තිළිණි ප්‍රියමාලි ළඟ මත්කුඩු ජාවාරම්කරුවන්ගේ මුදල් ද කෝටි ගණනක් තිබී ඇති බව බුද්ධි අංශ මඟින් කළ සොයා බැලීම්වලදී අනාවරණය වී ඇතැයි වාර්තා වේ.
ඒ අය අතර ඩුබායිහි රැඳී සිටින මත්කුඩු ජාවාරම්කරුවන් කිහිපදෙනකු සහ එංගලන්තයේ රැඳී සිටින මත්කුඩු ජාවාරම්කරුවකුගේ මුදල් ඇති බව ද පෙනීගොස් ඇතැයි පැවසේ.
මෙසේ කුඩු ජාවාරම්කරුවන්ගේ මුදල් තිළිණිට දී ඇත්තේ එම කුඩු සල්ලි උණ්ඩියල් ක්‍රමයට රටින් පිට කරන ජුවලරි සාප්පු හිමිකරුවන් පිරිසක් බවට ද තොරතුරු අනාවරණය වී තිබේ.
කුඩු සල්ලි දෙගුණ කිරීමට ගොස් මුදල් අහිමි කර ගත් ඒ කිසිවකුත් මෙතෙක් අපරාධ පරීක්ෂණ දෙපාර්තමේන්තුව හමුවේ පැමිණිලි කර නැතැයි ද පැවසේ.
අහිමි වූ මුදල් ඉල්ලා මේ වන විට එම මුදල් තිළිණිට දුන් ජුවලරි සාප්පු හිමියන්ට තර්ජන එල්ල වෙමින් පවතින බවද බුද්ධි අංශ වෙත ලැබී ඇති තොරතුරුවල සඳහන්ය.
අපරාධ පරීක්ෂණ දෙපාර්තමේන්තුව සඳහන් කරන්නේ තිළිණිට එරෙහිව මෙතෙක් ලැබී ඇත්තේ පැමිණිලි 12ක් පමණක් බවය.
ඇයට මුදල් දී කෝටි ගණනක් අහිමි කර ගත් 100ක් පමණ හඳුනාගෙන ඇතත් ඒ කිසවකුත් ඇයට එරෙහිව පැමිණිලි නොකරන බවත් ඒ අය පැමිණිලි කිරීමට මැළිකමක් දක්වන බවත් උසස් පොලිස් නිලධාරියෙක් සඳහන් කළේය.
“අපිට බලෙන් බැහැ කාගෙන්වත් පැමිණිලි ලියාගන්න.” යැයි ද එම නිලධාරියා කීවේය.
ඇයට මුදල් කෝටි ගණනින් දී මුදල් අහිමි කරගෙන සිටින එහෙත් මෙතෙක් ඒ ගැන කිසිදු පැමිණිල්ලක් කිරීමට ඉදිරිපත් වී නැති අය අතර නිළියන් දෙදෙනකු සහ දේශපාලනඥයන් දෙදෙනකු සිටින බව අපරාධ පරීක්ෂණ දෙපාර්තමේන්තු තොරතුරු සඳහන් කළේය.
තිළිණි විසින් වංචා කර රැස්කර ගෙන ඇති මුදල් ඇය විසින් සඟවා ඇති බව අපරාධ පරීක්ෂණ දෙපාර්තමේන්තුව විශ්වාස කරයි.
මෙතෙක් එම මුදල් සඟවා ඇති තැනක් ගැන කිසිදු තොරතුරක් සොයා ගැනීමට හැකියාවක් ලැබී නැත.
ඇය මේ මුදල් තුන්වැනි පාර්ශ්වයක් ළඟ සඟවා ඇතැයි අපරාධ පරීක්ෂණ දෙපාර්තමේන්තුව විශ්වාසය පළ කරයි.
ඇය විසින් සිය බැංකු ගිණුමේ තැන්පත් කර තිබුණු රුපියල් කෝටි 300ක මුදලක් අත්ටහිටුවීමට මාස 6කට පෙර බැංකුවෙන් ඉවත් කරගෙන ඇති බවත් එම මුදල් බැර කළ ආකාරයක් ගැන කිසිදු තොරතුරක් සොයා ගන්නට නැති බවත් අපරාධ පරීක්ෂණ දෙපාර්තමේන්තුව සඳහන් කරයි.
ඇගේ මේ වංචාවට සහාය දුන්නේ යැයි කියනු ලබන සමාගම් අධ්‍යක්ෂවරියක් සම්බන්ධයෙන් ද අපරාධ පරීක්ෂණ දෙපාර්තමේන්තුව පුළුල් විමර්ශනයක් පවත්වයි.
