Connect with us

පුවත්

දිනේෂ්ගේ ඝාතනයට ක්‍රිෂ් පෙරේරාව ප්‍රශ්න කරන්න යයි!

Published

on

ජනශක්ති සමූහ ව්‍යාපාරයේ අධ්‍යක්ෂ දිනේෂ් ෂාෆ්ටර් මහතා සිය නිවෙසින් පිටතට යන අවස්ථාවලදී ජංගම දුරකතනයේ තමා සිටින ස්ථානය හඳුනා ගැනීමේ (Location Tracking) පහසුකම සිය බිරිය වන ටානි ෂමින්ට සහ සිය මිතුරා වන ෆැට්රික් ක්‍රිස් පෙරේරාට ඔහුව ඝාතනය වූ දිනට පෙරත් ලබා දී තිබුණේදැයි අනාවරණය කර ගැනීමට අපරාධ පරීක්ෂණ දෙපාර්තමේන්තුව විශේෂ අවධානයක් යොමු කර ඇතැයි වාර්තා වේ.

ඊට මුල් වී ඇත්තේ පැය භාගයකින් නැවත නිවෙසට පැමිණෙන්නේ යැයි කියා කොළඹ 07 මල් පාරේ පිහිටි නිවෙසින් පිටත්ව ගිය දිනේෂ් ෂාෆ්ටර් මහතා බොරැල්ල සුසාන භූමියේ රැඳී සිටින බව බිරිය ටානි ෂමින් සහ ක්‍රිෂ් පෙරේරා හඳුනාගෙන ඇත්තේ ස්ථානය හඳුනා ගැනීමේ (Location Tracking) පහසුකමින් බව පවසා ඇති බැවිනි.

මේ සඳහා අපරාධ පරීක්ෂණ දෙපාර්තමේන්තුවේ විමර්ශකයන් සිය භාරයට ගෙන ඇති දිනේෂ් ෂාෆ්ටර් මහතාගේ ජංගම දුරකතනය වෝහාරික විමර්ශනයකට ලක් කරමින් බිරිය සහ මිතුරාට එම පහසුකම මීට පෙර දී ඇති අවස්ථා ගණන පරීක්ෂා කරමින් ඇති බව ආරංචි මාර්ග අනාවරණය කළේය.

දිනේෂ් ෂාෆ්ටර් මහතාගේ බිරියගෙන් අපරාධ පරීක්ෂණ දෙපාර්තමේන්තුවේ නිලධාරීන් සහ බොරැල්ල පොලිසියේ නිලධාරීන් විසින් අවස්ථා කිහිපයකදීම ප්‍රශ්න කරමින් දීර්ඝ ප්‍රකාශ ගෙන ඇතත් මෙතෙක් මෙවැනි ප්‍රශ්න කිරීමකට දිනේෂ් ෂාෆ්ටර් මහතාගේ මිතුරා වන ක්‍රිෂ් පෙරේරා මහතාව යොමු කර නැත.

අපරාධකරුවන්ට ගොදුරු වී සිටි දිනේෂ් ෂාෆ්ටර් මහතාව බොරැල්ල කනත්තෙන් සොයාගෙන කොළඹ ජාතික රෝහල වෙත රැගෙන ගොස් ඇත්තේ ක්‍රිෂ් පෙරේරා මහතාය.

ඒ මහතාගෙන් බොරැල්ල පොලිසිය මූලික ප්‍රශ්න කිරීමක් මුල් අවස්ථාවේදී කර ප්‍රකාශ සටහන් කරගෙන ඇති අතර ඉදිරියේදී ඒ මහතාගෙන් වැඩිදුර තොරතුරු දැන ගැනීමට ප්‍රශ්න කිරීම සඳහා අපරාධ පරීක්ෂණ දෙපාර්තමේන්තුව මේ වන විට සිටින්නේ තොරතුරු රැස් කරමිනි.

දිනේෂ් ෂාෆ්ටර් මහතා ක්‍රිකට් විස්තර විචාරකයකු වන බ්‍රයන් තෝමස් මහතා මුණගැසීමට යන බව තමාට පැවසූ බව පොලිසියට පවසා තිබුණේද ක්‍රිෂ් පෙරේරාය.

බ්‍රයන් තෝමස් මහතාගෙන් ප්‍රශ්න කර ප්‍රකාශ සටහන් කරමින් ඔහුගේ විදෙස් ගමන් තහනමක් පවා ගැනීමට විමර්ශන නිලධාරීන් විසින් පියවර ගන්නේ ඒ අනුවය.

ක්‍රිෂ් පෙරේරා මහතා වත්තල හැඳල පදිංචිකරුවකු වන අතර වසර 19ක් දිනේෂ් ෂාෆ්ටර් මහතා සමීපයේ සේවය කළ අයෙකි. මේ වන විට ඔහුද සමාගම් අධ්‍යක්ෂවරයකු බව විමර්ශනවලින් පෙනී ගොස් ඇත. දිනේෂ් ෂාෆ්ටර් මහතාගේ විශ්වාසවන්තම සේවකයකු ලෙස කටයුතු කර ඇති ඔහුගෙන් දිනේෂ් ෂාෆ්ටර් මහතා ඇසුරු කළ පුද්ගලයන් සහ ඔහු ගනුදෙනු කළ අය ගැන බොහෝ තොරතුරු අනාවරණය කර ගැනීමට හැකිවනු ඇති බවත් ඒ ඔස්සේ ඝාතකයාව පහසුවෙන් හඳුනා ගැනීමට හැකිවනු ඇති බවත් අපරාධ පරීක්ෂණ දෙපාර්තමේන්තුව විශ්වාස කරයි.

පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරි නීතිඥ නිහාල් තල්දූව මහතා පවසනුයේ දිනේෂ් ෂාෆ්ටර් මහතාගේ ඝාතනය සම්බන්ධයෙන් කෙරෙන විමර්ශනවල ප්‍රගතියක් මේ වන විට ඇති බවය. දිනේෂ් ෂාෆ්ටර් මහතාගේ බිරියගෙන් මේ වන විට ප්‍රකාශ ගෙන ඇති බවත් විමර්ශනවලින් පැනනඟින අලුත් කරුණු අනුව ඉදිරියේදීත් ප්‍රකාශ ගනු ඇති බවත් ඔහු පැවසීය. ඒ හැරුණුකොට තව අයගේ ප්‍රකාශ ගැනීමටද පියවර ගනු ඇති බවද ඔහු කීය.

දිනේෂ් ෂාෆ්ටර් මහතාගේ ඝාතනය සම්බන්ධයෙන් කෙරන විමර්ශනයන්ට අදාළව දැනට පුද්ගලයන් 50 දෙනකුගෙන් ප්‍රශ්න කරමින් ප්‍රකාශ ගෙන තිබේ. ප්‍රකාශ 42ක්ම ගෙන ඇත්තේ අපරාධ පරීක්ෂණ දෙපාර්තමේන්තුවේ විමර්ශන කණ්ඩායම වන අතර ප්‍රකාශ 08ක් ගෙන ඇත්තේ බොරැල්ල පොලිසිය මඟින් බව නිහාල් තල්දූව මහතා පැවසීය.

“තවමත් ඍජුවම සැකකරු මෙයා කියල හඳුනාගෙන නැහැ. සැකයන්ට විවිධ පුද්ගලයන් භාජන වෙනවා. පුළුල් දැක්මක් සහිතවයි විමර්ශන සිදු වෙන්නේ. විවිධ ක්ෂේත්‍ර ඔස්සේ විමර්ශන සිදු වෙනවා.“ යැයිද නිහාල් තල්දූව මහතා සඳහන් කළේය.

මෙතෙක් නිශ්චිතව අපරාධකරු හඳුනාගෙන නැති බවත් සැකයට ලක් වන අයට එරෙහිව සාක්ෂි ලද වහාම අත්අඩංගුවට ගැනීමට පියවර ගන්නා බවත් නිහාල් තල්දූව මහතා වැඩිදුරටත් සඳහන් කළේය.

දිනේෂ් ෂාෆ්ටර් මහතාගේ බිරිය පොලිසියට පවසා ඇත්තේ ඔහු සිය නිවෙසින් පිටව යන්නේ පැය භාගයකින් නිවෙසට පැමිණෙන බව පවසමිනි. ඒ ගොස් අපරාධකරුවන්ගේ ගොදුරක් බවට පත්ව සිටි දිනේෂ් ෂාෆ්ටර් මහතා ගමන් කළ මෝටර් රථය පොලිසිය පරීක්ෂා කිරීමේදී ඒ තුළ තිබී කොළඹ 07 මලලසේකර මාවතේ පිහිටි කෙටි ආහාර අලෙවි ස්ථානයකින් ආහාර නිකුත් කිරීමේදී ආහාර බහා දෙන කවරයක් හමු වී ඇත. විමර්ශනයේදී පෙනී ගොස් ඇත්තේ එම බෑගය දෙදෙනකුට සෑහෙන කෙටි ආහාර බහාලන බෑගයක් බවය.

පැය භාගයකින් නිවෙසට එන බව කියා නිවෙසින් පිටත් වූ ඔහු සිය ගමනාන්තය වූ බොරැල්ල සුසාන භූමිය ආසන්නයේ ස්ථානයකින් දෙදෙනකුට සෑහෙන කෙටි ආහාර වේලක් රැගෙන යෑම කෙරෙහිද විමර්ශකයන්ගේ විශේෂ අවධානයකට යොමු වී තිබේ.

මෙහිදී අපරාධ පරීක්ෂණ දෙපාර්තමේන්තුවේ විමර්ශකයන්ගේ උකුසු ඇස් යොමු වී ඇත්තේ එදා ඔහු කනත්තේදී හමුවීමට ගිය පුද්ගලයා කවුරුන්දැයි කියාය. එම පුද්ගලයාව නිශ්චිත ලෙස සාක්ෂි සහිතව හඳුනා ගත් විට දිනේෂ් ෂාෆ්ටර් මහතාගේ ඝාතනය තවදුරටත් අබිරහසක් නොවනු ඇති බව උසස් පොලිස් නිලධාරියෙක් සඳහන් කළේය.

පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී නීතිඥ නිහාල් තල්දූව මහතා සඳහන් කරනු ලැබුවේ අපරාධ පරීක්ෂණ දෙපාර්තමේන්තුවේ විමර්ශකයන් පැය 24 පුරාම මේ ඝාතන අබිරහස විසඳීමට කැපවී කටයුතු කරන බවය.

මූලාශ්‍රය – දිනමිණ

පුවත්

තවත් පිරිසක් සජබය සමඟ එක්වේ

Published

on

By

ශ්‍රී ලංකා නිදහස් පක්ෂයේ සහ ජනතා විමුක්ති පෙරමුණේ ප්‍රාදේශීය සංවිධායකවරුන් කිහිප දෙනෙකු විපක්ෂ නායක සජිත් ප්‍රේමදාස මහතා හමු වී සමගි ජන බලවේගය සමග එක්වී තිබේ. 

ඒ සමගි ජන බලවේගය විසින් ක්‍රියාත්මක ජන පවුර වැඩසටහනේ පොළොන්නරුව දිස්ත්‍රික් රැස්වීම පැවැති අවස්ථාවේදී ය.

හිටපු පාර්ලිමේන්තු මන්ත්‍රීවරයකු සහ හිටපු අමත්‍යවරයකු වූ නන්දසේන හේරත් මහතා විපක්ෂ නායක සජිත් ප්‍රේමදාස මහතාට සහාය පළ කිරීමේ අරමුණින් සමගි ජන බලවේගය හා එක්විය.

එමෙන්ම ශ්‍රී ලංකා නිදහස් පක්ෂයේ හිටපු පාර්ලිමේන්තු මන්ත්‍රීවරයකු මෙන් ම මහවැලි සංවර්ධන අධිකාරියේ අධ්‍යයක්ෂවරයකු ලෙස කටයුතු කළ තිලක් මහලේකම්ගේ මහතා ද සමගි ජන බලවේගය හා එක්විය.

තවද ජනතා විමුක්ති පෙරමුණේ පොළොන්නරුව නගර සභාවේ අපේක්ෂකයෙකුව සිටි එච්. සමන්ත බණ්ඩාර මහතා ද විපක්ෂ නායක සජිත් ප්‍රේමදාස මහතාට සහාය පළ කිරීමේ අරමුණින් සමගි ජන බලවේගය හා එක්විය.

Continue Reading

පුවත්

ලෝක ප්‍රසිද්ධ සුරතලා මිය යයි

Published

on

By

ක්‍රිප්ටෝ මුදල් ඒකකයක් වන ඩොජ්කොයින්හි සංකේතය වන සුනඛ මුහුණට හිමිකම් කියන කබොසු සුනඛයා මිය ගොස් තිබේ.

ෂීබා ඉනූ සුනඛ වර්ගයට අයත් කබොසු ලියුකේමියාව හේතුවෙන් මියගොස් ඇත.

එම සුරතලාගේ හිමිකරු වන්නේ ජපානයේ ගුරුවරයෙකි.

Continue Reading

පුවත්

අපිරිසිදු දන්සල් 20කට නීතිමය ක්‍රියාමාර්ග

Published

on

By

දිවයින පුරා පවත්වනු ලැබූ දන්සල් 20,000ක් පරීක්ෂාවට ලක්කළ බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ විධායක සාමාජික සඳුන් හේමන්ත රත්නායක මහතා පවසයි.

එහිදී අපිරිසිදු තත්ත්වයේ පවත්වාගෙන ගිය දන්සැල් 20කට එරෙහිව නීතිමය ක්‍රියාමාර්ග ගත් බව සඳුන් හේමන්ත රත්නායක මහතා විසින් පවසන ලදී.

කොළඹ නගර සීමාවේ දන්සැල් 4000ක් පරීක්ෂාවට ලක් කර ඇති අතර , එයිනුත් අපිරිසිදු තත්ත්වයේ තිබූ දන්සැල් 5කට එරෙහිව නීතිමය ක්‍රියාමාර්ග ගත් බවයි සඳහන් වේ.

මෙහිදී බත්, ෆ්‍රයිඩ් රයිස්, කොත්තු, සීනි සම්බල් පාන්, කඩල, මඤ්ඤොක්කා, බීම දන්සල් පරීක්ෂාවට ලක්කර ඇත.

ඒ සඳහා මහජන සෞඛ්‍ය පරීක්ෂකවරුන් 1800ත් 2000ත් අතර පිරිසක් සහභාගී වූ බව සඳහන් වේ.

දන්සැල් පරීක්ෂාව ලබන 27 වැනිදා දක්වා ක්‍රියාත්මකයි.

Continue Reading

Trending

Copyright © 2023 Sri Lanka Mirror. All Rights Reserved