මෝටර් රථ ප්‍රවාහන දෙපාර්තමේන්තුවේ මුද්‍රණය කිරීම සඳහා ගොඩ ගැසී ඇති රියැදුරු බලපත් ප්‍රමාණය ලක්ෂ නවය ඉක්මවා ඇති බව වාර්තා වේ.
කාඩ්පත් හිඟය හා ප්‍රමාණවත් යටිතල පහසුකම් නොමැති වීම හේතුවෙන් මෙම තත්ත්වය උදාවී ඇති බව මෝටර් රථ ප්‍රවාහන දෙපාර්තමේන්තුව පවසයි.
විදේශ විනිමය හිඟය හේතුවෙන් මීට වසරකට පෙර රියැදුරු බලපත්‍ර මුද්‍රණය කිරීමට කාඩ්පත් ගෙන්විය නොහැකි වූ නමුත් පසුව කාඩ්පත් ලක්ෂ 10 ක් ඔස්ට්‍රියාවෙන් ආනයනය කිරීමට පියවර ගැනිණි.
සුහුරු චීපය(Smart Chip) සහිත කාඩ්පත් ලක්ෂ පහක් සහ කිව් ආර් කේතාංකය සහිත කාඩ්පත් ලක්ෂ පහක් වශයෙන් අදාළ කාඩ්පත් ගෙන්වනු ලැබීය.
නමුත් මෝටර් රථ ප්‍රවාහන දෙපාර්තමේන්තුවේ වේරහැර රියැදුරු බලපත් කාර්යාලයේ යන්ත්‍ර දෙකක් පමණක් යෝග්‍ය තත්ත්වයේ පැවතීම නිසා දිනකට මුද්‍රණය කළ හැකි කාඩ්පත් ගණන දෙදහසකි.
මේ වනවිට චීපය සහිත කාඩ්පත් ලක්ෂ පහම මුද්‍රණය කර අවසන් බැවින් කිව් ආර් කේතාංකය සහිත කාඩ්පත් මුද්‍රණය කිරීම පෙරේදා (16 වැනිදා) සිට ආරම්භ විය.
කෙසේවෙතත් තවත් මුද්‍රණ යන්ත්‍ර තුනක් මේ මාසයේදී ලැබීමට නියමිත හෙයින් දිනකට රියැදුරු බලපත්‍ර හයදහසත් හත්දහසත් අතර සංඛ්‍යාවක් ලබන මාසයේ සිට මුද්‍රණය කිරීමට අපේක්ෂා කරන බව මෝටර් රථ ප්‍රවාහන කොමසාරිස් ජනරාල් නිශාන්ත අනුරුද්ධ වීරසිංහ සඳහන් කළේය.
මේ අනුව දැනට ගොඩ ගැසී ඇති සියලුම ඉල්ලුම්කරුවන්ගේ රියදුරු බලපත් මාස හයකින් ලබාදීමට බලාපොරොත්තු වන බවද කොමසාරිස් ජනරාල්වරයා සඳහන් කළේය.
එමෙන්ම දැනට තාවකාලික රියැදුරු බලපත්‍ර නිකුත් කර සිටින අයගේ බලපත්‍ර කල් ඉකුත් වී ඇත්නම් හෝ රිය බලපත් කාඩ්පත මෙතෙක් හමුවී නැති නම් මෝටර් රථ ප්‍රවාහන දෙපාර්තමේන්තු වේරහැර කාර්යාලයෙන් හෝ දිස්ත්‍රික් කාර්යාලවලින් ඒවායේ කාලය දීර්ඝ කරගත හැකි බවද එම දෙපාර්තමේන්තුව සඳහන් කර සිටියි.
