Connect with us

පුවත්

තකිකෝ යොෂිඩා මැතිණියගේ 115 ජන්ම සමරුව අදයි

Published

on

ජපානයේ දොරටුව ලාංකිකයන්ට විවර කර දුන් තකිකෝ යොෂිඩා මැතිණියගේ 115 ජන්ම සමරුව (16) අදයි.

යොෂිඩා මැතිණියගේ 115 වන ජන්ම සමරුව නිමිත්තෙන් අද (16) සපුගස්කන්ද යොෂිඩා පෙර පාසල හා යොෂිඩා ෂෝකන්ජි ජාත්‍යන්තර පාසල පවත්වන සමරු උත්සවය එම විද්‍යාලයේ පරිශ්‍රයේ පැවැත්වෙන බව එහි අධ්‍යක්ෂ හේමකුමාර ගුණසේකර මහතා පවසයි.

“ඔකාසන් අම්මා” හෙවත් තකිකෝ යොෂිඩා මැතිණිය
පරමාණු බෝම්බයෙන් සම්පූර්ණයෙන්ම විනාශ වුණ ජපානය යළි නැඟී සිටියේ ඒ රටේ මිනිස්සු තුළ ඇති වුණ ජාතික සංවර්ධන අභිලාෂයන් නිසයි.තමන්ගේ රට ගොඩනැගීමට ඔවුන් දිවා රෑ කැපවෙලා වැඩ කිරීම නිසා “ජපනා හපනා” කියන කතාව ලෝකෙට එකතු විය.

පසුගිය සියවසේ හත්වන දශකයේ අවසාන භාගය වන තුරු ජපානය සහ ශ්‍රී ලංකාව අතර ඒ තරම් සමීප බැඳීමක්, සබඳතාවක් නොතිබුණ අතර, ජපානයට ලංකාව විවෘත වීමට ප්‍රධාන වූ චරිතයකි තකිකෝ යොෂිඩා මැතිණිය.

අනගාරික ධර්මපාලතුමා ජපානයට ගොස් එරට තිබූ කර්මාන්ත සංවර්ධනය ගැන අධ්‍යනය කර ලංකාවේ  දේශීය කර්මාන්තකරණයකට මුල පිරීමට දැඩි උත්සාහයක් ගනු ලැබීය. ඒ වගේම ජපානයේ  ථෙරවාදී බුදු දහම ස්ථාපිත කිරීමටත් උන්වහන්සේගේ හදවතේ විශාල අදහසක්, උත්සාහයක් තිබුණත් උන්වහන්සේට අරමුණ ඉෂ්ඨ සිද්ධ කරගන්න නොහැකි වූයේ පැවති විවිධ බාධක නිසයි. ශ්‍රීමත් ධර්මපාලතුමන්ගේ ඒ අදහස ඉෂ්ඨ සිද්ධ වෙන්නේ උන්වහන්සේගේ මහාබෝධි සමාගමේ සෙවණ යටතේ හැදී වැඩුණු බානගල උපතිස්ස නායක හාමුදුරුවන් ජපානයේ  ලංකාජී විහාරය  ආරම්භ කිරීම තුළයි.

හැඩිගල්ලේ පඤ්ඤාතිස්ස නාහිමිපාණන් වහන්සේ සමඟ ඉන්දියාවේ මධ්‍ය ප්‍රදේශයේ බෝපාල් එහි සාංචි විහාරයේ වාසය කරමින් විදිසා හි අධ්‍යාපනය ලැබූ සමයේ සාංචි චේතියගිරි විහාරයට පැමිණෙන ජපානයේ මහා බෞද්ධ මහෝපාසිකාව වන තකිකෝ යොෂිඩා  මැතිණියට බානගල හිමියන් හමුවන්නීය.   එහි දී අහම්බෙන් තේ කෝප්පයකින් සංග්‍රහ කිරීම සමඟ ඇරඹි මේ දෙදෙනාගේ මාතෘ පුත්‍ර සබඳතාවය ඔස්සේ අනගාරික ධර්මපාලතුමන්ගේ ථෙරවාවාදී බුදු දහම ජපානයට ගෙනයෑමේ සිහිනය සැබෑ කරමින් බානගල හිමියන් ජපානයේ  සවාරා හි ලංකාජී විහාරය ගොඩනඟා එහි ජපානයේ ප්‍රථම ථෙරවාදී චෛත්‍යය ස්ථාපිත කරන්නේ  යොෂිඩා මැතිණියගේ අප්‍රතිහත ධෛර්ය හා සහයෝගය සමඟින් ය.

