Connect with us

පුවත්

ධීවර දිනය අදයි; පියල්ගේ වැඩ අද බේරුවලදී දිගහැරෙයි!

Published

on

ලෝක ධීවර දිනය අදට (21) යෙදී ඇති අතර සැමරුම් උත්සවය අද (21) පෙරවරු 10.00ට අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් බේරුවල ප්‍රාදේශීය ලේකම් කාර්යාල පරිශ්‍රයේදී පැවැත් වේ.

ධීවර ඇමැති ඩග්ලස් දේවානන්දා, රාජ්‍ය ඇමැති පියල් නිශාන්ත ද සිල්වා මහත්වරුන් ද මේ සඳහා එක්වන අතර ධීවර රාජ්‍ය ඇමැති පියල් නිශාන්ත ද සිල්වා මහතාගේ සංකල්පයක් මත ක්‍රියාත්මක කෙරෙන ‘දළ රළ සවිය’ වැඩසටහන යටතේ නව ධීවර රක්ෂණ ක්‍රමය හඳුන්වා දීම, නව විශ්‍රාම වැටුප් ක්‍රමයක් හඳුන්වා දීම, ‘දියවර කැකුළු’ ළමා ඉතුරුම් ගිණුම හඳුන්වා දීම, සමරු මුද්දරයක් නිකුත් කිරීම, ධීවර පවුල්වල අධ්‍යාපනය ලබන දරුවන් අතරින් විශිෂ්ට ප්‍රතිඵල ලබාගත් දරුවන්ට ශිෂ්‍යත්ව ලබා දීම, විසිතුරු මත්ස්‍ය කර්මාන්තයේ යෙදෙන නව ව්‍යවසායකයින්ට මූල්‍ය ආධාර ලබා දීම සහ ධීවර ප්‍රඥප්තිය පිළිබඳව කතිකාවක් ද මෙම සැමරුම් උත්සවයේදී සිදු කිරීමට නියමිතය.

“ධීවර රැකුම” නමින් ශ්‍රී ලංකා රක්ෂණ සංස්ථාව සමඟ එක්ව නව රක්ෂණාවරණයක් ධීවර කාර්මිකයන්ට හඳුන්වා දෙන අතර, ඒ යටතේ, හදිසි අනතුරක් හේතුවෙන් ධීවර රැකියාවේ නිරතව සිටියදී සිදුවන මරණයකදී හෝ අකර්මණ්‍යතාවයකදී රුපියල් මිලියන 1.2 – මිලියන 2 දක්වා පුද්ගල හදිසි අනතුරු රක්ෂණාවරණයක් හිමි වෙයි.

ධීවර රැකියාවේ නිරත වී සිටියදී සිදුවෙන හදිසි අනතුරක් හේතුවෙන් ධීවරයකු අතුරුදන් වුව හොත් ඒ අය වෙනුවෙන් මසකට රුපියල් 7500 බැගින් මාස 12ක් දක්වා පවුලේ අයට මේ යටතේ ප්‍රතිලාභ හිමි වේ.

වාර්ෂිකව රුපියල් 1865-2000 දක්වා වාරික ගෙවීමෙන් මෙම ප්‍රතිලාභ ධීවර කාර්මිකයන්ට ලබා ගත හැකිය.

ජීවිතයේ සැඳෑසමය සුවදායීව ගත කිරීම සඳහා කෘෂිකාර්මික හා ගොවිජන රක්ෂණ මණ්ඩලය හා එක්ව නව විශ්‍රාම වැටුපක් ආරම්භ කරන අතර, එම විශ්‍රාම වැටුපට අවුරුදු 18 සිට අවුරුදු 59 දක්වා වන ධීවරයන්ට දායක විය හැකිය.

මෙම විශ්‍රාම වැටුප වසර 60න් පසු ධීවර කාර්මිකයන්ට ලබා ගත හැකි වේ.

ධීවර සාමාජිකයාගේ බිරිඳ හෝ ස්වාමි පුරුෂයාට ලෙස මෙම විශ්‍රාම වැටුප හිමිවන අතර, යම් හෙයකින් එම පුද්ගලයා මියගිය පසුව ඔවුන්ගේ දරුවන්ට වයස අවුරුදු 18 සම්පූර්ණ වන තෙක් සහ ආබාධිත දරුවන් ඇත්නම් ඔවුන් විවාහයකට පත් වන තුරුද මෙම විශ්‍රාම වැටුප හිමි වේ.

ධීවර අමාත්‍යාංශය ලංකා බැංකුව සමඟ එක්ව ආරම්භ කරන ‘දියවර කැකුළු‘ ළමා ඉතුරුම් ගිණුම හඳුන්වා දීම ද අද සිදු කරන අතර මේ යටතේ සෑම මාසයකදීම ධීවර දරුවන්ට අධ්‍යාපනික කටයුතු සඳහා මුදල් ලබා දීම, ධීවර කාර්මික පියා හදිසියේ මියගිය විටකදී එම ළමා ඉතුරුම් ගිණුමේ ඇති මුදල දස ගුණයකින් වැඩිකර ප්‍රතිලාභ ලබා දීම ආදී ප්‍රතිලාභ රැසක් ධීවර දරුවන්ට හිමි වේ.

