෙන්ම, බෞද්ධ විහාරස්ථානවල, කෝවිල් හා පල්ලි වල මෙලෙස පරිත්‍යාග උත්සව 10ක් පැවැත්විණි.
මෙය, චීන තානාපතිවරයා විසින් උතුරු පළාතේ සිදුකළ දෙවැනි සංචාරයයි.
(ඡායා : චීන තානාපති කාර්යාලයේ X පිටුවෙනි)
හිටපු ජනාධිපති ගැන අපහාසාත්මක දුස්තොරතුරු රැසක්
අල්ලස් කොමිසමේ අධ්‍යක්ෂ ජනරාල්වරයා ඉල්ලා අස්වෙයි
