1954 අංක 19 දරන සාප්පු හා කාර්යාල සේවක (සේවා හා වැටුප් නියාමනය) පනත සංශෝධනය කිරීම සඳහා කැබිනට් මණ්ඩලයේ අනුමැතිය හිමිවී ඇත.

මෙම සංශෝධනය මඟින් වයස අවුරුදු 18 ට වැඩි කාන්තා සේවිකාවන්ට හෝටල් හා අවන්හල්වල ආහාර පාන සැපයීමේ රැකියාවලදී රාත්‍රී 10:00 න් පසුව වැඩ කිරීමට අවසර හිමිවේ.

වත්මන් රෙගුලාසිවලට අනුව, රාත්‍රී වැඩ සඳහා ඇතැම් හෝටල් රැකියාවලට පමණක් අවසර ලබා දී ඇති අතර, ආහාර පාන සේවකයින් ඒ සඳහා බැහැර කර ඇත. මෙය ආගන්තුක සත්කාර කර්මාන්තයේ මෙහෙයුම් ගැටළු ඇති කර ඇත.

කම්කරු අමාත්‍යවරයා විසින් ඉදිරිපත් කරන ලද මෙම සංශෝධනය, පනතේ තුන්වන රෙගුලාසිය යාවත්කාලීන කිරීම තුළින්, වර්ධනය වන කර්මාන්ත අවශ්‍යතා පිළිබිඹු කිරීමට සහ කාන්තා සේවිකාවන්ට නීතිමය ආරක්ෂාව සහතික කරමින් ව්‍යාපාරික මෙහෙයුම්වල අඛණ්ඩතාව තහවුරු කිරීමට අපේක්ෂිතය.

මෙමඟින් ආගන්තුක සත්කාර ක්ෂේත්‍රයේ කාර්යක්ෂමතාව ඉහළ නැංවෙනු ඇති අතර, සේවකයින්ගේ අයිතිවාසිකම් ආරක්ෂා කිරීමට ද බලාපොරොත්තු වේ.

ඊයේ (ජූලි 14) පැවති අමාත්‍ය මණ්ඩල රැස්වීමේදී තීරණ රැසකට එළැඹ තිබේ.

එම තීරණ මෙසේය :

දහම් පාසල් ගුරුභවතුන් සඳහා ගුරු දීමනාවක් හා නිල ඇඳුම් දීමනාවක් ලබා දීමට කැබිනට් අනුමැතිය සිදුව තිබේ.

වසරක අඛණ්ඩ සේවා කාලයක් සම්පූර්ණ කරන ලද ගුරු භවතුන්ට ගුරු දීමනාව හා නිල ඇඳුම් දීමනාව ඇතුළත් එක් දිමනාවක් ලෙස රුපියල් 7,500/- ක මුදලක් වර්ෂයකට එක් වතාවක් ගෙවීම පිණිස මෙසේ අනුමැතිය හිමිව ඇත.

ඒ අනුව මෙම තීරණය 2026 වර්ෂයේ සිට ඉදිරියට බෞද්ධ, හින්දු, ඉස්ලාම්, ක්‍රිස්තියානි හා කතෝලික ආගම්වලට අයත් ලියාපදිංචි දහම් පාසල්වල ක්‍රියාත්මක වේ. 

දහම් පාසල්වල සේවය කරන ගුරුභවතුන්ගේ සේවය අඛණ්ඩව ලබා ගැනීම සඳහා දිරි ගැන්වීම සහ ඔවුන්ගේ අනන්‍යතාවය ආරක්ෂා කිරීම මෙන්ම සමාජයේ යහ පැවැත්මට අත්‍යවශ්‍ය වන දහම් අධ්‍යාපනයේ අභිවෘද්ධිය පිණිස මෙම තීරණය ගෙන ඇත.