ඉන්දියාවේ අධ්‍යාපන කටයුතු හමාර කර ලංකාවට ඒමට නියමිතව සිටි බානගල හාමුදුරුවන් වැඩිදුර අධ්‍යාපනය ලැබීමට ජපානයට යාමට අවස්ථාවක් යොෂිඩා මැතිණිය ගෙන් ඉල්ලා සිටි අවස්ථාවේ යොෂිඩා මැතිනිය උන්වහන්සේට ජපානයට පැමිණීමට සියලු පහසුකම් සලසා දුන්නීය. යොෂිඩා මැතිණිය බානගල හාමුදුරුවන් ගෙන් අසා සිටියේ “ඔබ වහන්සේ උසස් අධ්‍යාපනය ලැබීමට අපේක්ෂා කරන්නේ කුමන  විෂයන් ද” කියා.එහි දී බානගල හාමුදුරුවන් කියා ඇත්තේ “තමන් උසස් අධ්‍යාපනය සඳහා තෝරා ගන්නේ පූර්ව ළමාවිය සංවර්ධනය හෙවත් ලදරු අධ්‍යාපනය කියන විෂය” බවය.ජපාන අධ්‍යාපනයේ දී පූර්ව ළමා විය  සංවර්ධන අධ්‍යාපනයට ලබා දෙන්නේ ඉහළම ප්‍රමුඛතාවක්.ජපානයේ  පූර්ව ළමාවිය සංවර්ධන අධ්‍යාපනය  ළමා මනෝ විද්‍යානුකූලව දරුවාගේ පෞරුෂ වර්ධනය ඉලක්ක කරමින් ගොඩනැගුණු ඉතාම  සුවිශේෂ අධ්‍යාපන ක්‍රමයකි.(ජපානයේ  පූර්ව ළමාවිය අධ්‍යාපනය පිළිබඳ වෙනම කථා කළ යුතුයි) එම අධ්‍යාපන කටයුතු හමාර කර ශ්‍රී ලංකාවට පැමිණෙන උන්වහන්සේ ගෙන් යොෂිඩා මැතිනිය අසා සිටින්නේ “ඔබ වහන්සේට මගෙන් ඉටුවිය  යුතු දේ කුමක් ද” කියාය.

ජපානයේ සිට සපුගස්කන්ද අබේසේකරාම විහාරයට පැමිණෙන බානගල  හාමුදුරුවෝ යොෂිඩා අධ්‍යාපන හා සමාජසේවා පදනම පිහිටුවා,1979 ජූනි 26 දින සපුගස්කන්දේ  ශ්‍රී ලංකාවේ ප්‍රථම ජපාන සම්ප්‍රදායානුකූල  පූර්ව ළමාවිය සංවර්ධන මධ්‍යස්ථානය ආරම්භ කළහ.ඊට පූර්ණ අනුග්‍රහය දක්වන්නේ ද ඒ සඳහා පැමිණෙන්නේද යොෂිඩා මැතිනියයි.