Continue Reading

පුවත්

බොරු මැණික් විකිණීමට ගිය 6ක්  අත්අඩංගුවට

Published

on

By

නිධානයකින් ලබාගත් ලද බවට පවසමින් ව්‍යාජ මැණික්ගල් පෙන්වා මුදල් වංචා කිරීමට තැත්කළ කාන්තාවක් ඇතුළු සැකකරුවන් 06 දෙනෙකු අත්අඩංගුවට ගෙන තිබේ.

ඊයේ (25) දහවල් කාලයේදී කටුගස්තොට පොලීසියට ලද තොරතුරක් මත කටුගස්තොට නගරයේදී එම සැකකරුවන් අත්අඩංගුවට ගෙන ඇත.

අත්අඩංගුවට ගත් සැකකරුවන් අවුරුදු 35 හා 51 අතර වයස්වල පසුවන හෙයියන්තුඩුව, ගාල්ල, හිනිදුම සහ ඇතුල්කෝට්ටේ ප්‍රදේශවල පදිංචිකරුවන් වන අතර සැකකාරිය හබරකඩ ප්‍රදේශයේ පදිංචි 35 හැවිරිදි කාන්තාවකි.

මෙම සැකකරුවන් ව්‍යාජ මැණික්ගල් තැරැවුකරුවන් මාර්ගයෙන් ගැණුම්කරුවෙකු සම්බන්ධකර විකිණීම සඳහා ගාල්ල, නෙළුව ප්‍රදේශයේ සිට කටුගස්තොට ප්‍රදේශයට පැමිණ ඇත.

තරැවුකරුවන් විසින් මෙම මැණික්ගල් ව්‍යාජ මැණික්ගල් බවට අනාවරණය කරගෙන ඒ සම්බන්ධයෙන් කටුගස්තොට පොලීසිය දැනුම්වත් කිරීමෙන් පසු සැකකරුවන් අත්අඩංගුවට ගෙන තිබේ.

සැකකරුවන් හා සැකකාරිය ඊයේ (25) මහනුවර මහෙස්ත්‍රාත් අධිකරණය වෙත ඉදිරිපත් කිරීමෙන් පසු හෙට (27) දක්වා රක්ෂිත බන්ධනාගාර ගත කර ඇති අතර කටුගස්තොට පොලීසිය වැඩිදුර විමර්ශන සිදුකරයි.

Continue Reading

පුවත්

තද සුළං ගැන අනතුරු ඇඟවීමක්

Published

on

By

කාලගුණවිද්‍යා දෙපාර්තමේන්තුව විසින් තද සුළං පිළිබඳ අවවාදාත්මක නිවේදනයක් නිකුත් කර තිබේ.

අද (26) පෙ.ව 10.30ට නිකුත් කරන ලද එම නිවේදනය හෙට (27) පෙ.ව 10.30 තෙක් වලංගුවන බව කාලගුණ විද්‍යා දෙපාර්තමේන්තුව සඳහන් කරයි.

මධ්‍යම කඳුකරයේ බටහිර බෑවුම් ප්‍රදේශවල සහ උතුරු මැද, දකුණු, වයඹ පළාත් සහ ත්‍රිකුණාමලය දිස්ත්‍රික්කය සඳහා මෙම නිවේදනය වලංගුවන බව කාලගුණවිද්‍යා දෙපාර්තමේන්තුව පවසයි.

දිවයින හරහා නිරිතදිග මෝසම් සුළං ප්‍රවාහයේ වැඩිවීම හේතුවෙන්, මධ්‍යම කඳුකරයේ බටහිර බෑවුම් ප්‍රදේශවල සහ උතුරු, උතුරු මැද, බස්නාහිර, දකුණු සහ වයඹ පළාත්වලත් ත්‍රිකුණාමලය දිස්ත්‍රික්කයේත් විටින් විට හමන පැ.කි.මී. 50-60ක පමණ තද සුළං ඇතිවිය හැකිය.

දිවයිනේ සෙසු ප්‍රදේශවල විටින් විට හමන පැ.කි.මී 30-40 පමණ තරමක තද සුළං ඇතිවිය හැකි බව කාලගුණ විද්‍යා දෙපාර්මේන්තුව වැඩිදුරටත් නිවේදනය කරයි.

Continue Reading

පුවත්

“ලංකාවේ ලොකුම සන්ධානය අපි හදනවා”

Published

on

By

ඉදිරි මැතිවරණ ඉලක්ක කරමින් ශ්‍රී ලංකාවේ ලොකුම හා ශක්තිමත්ම සන්ධානය ශ්‍රී ලංකා නිදහස් පක්ෂය ප්‍රමුඛ කරගනිමින් ආරම්භ කරන බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පවසයි.

පාර්ලිමේන්තුව නියෝජනය කරන පක්ෂ ගණනාවක් මෙන්ම පාර්ලිමේන්තුව නියෝජනය නොකරන පක්ෂ ගණනාවක් දැනටමත් තම සන්ධානයට සහයෝගය පළ කර ඇති බව අමාත්‍යවරයා සඳහන් කරන්නේය.

එමෙන්ම විවිධ පක්ෂ නියෝජනය කරන පාර්ලිමේන්තු මන්ත්‍රීවරු රැසක් අම්බලන්තොට රැලියට ජුනි 8 වැනිදා සහභාගී වීමට නියමිතව ඇතැයි අමාත්‍ය මහින්ද අමරවීර මහතා පැවසීය.

Continue Reading
Advertisement

Trending

Copyright © 2023 Sri Lanka Mirror. All Rights Reserved