Connect with us

පුවත්

දිනේෂ් ෂාෆ්ටර්ගේ මරණයට බ්‍රයන් තෝමස්ගේ DNA පරික්ෂාවක්!

Published

on

ජනශක්ති රක්ෂණ සමූහ ව්‍යාපාරයේ අධ්‍යක්ෂ දිනේෂ් ෂාෆ්ටර් මහතාගේ මරණයට අදාළව ප්‍රවීණ ඉංග්‍රීසි ක්‍රිකට් විචාරක බ්‍රයන් තෝමස් මහතාගේ ඩී එන් ඒ වාර්තා කැඳවීමට කොළඹ අතිරේක මහේස්ත්‍රාත් රජීන්ද්‍රා ජයසූරිය මහත්මිය රජයේ රස පරීක්ෂකවරයාට ඊයේ (24) නියෝග කළාය.

මෙම සිද්ධියට අදාළව අධිකරණයෙන් පත් කළ කොළඹ විශ්ව විද්‍යාලයේ වෝහාරික වෛද්‍ය විද්‍යාව පිළිබද මහාචාර්ය අසේල මෙන්ඩිස් මහතාගේ සභාපතිත්වයෙන් යුතු මෙම පංච පුද්ගල විද්වත් මණ්ඩලයේ සාමාජිකයන්ගේ ඉල්ලීම මත අධිකරණය මෙම නියෝගය නිකුත් කළේය.

දිනේශ් ෂාෆ්ටර් මහතාගේ මරණය සම්බන්ධයෙන් කැඳවූ ඩීඑන්ඒ වාර්තාවන්ට අනුව තවත් ආගන්තුක ජෛව සාම්පල දෙකක් ඇති බවට අධිකරණයට කරුණු අනාවරණය වීමත් සමඟ මේ ඉල්ලීම සිදුකර තිබේ.

එම විද්වත් මණ්ඩලයේ සභාපති මහාචාර්ය අසේල මෙන්ඩිස් සහ රුහුණු විශ්ව විද්‍යාලයේ මහාචාර්ය ඩී. සී. ආර්. පෙරේරා මහත්වරුන් ඊයේ (24) අධිකරණය හමුවේ පෙනී සිටිමින් මෙම ඉල්ලීම සිදුකළහ.

ජනශක්ති සමූහ ව්‍යාපාරයේ අධ්‍යක්ෂ දිනේශ් ෂාෆ්ටර් මහතා භාවිත කළ වතුර බෝතලය ගෙල සිර කර තිබූ කේබල් වයරය හා දෙඅත් බැඳ තිබූ සිප් ටයි පටියේ ආගන්තුක ජෛව සාම්පල දෙකක් ඇති බවට රජයේ රස පරීක්ෂකවරයා විසින් අධිකරණයට කරුණු වාර්තා කර තිබිණ.

පසුව මෙම ආගන්තුක ජෛව සාම්පලය සැසඳීම සඳහා බොරැල්ල කනත්තේ සේවකයන් ‍දෙදෙනා හා සොකෝ නිලධාරීන් ඇතුළුව පුද්ගලයන් හතරදෙනකු ඩීඑන්ඒ වාර්තා සඳහා රජයේ රස පරික්ෂකවරයා වෙත යොමු කර තිබුණ ද ඔහුන්ගේ ඩීඑන්ඒ මෙම ආගන්තුක ජෛව සාම්පල හා සැසඳෙන්නේ නැති බවට කරුණු වාර්තා කරමින් රජයේ රස පරීක්ෂක කාර්යාලය මරණකරු කොළඹ ජාතික රෝහලට ඇතුළත් කළ පුද්ගලයා හා විමර්ශන කණ්ඩායම ඩීඑන්ඒ පරික්ෂාව සඳහා රජයේ රස පරික්ෂක කාර්යාලය වෙත යොමු කරන ලෙසට අධිකරණයෙන් ඉල්ලා ඇත.

මීට අමතරව දිනේෂ් ෂාෆ්ටර් මහතා මරණයට පත් වන අවස්ථාවේ ඔහුගේ කමිසයේ තිබූ වමනය සම්බන්ධයෙන් කැඳවූ වාර්තා අනුව එම වමනයේ වස වර්ගයක් තිබූ බවට වාර්තා වන බවට අපරාධ පරීක්ෂණ දෙපාර්තමේන්තුව අධිකරණය හමුවේ පැවැසීය.

මෙහිදී අදහස් දැක්වූ වෛද්‍ය මණ්ඩලය මෙම මරණය සම්බන්ධ තීන්දුව ප්‍රකාශ කිරීමට දිගු කාලයක් අවශ්‍ය බවත් වරින් වර විමර්ශන වාර්තා ලැබෙමින් පවතින හෙයින් මේවා නිසි ලෙස විමර්ශනය කොට නිගමනය ලබා දිය යුතු බවත් පැවැසීය.

මෙහිදී අගතියට පත් පාර්ශ්වය අදාළ සියලු සහයෝගය වෛද්‍ය කමිටුව වෙත ලබා දීමට එකඟ විය.

අදාළ කරුණු සලකා බැලූ මහේස්ත්‍රාත්වරිය කමිටුව විසින් අධිකරණයෙන් ඉල්ලා ඇති නියෝග නිකුත් කරමින් කඩිනමින් මෙම මරණය සම්බන්ධ නිගමනය තමන් වෙත ලබා දීමට ක්‍රියා කරන ලෙසට වෛද්‍ය කමිටුවට පවසා සිටියාය.

