ඉන්දු – ශ්‍රී ලංකා සබඳතා, නවදිල්ලි නුවර චීනය සමඟ ඇති සබඳතා මත රඳා නොපවතින බව ශ්‍රී ලංකා ජනාධිපති රනිල් වික්‍රමසිංහ මහතා පවසයි.
ෆස්ට් පෝස්ට් මාධ්‍ය ආයතනය සමග සම්මුඛ සාකච්ඡාවකට එක්වෙමින් ජනාධිපතිවරයා පවසා තිබුණේ ඉන්දියාවේ ආරක්ෂාවට හානියක් වන කිසිවක් ශ්‍රී ලංකාව විසින් සිදු නොකරන බවයි.
වසරක කාලය තුළදී මෙරටට පැමිණි චීන පර්යේෂණ නෞකා ද්විත්වය සම්බන්ධයෙන් ද මෙහි කතාබහට ලක්වූ අතර, මෙහිදී ජනාධිපතිවරයා පැවසුවේ පළමු නෞකාව ඔත්තු බලන නෞකා බවට සාක්ෂි ඇතැයි විමසූ විට එවැනි සාක්ෂි නොලැබුණු බවයි.
උලුප්පන්නෙ චීන නැව් විතරයි
“දෙවැන්නට අපි එන්න ඉඩ දුන්නා. එය කිසිම ගැටළුවන් වුනේ නෑ. ඔත්තු නැවක් කියන්නෙ මොකක්ද කියන එක ලොකු ප්‍රශ්නාර්ථයක්. මේවා සිවිල් නැව්. හැබැයි මොකක් හරි ප්‍රශ්නයක් නම්, ඒවා ඔත්තු නැව් නම් අපි ඒවාට එන්න දෙන්නේ නෑ. ඒත් ගවේෂණාත්මක එකක් නම්, අපි චීන නැව් වලට විතරක් නෙවෙයි අනිත් නැව් වලටත් ඉඩ දෙනවා… ඒත් වෙන රටවල නැව් ලංකාවට එන එක ගැන කවුරුත් උලුප්පා දක්වන්නේ නෑ. ලංකාවට චීන නැවක් එන හැම පාරම අපිට ගොඩක් ලොකු ප්‍රසිද්ධියක් ලැබෙනවා. ඒත්, වෙන රටකින් පර්යේෂණ නැවක් එනවා නම් එහෙම නෑ,” යැයි ජනාධිපතිවරයා සිනාසෙමින් පැවසීය.
ඉදිරියටත් චීනයෙන් පැමිණෙන මෙවැනි ‘පර්යේෂණ නෞකා’ වලට පැමිණීමට ඉඩ ලබාදෙන්නේදැයි ඇසූ විට ජනාධිපතිවරයා පැවසුවේ “ඕනෑම පර්යේෂණ නෞකාවක් පිළිගන්නා බවත්, අරමුණ පර්යේෂණ වන තාක් කිසිඳු ගැටළුවක් නොමැති බවත්ය.
චීන යුද නෞකා වලටද ලංකාවේ නැංගුරම් ලෑමට අවසර දෙන්නේ දැයි ඇසූ පැණයකට ජනපතිවරයා පවසා ඇත්තේ චීනය, ඉන්දියාව, රුසියාව, ඇමෙරිකාව වැනි විවිධ රටවල යුද නැව් මේ වන විටත් කොළඹට පැමිණෙන බවයි.
සියලු පක්ෂ දෙකඩ වෙලා
මෙරට දේශපාලනය පිළිබඳව කතාබහ කරමින් ජනාධිපතිවරයා පවසා සිටියේ සියළු දේශපාලන පක්ෂ දෙකඩ වී ඇති බවයි.
රාජපක්ෂ පවුලේ පක්ෂයේ කොටසක් සමගි ජනබලවේගය සමග වැඩ කරන බවත් ඉතිරි කොටස තමා සමග වැඩ කරන බවත් පැවසූ ජනපතිවරයා වැඩිදුරටත් පවසා සිටියේ මුළු සමගි ජනබලවේගයම සජිත් ප්‍රේමදාස මහතාට සහය දෙන්නේද කියා ඇසුව හොත් උත්තරය වන්නේ එසේ නොවන බවයි.
“සියළු දේශපාලන පක්ෂ දෙකඩ වෙලා තියෙන්නෙ. මං කියන්නේ රට ගොඩගන්න හැමෝටම එකතු වෙන්න කියලා.”
විශාලම ණයහිමියා
ණයහිමියන් පිළිබඳව අදහස් දක්වමින් ජනාධිපතිවරයා පවසා ඇත්තේ ලංකාවේ විශාලතම ණය හිමියා ජාත්‍යන්තර ස්වෛරී බැඳුම්කර (ISB) වන බවත් විශාලතම ද්විපාර්ශ්වික ණය හිමියා චීනය බවත්ය.
ශ්‍රී ලංකාව මුහුණදුන් ආර්ථික අර්බුදය හමුවේ ඉන්දියාව ලබාදුන් සහය පිළිබඳවද ජනාධිපතිවරයා මෙහිදී සිහිකැඳවීය.
එළැඹෙන ජනාධිපතිවරණයට තරග කරන්නේ දැයි ඇසූවිට වික්‍රමසිංහ මහතා පවසා සිටියේ තමාගේ පළමු කර්තව්‍යය වන්නේ ආර්ථිකය ගොඩගැනීම බවත්ය.
SLC තහනම් වෙනවා කියලා මට තේරුණා
ක්‍රිකට් ක්‍රීඩාව පිළිබඳව අදහස් දක්වමින් ජනාධිපතිවරයා පවසා සිටියේ ශ්‍රී ලංකා ක්‍රිකට් තහනමකට ලක්වනු ඇතිබවට තමාට තේරුණු බවයි.
ඉන්දීය ක්‍රිකට් පාලක මණ්ඩලයේ ලේකම් ජේ ෂාහ් මහතා ශ්‍රී ලංකාවේ ක්‍රිකට් පාලනය නොකරන බවද ජනාධිපතිවරයා පැවසීය.
ඉන්දීය ක්‍රිකට් පාලක මණ්ඩලයේ ලේකම්වරයා මෙරට ක්‍රිකට් පාලනය කරන බවට ශ්‍රී ලංකා හිටපු නායක අර්ජුන රණතුංග පසුගියදා චෝදනා කර තිබුණි.
ඔවුන් හිතන්නේ ෂාහ් ශ්‍රී ලංකා ක්‍රිකට් බලධාරීන්ට උදව් කරන බවයි. මම ෂාහ් ට කතා කළා, කනගාටුව ප්‍රකාශ කළා ඔහුගේ නම මේ ප්‍රශ්නයට ඈඳීම ගැන…”
ජාත්‍යන්තර ක්‍රිකට් කවුන්සිලය විසින් නීත්‍යානුකූල පාර්ශ්වය බවට තීන්දු කළ පාර්ශවයට තමා සහය දෙන බව ශාහ් මහතා පැවසූ බවත්, ජනාධිපතිවරයා වැඩිදුරටත් පැවසීය.
ජනාධිපතිවරයා හා ෆස්ට් පෝස්ට් අතර සිදුවූ සම්මුඛ සාකච්ඡාව මෙතැනින් :
