රුපියල් කෝටි 17 කට අධික විශේෂ වෙළෙඳ භාණ්ඩ බදු මුදල් ගෙවීම පැහැර හරින ලදැයි ප්‍රධාන පෙළේ සීනි ආනයන සමාගමක් වන පිරමීඩ් විල්මා පුද්ගලික සමාගමට (Pyramid Wilmar (Pvt) Ltd) එරෙහිව ශ්‍රී ලංකා රේගුව විසින් කොළඹ ප්‍රධාන මහෙස්ත්‍රාත් අධිකරණය හමුවේ ඊයේ (17) නඩු පවරන ලදී.

ශ්‍රී ලංකා රේගු අධ්‍යක්ෂ ජනරාල් පී.බී.එස්.සී. නෝනිස් මහතා විසින් අංක බී. 22752/06 යටතේ එම නඩුව කොළඹ ප්‍රධාන මහෙස්ත්‍රාත් අධිකරණය හමුවේ ඊයේ පවරා තිබිණි.

විශේෂ වෙළෙඳ භාණ්ඩ බද්ද හිඟ මුදල වන රුපියල් දාහත්කෝටි තිස්අටලක්ෂ තිස්අටදහස් හයසිය තිහක (173,838,630) මුදල ගෙවීම පැහැර හැරීම සම්බන්ධයෙන් මෙම නඩුව පවරා ඇත.

සීනි බදු අඩු කිරීමේ වාසිය ජනතාවට ලබා නොදුන් බව කියමින්, සීනි බද්ද අඩු කිරීම මගින් රජයට අහිමි වූ බදු ආදායම, එම වාසිය ලබාගත් පාර්ශවයන්ගෙන් නැවත අය කර ගත යුතු බවට ජාතික විගණන කොමිසම, රජයට නිර්දේශ කර තිබුණේද අදාළ සමාගම සම්බන්ධයෙනි.

එම කොමිසම මෙම නිර්දේශය කර තිබුණේ සීනි කිලෝග්‍රෑම් එකක් සඳහා පනවා තිබු විශේෂ වෙළෙඳ භාණ්ඩ බද්ද රුපියල් 50 සිට ශත 25ක් දක්වා අඩු කිරිමෙන් බලාපොරොත්තු වූ සහනය පාරිභෝගික ජනතාවට ලැබීම පිළිබඳව අධ්‍යයනය කිරිම සඳහා සිදුකළ විශේෂ විගණනයට අදාලවය.

2020 වසරේ ඔක්තොබර් 14 වැනිදා සිට එතෙක් සීනි කිලෝග්‍රෑම් එකක් මත පනවා තිබූ රුපියල් 50ක විශේෂ වෙළෙඳ භාණ්ඩ බද්ද ශත 25ක් දක්වා අඩුකිරිමට ආණ්ඩුව පියවර ගත්තේය.

විශේෂ වෙළෙඳ භාණ්ඩ බද්ද ශත 25ක් දක්වා අඩු කළ 2020 වසරේ ඔක්තොබර් 14 වැනිදා සිට සීනි සඳහා පැවැති පාලන මිල ඉවත් කළ 2021 වසරේ පෙබරවාරි 08 වැනිදා දක්වා වූ මාස 04ක කාලය තුළ පමණක් රජයට රුපියල් මිලියන 16,763ක බදු ආදායමක් අහිමි වී ඇති බව ජාතික විගණන කොමිසම ගණනය කර තිබිණි.

අදාළ විගණන වාර්තාව පහත දැක්වේ.