එකල ජපානයට ශ්‍රී ලංකාවෙන් සේවකයන් හෝ අධ්‍යාපනය සඳහා යෑම පිළිබඳ කිසිදු කතිකාවක් තිබුණේ නැත. එකල ලංකාවේ හැමෝම කතා කළේ එංගලන්තයට ඇමරිකාවට ජර්මනිය වගේ රටවල් වලට තමන්ගේ දරුවා යැවීමටයි. බානගල හාමුදුරුවන්  ප්‍රථම වරට පූර්ව ළමාවිය සංවර්ධනය අධ්‍යාපනය හැදෑරීමට මෙරට තරුණියන් විශාල ප්‍රමාණයක් ජපානයට යැවීමත් සමඟය ජපානයේ රැකියා සහ අධ්‍යාපන අවස්ථා පිළිබඳ ලංකාවේ කතාබහ ඇරඹෙන්නේ. කොටින්ම ජපානය කියන රට ශ්‍රී ලංකාවට විවෘත වන්නේ යොෂිඩා මැතිණියගේ සහ බානගල නායක හාමුදුරුවන් ගේ මේ ක්‍රියාවලිය  සමඟයි. “ජපන් ලදරු පාසල්” ලෙස රටපුරා ප්‍රචලිත වන මෙම පූර්ව ළමාවිය සංවර්ධන මධ්‍යස්ථාන නිට්ටඹුව, සපුගස්කන්ද,හොරණ,නුවරඑළිය,මත්තෙගොඩ,අගලවත්ත,පොල්ගස්ඕවිට,මාලඹේ,නුවරඑළිය,මහනුවර,නෙළුව ආදී ප්‍රදේශවල ස්ථාපිත වෙන්නේ යොෂිඩා මැතිණියගේ සම්බන්ධීකරණයෙන් ජපාන දානපතියන්ගේ ඉමහත් ආධාර උපකාර මතයි.

එතැන් සිට යොෂිඩා මැතිණිය ශ්‍රී ලංකාවේ ඉතාමත්ම සමීපතම ආදරණීය සංවර්ධන සහකාරිණියක් බවට පත්වෙනවා.ඒ නිසාම ඇයව බොහෝ දෙනා හඳුන්වන්නේ “ඔකාසන් අම්මා” කියාය.

එකල ලංකාවේ හතු පිපෙන්නා සේ හැම තැනම ලදරු පාසල්  තිබුණාද ඒ සඳහා වන කිසිදු නියාමනයක් හෝ ප්‍රමිතියක් පැවතියේ නැත.යොෂිඩා මැතිණියගේ  මැදිහත්වීම සමග ළමා මනෝවිද්‍යාවට අනුගත ප්‍රමිතිගත  ළදරු පාසල් මෙරට පුරා ස්ථාපිතවීම සමග කාගේත් අවධානයට ඇදී යෑම නිසා  මෙරට ලදරු පාසල් අධ්‍යාපනයට ප්‍රමිතියක්, නියාමනයක්  සකස්වීම ඇරඹෙන්නේ ය.අද වන විට මෙරට  පූර්ව ළමාවිය සංවර්ධන මධ්‍යස්ථාන නියාමනය සදහා නීති රීති ද ප්‍රඥප්ති ද පනත් ද ආයතන සහ අමාත්‍යංශ පවා ස්ථාපිත වන්නේ යොෂිඩා මැතිනිය හෙවත් ජපන් අම්මා සහ බානගල උපතිස්ස නා හිමියන් විසින් මෙරට ස්ථාපනය කරන්න යෙදුන විධිමත් පූර්ව ළමාවිය අධ්‍යාපන ක්‍රමය සහ පද්ධතිය නිසාය.

