Connect with us

පුවත්

කොළඹ, හම්බන්තොට, ත්‍රිකුණාමලය සහ යාපනය සිව් මහ නගර වෙයි

Published

on

භෞතික සම්පත් සංවර්ධනය සදහා සිව්මහ නගර ලෙස කොළඹ, හම්බන්තොට, ත්‍රිකුණාමලය සහ යාපනය නගර හදුනා ගෙන ඇතැයි වාර්තා වේ.

එම නගර යා කරමින් ආර්ථික කොරිඩෝ 9 ක් ද හදුනා ගෙන ඇතැයි නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පවසයි. 

ඔහු පෙන්වා දෙන්නේ මෙම නගර සංවර්ධන කටයුතු කඩිනම් කිරීම සදහා අවශ්‍ය උපදෙස් අදාළ අංශ වෙත ලබා දී ඇති බවයි.

මෙරට ප්‍රධාන වාණිජ හා මූල්‍ය නගරය ලෙස කොළඹ නගරය හදුනා ගෙන තිබේ. 

ඉදිරි වසර 8 සදහා කොළඹ නගර සංවර්ධන සැලැස්ම නාගරික සංවර්ධන අධිකාරිය දැනටමත් ගැසට් මගින් ප්‍රකාශයට පත්කර ඇත. 

ඒ යටතේ කිරිමණ්ඩල මාවත නගර සංවර්ධන ව්‍යාපෘතිය හා නාගරික පුනර්ජීවන නිවාස ව්‍යාපෘති දැනමටත් ක්‍රියාත්මක කර තිබේ.

බොරැල්ල නගර සංවර්ධන සැලසුම සකස් කරමින් පවතින බවද වාර්තා වේ.

හම්බන්තොට නගරය සංවර්ධනය කිරීම සදහා සැකසුනු හම්බන්තොට විසල් නගර සංවර්ධන සැලැස්ම යාවත්කාලීන කිරීමට නියමිත බවද පැවසේ. 

එම සැලැස්ම යටතේ හදුනා ගන්නා ලද ජාත්‍යන්තර සම්මන්ත්‍රණ ශාලාව, වරාය, මත්තල ගුවන්තොටුපල, වියළි කලාපීය උද්භිද උද්‍යානය සහ පරිපාලන සංකීර්ණය මේ වන විටත් ඉදිකර අවසන්ව තිබේ. 

නව ව්‍යාපෘති ලෙස බැංකු කලාපීය ව්‍යාපෘතිය සහ රෝහල් චතුරස්‍ර සංවර්ධන ව්‍යාපෘතිය ඉදිරියේදී ක්‍රියාත්මක කිරීමට නියමිතය.  

ත්‍රිකුණාමල නගරය ප්‍රධාන වාණිජ නගරයක් ලෙස හදුනා ගෙන පළාත් පාලන ආයතන කිහිපයක් ඇතුලත් වන පරිදි ත්‍රිකුණාමලය නගර සංවර්ධන සැලැස්ම සැකසීම මේ වන විට ආරම්භ වී තිබේ. 

ඒ අනුව ත්‍රිකුණාමලය වරාය සංවර්ධනය, තෙල් පර්යන්තය සංවර්ධනය සහ කප්පල්තුරේ කර්මාන්ත කලාපය සංවර්ධනය කිරීමට අපේක්ෂිතයි. ඊට අදාලව අදාල ආයතන සමග සාකච්ඡා කර සැලසුම් සකස් කිරීමට කටයුතු යොදා තිබේ.

යාපනය අර්ධද්වීපය සදහා ද සංවර්ධන සැලැස්මක් මේ වන විට සැකසෙමින් පවතින බව ඇමති ප්‍රසන්න රණතුංග මහතා කියයි. මේ යටතේ කන්කසන්තුරේ නගර සංවර්ධනය, වරාය සංවර්ධනය, පලාලි ගුවන්තොටුපල පහසුකම් පුළුල් කිරීම, කර්මාන්ත හා තොරතුරු තාක්ෂණ සංවර්ධනය හා මිශ්‍ර සංවර්ධන ව්‍යාපෘති කිහිපයක්ද ක්‍රියාත්මක කිරීමට අපේක්ෂිතයි.  