පුවත්

උතුරු – නැගෙනහිරට සංවර්ධනයේ ප්‍රතිලාභ දෙන බව ජනපති කියයි

Published

on

By

යුද්ධය නිසා උතුරු නැගෙනහිරට බලපෑ ප්‍රශ්න කඩිනමින් අවසන් කර එම ජනතාවට ද සංවර්ධනයේ ප්‍රතිලාභ ලබා දෙන බව ජනාධිපති රනිල් වික්‍රමසිංහ මහතා පවසයි.

උතුරු පළාත තුළ උසස් මට්ටමේ සෞඛ්‍ය සේවාවක් සහතික කිරීම වෙනුවෙන් යාපනය රෝහල නුදුරේදීම ජාතික රෝහලක් බවට පත් කිරීමට කටයුතු කරන බවත් දකුණු පළාත තුළ පැවති දීර්ඝකාලීන අවශ්‍යතාවයක් ඉටු කරමින් කරාපිටිය රෝහල ජාතික රෝහලක් බවට පත් කිරීමට අදාළ කැබිනට් අනුමැතිය හිමිවී ඇති බවද ජනාධිපතිවරයා සඳහන් කළේය.

ජනපතිවරයා යාපනය විශ්වවිද්‍යාලයේ වෛද්‍ය පීඨයේ ඉදිකළ සායනික පුහුණු සහ පර්යේෂණ අංශ ගොඩනැගිල්ල විවෘත කිරීමේ අවස්ථාවට අද (24) පෙරවරුවේ මේ බව පැවසීය.

මේ අතර “උරුමය ”  වැඩසටහන යටතේ යාපනය දිස්ත්‍රික්කයේ ප්‍රාදේශීය ලේකම් කාර්යාල 15ම ආවරණය වන පරිදි සින්නක්කර ඔප්පු 1,286ක් ජනාධිපති රනිල් වික්‍රමසිංහ මහතා අතින් ජනතාවට ලබාදීම අද යාපනයේදී සිදුකෙරිණි.

එමෙන්ම උතුරු පළාතට අයත් මුලතිව්, කිලිනොච්චිය, වවුනියාව හා මන්නාරම දිස්ත්‍රික්කවලට අදාළව “උරුමය” වැඩසටහන යටතේ සින්නක්කර ඔප්පු 13,858ක් ඉදිරියේදී ලබා දීමට නියමිතව තිබේ.


Continue Reading

පුවත්

පැපුවා නිව් ගිනියාවේ දරුණු  නායයාමක්

Published

on

By

පැපුවා නිව් ගිනියාවේ දුෂ්කර ගම්මාන හයකට බලපෑම් එල්ල කරමින් ඇති වූ නායයෑමෙන් ජීවිත රැසක් අහිමි වී ඇතැයි විදෙස් මාධ්‍ය වාර්තා කර තිබේ.

ඊයේ (23) සිදු වූ මෙම නායයෑමෙන් නිවාස 100කට වැඩි ගණනක් පස්වලින් සම්පූර්ණයෙන්ම යට වී ඇති බව විදෙස් වාර්තාවල දැක්වේ.

මෙහිදී සිදු වී ඇති ජීවිත හානි ගණන හෝ සුන්බුන් අතර කොපමණ පිරිසක් සිරවී ඇති ද යන්න නිශ්චිතවම තවමත් ප්‍රකාශ කළ නොහැකි බවද පැවසේ.

මෙම නායයෑම සිදු වූ  Enga නම් ප්‍රදේශයේ ආණ්ඩුකාරවරයා මාධ්‍යයට පවසා ඇත්තේ මෙය මීට පෙර සිදුනොවූ ස්වභාවික ව්‍යවසනයක් බවය.

එමෙන්ම පැපුවා නිව් ගිනියාවේ අග්‍රාමාත්‍ය James Marape පවසා ඇත්තේ, මළ සිරුරු ගොඩගැනීම සඳහා අවශ්‍ය සහන සේවා සැපයීමට සහ යටිතල පහසුකම් සඳහා අදාළ ස්ථානයට ආපදා නිලධාරීන් යොමු කර ඇති බවය.

Continue Reading

පුවත්

හලාවත ගොල්ෆ් පිටියක් හදන්න සැලසුම් කරයි

Published

on

By

හලාවත ගොල්ෆ් පිටියක් ඉදිකිරීමට සැලසුම් කරන බව කැබිනට් ප්‍රකාශක බන්දුල ගුණවර්ධන මහතා  නිවේදනය කළේය.

ඒ ඉරණවිල හා හලාවත ප්‍රදේශය සංචාරක කේන්ද්‍රස්ථානයක් ලෙස සංවර්ධනය කිරීමේ සමස්ත උපාය මාර්ගයේ කොටසක් ලෙස බවද ඔහු කීය.

මේවන විට ශ්‍රී ලංකාව තුළ දැනටමත් කොළඹ, මහනුවර සහ නුවරඑළියේ ගොල්ෆ් පිටි කිහිපයක් තිබේ.

සිදුරු 18කින් යුත් ගොල්ෆ් පිටි පහක් සහ සිදුරු 9කින් යුත් ‍ගොල්ෆ ක්‍රීඩාංගණ කිහිපයක් ද ශ්‍රී ලංකාව සතුවේ.

ගොල්ෆ් පිටියට අමතරව හලාවත සහ බිංගිරිය අතර සම්බන්ධක මාර්ගයක් ඉදිකෙරෙන අතර ඉන් අපනයන කලාපයක් පුළුල් කරන බව ද අමාත්‍ය ගුණවර්ධන මහතා පවසයි.

හලාවත – ඉරණවිල සංචාරක මධ්‍යස්ථානයේ සංවර්ධන කටයුතු බිංගිරිය ඒකාබද්ධ සංවර්ධන සැලැස්මට සම්බන්ධ කාර්ය සාධක බලකායක් මගින් අධීක්ෂණය කිරීමට නියමිත බවද පැවසේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved