කොටුව මහේස්ත්‍රාත් කෝසල සේනාධීර මහතාගේ සේවය අධිකරණ සේවා කොමිෂන් සභාව විසින් තාවකාලිකව අත්හිටුවා ඇතැයි වාර්තාවේ.

කෝසල සේනාධීර මහතා ගල්කිස්ස මහේස්ත්‍රාත් ධූරය දැරූ සමයේ ගල්කිස්ස මහේස්ත්‍රාත් අධිකරණයට ලබාදී තිබූ විදුලි සැපයුමට නීතිවිරෝධී ලෙස ඔහුගේ නිල නිවසට ලබා ගෙන ඇති බවට ලැබුණු පැමිණිල්ලකට අදාළව අධිකරණ සේවා කොමිසමේ විමර්ශනයක් අවසන් වීමෙන් පසුව මෙසේ මහේස්ත්‍රාත්වරයාගේ වැඩ තහනම් කිරීමට පියවර ගෙන තිබේ.

පැමිණිල්ල සම්බන්ධයෙන් කළ මූලික විමර්ශනයේදී අධිකරණ සේවා කොමිසම සාක්ෂිකරුවන් 20 දෙනෙකුගෙන් සාක්ෂි සටහන් කරගෙන තිබූ බවද පැවසේ.

සාක්ෂිකරුවන් අතර මහාධිකරණ විනිසුරුවරුන් දෙදෙනෙකු මෙන්ම ලංකා විදුලිබල මණ්ඩලයේ සහ ජාතික ජල සම්පාදන හා ජලාපවහන මණ්ඩලයේ නිලධාරීන්ද ඇතුළත්ව සිට ඇත.

සේනාධීර මහතා දැනට කොළඹ කොටුව මහේස්ත්‍රාත්වරයා ලෙස කටයුතු කරයි. 

සේනාධීර මහතාගේ වැඩ තහනම් කිරීමෙන් පසු වහාම ක්‍රියාත්මක වන පරිදි කොළඹ කොටුවේ නව මහේස්ත්‍රාත්වරිය ලෙස නුගේගොඩ මහේස්ත්‍රාත් තනුජා ජයසිංහ පත් කර තිබේ. 

මේ අතර ජයසිංහ මහත්මිය කොටුව මහේස්ත්‍රාත්වරයා ලෙස පත්වීමෙන් පසු ඇති වූ පුරප්පාඩුව සඳහා මහේස්ත්‍රාත් රුවනි ජයවර්ධන මහත්මිය නුගේගොඩ මහේස්ත්‍රාත්වරිය ලෙස පත් කර තිබේ.