මෙම සිව්මහ නගර සංවර්ධන ව්‍යාපෘති වලට සමගාමීව දඹුල්ල, නුවර හා ගාල්ල සංවර්ධන කටයුතු ද ආරම්භ කර තිබේ. ගාල්ල සංවර්ධන සැලැස්ම ඒ යටතේ ගැසට් මගින් දැනටමත් ප්‍රකාශයට පත් කර තිබේ. ගාල්ල කොටුව තැපැල් කාර්යාලය ප්‍රතිසංවර්ධනය කිරීම, ඕලුවාගොඩ පාරිසරික කෘෂිකාර්මික සංවර්ධන ව්‍යාපෘතිය සහ ගාල්ල මධ්‍යයේ මිශ්‍ර සංවර්ධන ව්‍යාපෘතිය ද දැනටමත් ක්‍රියාත්මකයි.

නුවර සංවර්ධනය යටතේ බෝගම්බර සංචාරක හා සංස්කෘතික සංවර්ධන මධ්‍යස්ථානය, ගැටඹේ මධ්‍යම පාන්තික නිවාස සංකීර්ණය, කටුගස්තොට තොග වෙළද මධ්‍යස්ථාන සංවර්ධන ව්‍යාපෘතිය, ගන්නෝරැව අධ්‍යාපනික කේන්ද්‍රගත සංවර්ධන ව්‍යාපෘති සහ තවත් මිශ්‍ර සංවර්ධන ව්‍යාපෘති කිහිපයත් හදුනා ගෙන තිබේ.

දඹුල්ල සංවර්ධන සැලසුම ලබන වසරේ මුල් කාර්තුව තුළ ගැසට් කිරීමට නියමිතයි. මේ යටතේ බහුවිධ ප්‍රවාහන මධ්‍යස්ථානය, සීගිරිය සංචාරක සංවර්ධන ව්‍යාපෘතිය, දඹුල්ල ඉනාමළුව සීගිරිය හරහා හබරණ දක්වා ප්‍රවේශ මාර්ගය සංවර්ධනය කිරීම, හබරණ සංචාරක සංවර්ධන ව්‍යාපෘතිය, ගලේවෙල විකල්ප මාර්ග ව්‍යාපෘතිය සහ නාවුල මහජන ක්‍රීඩාංගනය නවීකරණය කිරීම සිදු කෙරෙනු ඇත.

ඇමති ප්‍රසන්න රණතුංග මහතා පවසන්නේ පවතින ආර්ථික තත්ත්වය මත තාවකාලිත පසුබෑමකට ලක්ව ඇති මෙවැනි මහා පරිමාණ ව්‍යපෘති ලබන වසර තුළ කඩිනම් කරන බවයි. ඒ සදහා මහා භාණ්ඩාගාරය සමග සාකච්ඡා කර ඇති බවත්, ඊට ජනාධිපතිවරයාගේද එකගත්වය පළව ඇති බවත් ඇමති ප්‍රසන්න රණතුංග මහතා වැඩිදුරටත් කියා සිටී.

(ලංකාදීප)

පුවත්

තවත් පිරිසක් සජබය සමඟ එක්වේ

Published

on

By

ශ්‍රී ලංකා නිදහස් පක්ෂයේ සහ ජනතා විමුක්ති පෙරමුණේ ප්‍රාදේශීය සංවිධායකවරුන් කිහිප දෙනෙකු විපක්ෂ නායක සජිත් ප්‍රේමදාස මහතා හමු වී සමගි ජන බලවේගය සමග එක්වී තිබේ. 