මේ අන්දමට ඇය මෙරට ජනතාවට සහ ළමා පරපුරට මෙන්ම ජපානයේ ථේරවාදී බුදු දහම ප්‍රචලිත කිරීමට දැක් වූ ඉමහත් ගෞරවනීය දායකත්වය නිසාම 1991 එවකට ජනාධිපති රණසිංහ ප්‍රේමදාස මහතා විසින් ඇයට “ශ්‍රී ලංකා රංජන” ගෞරව නාමය පිරිනමනු ලැබීය. මෙරට එවැනි ජාතික  ගෞරව නාමයෙන් පුද ලද ප්‍රථම විදේශීය චරිතය වන්නේ යොෂිඩා මැතිනියයි.2000 සදහටම අපෙන් සමු ගන්නා  යොෂිඩා මැතිණියගේ සියවන ජන්ම සමරුව වෙනුවෙන් 2008 දී  ඇය නමින් සමරු මුද්දරයක් ද නිකුත් කළේ, විදේශිකයෙකු වෙනුවෙන් මෙරට සමරු මුද්දරයක් නිකුත් කළ ප්‍රථම කාන්තාව ලෙස යොෂිඩා මැතිණිය ඉතිහාසයට එක් කරමින් ය. එසේම  සපුගස්කන්ද – බියගම ප්‍රධාන මාර්ගය “තකිකෝ  යොෂිඩා මාවත” ලෙස ද නම් කිරීමට ද මෙරට ජනතාව කෘතවේදී විය.

1908 අගෝස්තු 16 වෙනිදා ජපානයේ කියුෂු පරපුරේ උපත ලද යොෂිඩා මැතිණිය පසුව  කීර්තිමත් ශල්‍ය වෛද්‍ය විශේෂඥයකු වන කිෂි යොෂිඩා මැතිතුමා සමඟ විවාහ වීමෙන් පසුව, ජපානයේ  වර්තමානය ඇති විශාලතම පෞද්ගලික රෝහලක් වන යොෂිඩා රෝහලේ කොටස්කාරිණියක් බවට පත්වන්නීය. මෙරට මහා නායක හිමිවරුන් ඇතුළු බොහෝ දෙනකුට එම රෝහලේ නොමිලේ සෞඛ්‍ය වෛද්‍ය ප්‍රතිකාර ලබාදීමට ඉදිරිපත් වූ ඇය ⁣මෙරට භික්ෂුන් වහන්සේලාගේ හා බෞද්ධ ජන නායකයන්ගේ ඉමහත් ගෞරවාදරයට පාත්‍ර වූ ජපාන කාන්තා රත්නයක් විය.

පුවත්

“මොන ඡන්දය තිබ්බත් රනිල් පරදින බව රංගේ නිලවශයෙන් පිළිගත්තා” (වීඩියෝ)

Published

on

By

ඉදිරියේ එන ඕනෑම ඡන්දයකදී ජනාධිපති රනිල් වික්‍රමසිංහත්, එක්සත් ජාතික පක්ෂයත් පරදින බව රංගෙ බණ්ඩාර නිලවශයෙන් පිළිගෙන අවසන් බවත් ඉදිරි ඡන්ද කල් දැමීමට රනිල් වික්‍රමසිංහට මහතාට නොහැකි බවත් ජාතික ජන බලවේගයේ ජාතික විධායක සභික වෛද්‍ය නලින්ද ජයතිස්ස මහතා කියයි.

ඔහු මේ බව කියා සිටියේ තව අවුරුදු දෙක්ක රනිල් වික්‍රමසිංහට බලයේ සිටීමට ඉඩ දී මැතිවරන කල් දැමිය යුතු බවට එක්සත් ජාතික පක්ෂ මහ ලේකම් පාලිත රංගෙ බණ්ඩාර මහතා කළ ප්‍රකාශයක් සම්බන්ධයෙන් ප්‍රතිචාර දකවමිණි.

එහිදී වැඩිදුරටත් අදහස් දක්වන ජාතික ජන බලවේගයේ ජාතික විධායක සභික වෛද්‍ය නලින්ද ජයතිස්ස,

“එක්සත් ජාතික පක්ෂයට සම්බන්ධ යම් යම් කණ්ඩායම් තැන් තැන්වල ඡන්දයක් නොතියා මේ ජනාධිපතිට තව බලය දෙමු, තව අවුරුදු දෙක්ක රනිල් වික්‍රමසිංහට ඉන්න දෙමු වගේ කතන්දර කියන්න පටන් අරගෙන තියෙනවා. ඒවා පහුගිය දවස්වල අපි කිසිදු තඹේකටවත් ගණන් ගත්තේ නැහැ, තැකීමක් කරේ නැහැ, මොකද එවැනි කතා කිසිදු වගතුවක් නැහැ, වගවීමක් නැහැ ඒව ගණන් ගන්න ඕන නැහැ.

