ලෝකයේ බොහෝ රටවල් මත්ද්‍රව්‍ය ලැයිස්තුවට ඇතුළත් කර ඇති ගංජා මත්ද්‍රව්‍ය භාවිතය මෙරට ප්‍රවර්ධනය කිරීමට රජය කිසිසේත් අපේක්ෂා නොකරන බව දේශීය වෛද්‍ය රාජ්‍ය අමාත්‍ය සිසිර ජයකොඩි මහතා පාර්ලිමේන්තුවේදී ඊයේ (20) ප්‍රකාශ කළේය.

රාජ්‍ය අමාත්‍ය සිසිර ජයකොඩි මහතා මේ බව සඳහන් කළේ විපක්ෂ නායක සජිත් ප්‍රේමදාස මහතා මතු කරන ලද ප්‍රශ්නයකට පිළිතුරු දෙමිනි.

එමෙන්ම විනෝදාස්වාදය සඳහා ගංජා ඉරීම සහ ප්‍රවාහනය කිරීම සඳහා අවශ්‍ය නීතිමය අවසරය ලබා දීමටද රජය කිසිසේත් අපේක්ෂා නොකරන බව අමාත්‍යවරයා වැඩිදුරටත් අවධාරණය කළ‌ේය.

 අපනයනය සඳහා පමණක් ත්‍රෛලෝක විජය පත්‍ර භෝගය වගා කිරීමට ඇති ශක්‍යතා පිළිබඳ රජයේ අවධානය යොමු කර ඇති අතර, එයට අදාළ ශක්‍යතා වාර්තාව ඉදිරියේදී සභාගත කිරීමට අපේක්ෂා කරන බවද රාජ්‍ය ඇමැතිවරයා පැවසීය. 

එහිදී වැඩිදුරටත් අදහස් දැක්වූ දේශීය වෛද්‍ය රාජ්‍ය අමාත්‍ය සිසිර ජයකොඩි මහතා ‌මෙසේ කීය.

“ලෝකයේ බොහෝ රටවල් මත්ද්‍රව්‍ය ලැයිස්තුවට ඇතුළත් කර ඇති ගංජා මත්ද්‍රව්‍ය භාවිතය මෙරට ප්‍රවර්ධනය කිරීමට රජය කිසිසේත් අපේක්ෂා කරනු නොලැබේ. විනෝදාස්වාදය සඳහා ගංජා ඉරීම සහ ප්‍රවාහනය කිරීම සඳහා අවශ්‍ය නීතිමය අවසරය ලබා දීමට රජය කිසිසේත් අපේක්ෂා නොකරයි. අපනයනය සඳහා පමණක් ත්‍රෛලෝක විජය පත්‍ර භෝගය වගා කිරීමට ඇති ශක්‍යතා පිළිබඳ රජයේ අවධානය යොමු කර ඇති අතර, එයට අදාළ ශක්‍යතා වාර්තාව ඉදිරියේදී සභාගත කිරීමට අපේක්ෂා කරමි. පාසල්, පූජනීය ස්ථානවල සිට මීටර් 100ක දුරින් සිට මද්‍යසාර බලපත්‍ර ලබා දීමට හැකියාව නොමැත. තනි සිගරට් අලෙවි කිරීම සහා පාසල්, පූජනීය ස්ථානවල සිට මීටර් 100ක් දුරින් දුම්කොළ හා මද්‍යසාර අලෙවි කිරීම තහනම් කිරීම සඳහා වන සංශෝධනය ද ඇතුළත් දුම්කොළ හා මද්‍යසාර පිළිබඳ ජාතික අධිකාරී පනතේ සංශෝධනයක් කිරීමට අදාළ කෙටුම්පත් සකස් කිරීම මේ වන විටත් සිදු කරමින් සිටිනවා.”