ඒ සමගි ජන බලවේගය විසින් ක්‍රියාත්මක ජන පවුර වැඩසටහනේ පොළොන්නරුව දිස්ත්‍රික් රැස්වීම පැවැති අවස්ථාවේදී ය.

හිටපු පාර්ලිමේන්තු මන්ත්‍රීවරයකු සහ හිටපු අමත්‍යවරයකු වූ නන්දසේන හේරත් මහතා විපක්ෂ නායක සජිත් ප්‍රේමදාස මහතාට සහාය පළ කිරීමේ අරමුණින් සමගි ජන බලවේගය හා එක්විය.

එමෙන්ම ශ්‍රී ලංකා නිදහස් පක්ෂයේ හිටපු පාර්ලිමේන්තු මන්ත්‍රීවරයකු මෙන් ම මහවැලි සංවර්ධන අධිකාරියේ අධ්‍යයක්ෂවරයකු ලෙස කටයුතු කළ තිලක් මහලේකම්ගේ මහතා ද සමගි ජන බලවේගය හා එක්විය.

තවද ජනතා විමුක්ති පෙරමුණේ පොළොන්නරුව නගර සභාවේ අපේක්ෂකයෙකුව සිටි එච්. සමන්ත බණ්ඩාර මහතා ද විපක්ෂ නායක සජිත් ප්‍රේමදාස මහතාට සහාය පළ කිරීමේ අරමුණින් සමගි ජන බලවේගය හා එක්විය.

Continue Reading

පුවත්

ලෝක ප්‍රසිද්ධ සුරතලා මිය යයි

Published

on

By

ක්‍රිප්ටෝ මුදල් ඒකකයක් වන ඩොජ්කොයින්හි සංකේතය වන සුනඛ මුහුණට හිමිකම් කියන කබොසු සුනඛයා මිය ගොස් තිබේ.

ෂීබා ඉනූ සුනඛ වර්ගයට අයත් කබොසු ලියුකේමියාව හේතුවෙන් මියගොස් ඇත.

එම සුරතලාගේ හිමිකරු වන්නේ ජපානයේ ගුරුවරයෙකි.

Continue Reading

පුවත්

අපිරිසිදු දන්සල් 20කට නීතිමය ක්‍රියාමාර්ග

Published

on

By

දිවයින පුරා පවත්වනු ලැබූ දන්සල් 20,000ක් පරීක්ෂාවට ලක්කළ බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ විධායක සාමාජික සඳුන් හේමන්ත රත්නායක මහතා පවසයි.

එහිදී අපිරිසිදු තත්ත්වයේ පවත්වාගෙන ගිය දන්සැල් 20කට එරෙහිව නීතිමය ක්‍රියාමාර්ග ගත් බව සඳුන් හේමන්ත රත්නායක මහතා විසින් පවසන ලදී.

කොළඹ නගර සීමාවේ දන්සැල් 4000ක් පරීක්ෂාවට ලක් කර ඇති අතර , එයිනුත් අපිරිසිදු තත්ත්වයේ තිබූ දන්සැල් 5කට එරෙහිව නීතිමය ක්‍රියාමාර්ග ගත් බවයි සඳහන් වේ.

මෙහිදී බත්, ෆ්‍රයිඩ් රයිස්, කොත්තු, සීනි සම්බල් පාන්, කඩල, මඤ්ඤොක්කා, බීම දන්සල් පරීක්ෂාවට ලක්කර ඇත.

ඒ සඳහා මහජන සෞඛ්‍ය පරීක්ෂකවරුන් 1800ත් 2000ත් අතර පිරිසක් සහභාගී වූ බව සඳහන් වේ.

දන්සැල් පරීක්ෂාව ලබන 27 වැනිදා දක්වා ක්‍රියාත්මකයි.

Continue Reading

Trending

Copyright © 2023 Sri Lanka Mirror. All Rights Reserved