නමුත් ජනාධිපතිවරයා නියෝජනය කරන පක්ෂයේ මහලේකම්වරයා වන රංගේ බණ්ඩාර ප්‍රකාශයක් කරලා තියෙනවා ජනාධිපතිවරණය තියෙන්නෙත් නැතුව මහ මැතිවරණය තියන්නෙත් නැතුව අවුරුදු දෙකක් මේ ජනාධිපතිටයි ආණ්ඩුවටයි යන්න දෙන්නය, ඒක එහෙම යන්න දෙන්න ජනමත විචාරණයක් අවශ්‍යනම් ඒක තියමු කියලා. ඒකත් අනිවාර්යයෙන් තියන්න ඕන කියලා නැහැ. ජනාධිපතිවරයාගේ පක්ෂයේ මහ ලේකම්වරයා වන රංගෙ බණ්ඩාර පිළිගන්නවා නිල වශයෙන්ම, ජනාධිපතිවරණයක් හෝ වේවා මහ මැතිවරණයක් වේවා කවර ඡන්දයක් තිබ්බත් එක්සත් ජාතික පක්ෂය රනිල් වික්‍රසිංහ පරාදයි කියන එක පිළි අරගෙන තියෙනවා. ඔවුන් ඒක ප්‍රසිද්ධියේම පිළි අරගෙන තියෙනවා.

නමුත් ප්‍රශ්නෙ තියෙන්නේ රංගෙ බණ්ඩාර ඇතුළු එක්සත් ජාතික පක්ෂය පරාජයට පත්වෙනවයි කියලා මේ රටේ ජනතාවගේ අයිතිය පරමාධිපත්‍ය බලය උල්ලංඝණය කරන්න, ප්‍රකාශ කරන්න අයිතියක් නැහැ. මේක බරපතල ප්‍රකාශයක් හැටියට අපි සළකනවා. රංගෙ බණ්ඩාරලට මෙවැනි ආකාරයේ කුමන්ත්‍රණ කරන්න හිතන්නවත් අවස්ථාවක් අයිතියක් මේ රටේ ජනතාව දීල නැහැ. එමනිසා ජනාධිපතිවරණය නොපවත්වා ජනාධිපතිවරණයෙන් පස්සේ එළඹීමට නියමිත මහ මැතිවරණය නොපවත්වා තමන්ගේ බලය ඉදිරියට අරගෙන යන්න රනිල් වික්‍රමසිංහගේ උපදෙස් මත රංගෙ බණ්ඩාරලා ක්‍රියා කරනවානම්, කල්පනා කරනවානම් ඒකට මේ රටේ ජනතාව දෙන්න ඕන පිළිතුර ක්ෂණිකව ලබාදේවි.”

Continue Reading

පුවත්

සෞඛ්‍ය ඇමති හා සෞඛ්‍ය ක්ෂේත්‍රයේ පුටු පෙරළියක්!

Published

on

By

ඉදිරි සතිවලදී සෞඛ්‍ය අමාත්‍යාංශයේ ඉහළ තනතුරු රැසක වෙනස්කම් සිදුවිය හැකි බව වාර්තා වේ.

ඒ අනුව දැනට ආන්දෝලනයට ලක්ව ඇති ඖෂධ සැපයුම් ඒකකය, ඖෂධ නියාමන අධිකාරිය, රාජ්‍ය ඖෂධ සංස්ථාව, වෛද්‍ය පර්යේෂණ ආයතනය මෙන්ම රාජ්‍ය ඖෂධ නීතිගත සංස්ථාව ආදි ආයතනයන්හී ඉහළ තනතුරු රැසක් වෙනස්වීමට නියමිතව ඇතැයි පැවසේ.

