උසස් අධ්‍යාපනය ලැබීමට මුදල් සොයාගැනීම සඳහා ගණිකා වෘත්තියේ නිරතව සිටි රූමත් තරුණියන් 14දෙනෙකු ඇතුළු පුද්ගලයන් 18දෙනෙකු තලංගමදී අත්අඩංගුවට ගත් බව පානදුර, වලාන මධ්‍යම දූෂණ මර්දන ප්‍රහාරක බළකාය පවසයි.
මෙලෙස අත්අඩංගුවට ගෙන ඇත්තේ, වයස අවුරුදු 20 හා 30 අතර පසුවන තරුණියන් පිරිසක් සහ එම ස්ථානවල කළමනාකරුවන් ලෙස සිටි පුද්ගලයන් පිරිසකි.
අදාළ තරුණියන් පිරිස කොළඹින් දුර බැහැර ප්‍රදේශවල පදිංචි පිරිස් බවද එම බළකාය පවසා සිටියි.
කාන්තාවන් මුදලට අලෙවි කිරීමේ මධ්‍යස්ථාන තලංගම පොලිස් බලප්‍රදේශය තුළ වර්ධනය වෙමින් තිබෙන බවට පානදුර වලාන මධ්‍යම දූෂණ මර්දන ප්‍රහාරක බළකායේ අධ්‍යක්‍ෂ, සහකාර පොලිස් අධිකාරී උදයකුමාර මහතාට ලද තොරතුරක් මත සිදු කළ වැටලීමකදී සැකකරුවන් අත්අඩංගුවට ගැනීම සිදුකළ බව ස්ථානාධිපති, ප්‍රධාන පොලිස් පරීක්‍ෂක ඉන්දික වීරසිංහ මහතා පැවසීය.
මේ සම්බන්ධයෙන් කඩුවෙල මහේස්ත්‍රාත් අධිකරණයෙන් ලබාගත් සෝදිසි වරෙන්තුවක් අනුව පොලිස් නිලධාරීන් පිරිසක් තරුණියන් මිලදී ගන්නා පුද්ගලයන් සේ වෙස් වළාගෙන තරුණියන් අලෙවි කරන මධ්‍යස්ථාන හතරක් වෙත ගොස් ඉතා සූක්‍ෂම අයුරින් ලබාදුන් රහසිගත සංඥාවක් අනුව මෙම වැටලීම් සිදුකර තිබිණි.
එම ස්ථාන හතර වටලා අත්අඩංගුවට ගත් තරුණියන්ගෙන් සිදුකළ ප්‍රශ්න කිරීමේදී පවතින ආර්ථික අපහසුකම් හේතුවෙන් උසස් අධ්‍යාපනය සිදුකර ගැනීමට නොහැකි බැවින් ඒ සඳහා මුදල් උපයා ගැනීමේ අරමුණින් අකමැත්තෙන් වුවත්, මෙම රැකියාව තෝරාගත් බව හඬා වැටෙමින් සඳහන් කළේ යැයි වැටලීම සිදුකළ පොලිස් නිලධාරියෙක් පැවැසීය.
එසේම කොළඹ ප්‍රධාන පෙළේ ආයතනවල උසස් රැකියාවල නිරත වන බවට තමන් මවුපියන්ට හා ඥාතීන් පවසා තිබීම හේතුවෙන් මේ බව නිවෙස්වලට නොදන්වන ලෙස අදාළ තරුණියන් බැගෑපත්ව ඉල්ලා සිටි බවද පැවසේ.