පසුගිය කාලය පුරාවට සෞඛ්‍ය අමාත්‍යාංශය සතුව ඇති අදාල ආයතනවල ඇතිවූ වංචා දූශණ සහ අක්‍රමිකතා හේතුවෙන් මෙන්ම බාල ඖෂධ ගෙන්වීම ඇතුලු විවිද අක්‍රමිකතා හේතුවෙන් අදාල තනතුරු වෙනස් කරන ලෙස බොහෝ පාර්ශවයන් රජයෙන් ඉල්ලා ඇතැයි ද පැවසේ.

මේ අතර ඇතැම් වාර්තාවල දැක්වෙන්නේ මෙම තනතුරුවලට අමතරව සෞඛ්‍ය අමාත්‍යවරයාගේද වෙනසක් සිදුවිය හැකි බවත් එසේ වෙනසක් සිදුවුවහොත් එම අමාත්‍යධූරය සඳහා පසුගිය සමයේ බොහෝ සෙයින් කතා බහට ලක්වූ විපක්ෂ මන්ත්‍රීවරයෙකු අර්බුදයට ලක්ව ඇති සෞඛ්‍ය සේවය නගා සිටුවීම සඳහා එම අමාත්‍යධූරය ලබා ගැනීමට කැමැත්ත පළ කර ඇති බවත් පැවසේ.

මූලාශ්‍රය – මොණරා

Continue Reading

පුවත්

ලියනගේ මුල්ලේදී කතක් අභිරහස් ලෙස මරාදාලා!

Published

on

By

රාත්‍රී සමාජ ශාලාවක ඇති වූ ගැටළුවක් මුල් කර ගනිමින් හට ගත් ආරවුලක් දුර දිග යාමෙන් කටුනායක නිදහස් වෙළෙඳ කළාපයේ සේවයේ නියුතු සේවිකාවක අද (28) දින අලුයම සීදුව ලියනගෙමුල්ල ප්‍රදේශයේ දී මරා දමා තිබේ.

36 හැවිරිදි එක් දරු මවක වන බටහිර බටුවත්ත නෙළුව, ගාල්ල යන ලිපිනයෙහි පදිංචි උස්ගොඩ මානගේ තිසාරා මධුවන්ති නැමැති කාන්තාව මෙසේ මරා දමා තිබේ.

ඇය මීට වසර 06 කට පමණ පෙර කටුනායක නිදහස් වෙළෙඳ කළාපයේ සේවය සදහා පැමිණ තිබූ අතර පසුව ඇය සීදුව සංචාරක හෝටලයක සේවය කරන පුද්ගලයෙකු සමග සීදුව , ලියනගෙමුල්ල , ජූඩ් මාවත ප්‍රදේශයේ නේවාසිකාගාරයක තාවකාලිකව පදිංචි වී සිට තිබේ.

ඇය රාත්‍රී සමාජ ශාලාවක සිදු වූ සිදු වීමක් මුල් කර ගෙන මෙම පුද්ගලයා සමග ආරවුලක් ඇති කර ගෙන ඇති අතර අද (28) දින අලුයම 02.00 ත් 03.00 ත් අතර කාළයේ ඇය සහ එම පුද්ගලයා සාන්ත සෙබස්තියන් දේවස්ථානයේ ඉදිරිපිටින් ගමන් කරන ආරක්ෂිත කැමරා දර්ශන සීදුව පොලිසිය විසින් සොයා ගෙන තිබේ.

ඒ අනුව මෙම දේවස්ථානය ඉදිරිපිට මාර්ගය අසළ දරුණු කැපුම් තුවාල සහිතව ඇය මරා දමා තිබුණි.

මීගමුව වැඩබලන මහේස්ත්‍රාත් ඉන්දික සිල්වා මෙම ස්ථානයට පැමිණ ස්ථානීය පරීක්ෂාව සිදු කළ අතර ඇයගේ සිරුර අධිකරණ වෛද්‍ය පරීක්ෂණය සදහා මීගමුව මහ රෝහල වෙත යොමු කර තිබේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved