Connect with us

පුවත්

නව තාක්ෂණික කමිටුවක් පත් කරන්න කෝපා තීරණය කරයි

Published

on

රජයේ ආදායම එකතු කිරීම, වැඩි දියුණු කිරීම සදහා රජයේ අදාළ සියලු ආයතන ඒකාබද්ධ කර තොරතුරු තාක්ෂණික පද්ධතියක් සකස් කිරීමට සදහා අවශ්‍ය මූලික සැලසුම් සකස් කිරීමට අග්‍රාමාත්‍ය ලේකම්වරයාගේ සභාපතීත්වයෙන් යුතු තාක්ෂණික කමිටුවක් පත් කිරීමට රජයේ ගිණුම් පිළිබඳ කාරක සභාව (කෝපා) සහ ක්‍රම සහ විධි කාරක සභා ඒකාබද්ධව පසුගියදා පවත්වන ලද රැස්වීමේදී තීරණය විය.

මේ අනුව ජනාධිපති ලේකම් කාර්යාලයේ නියෝජිතයෙක්, මුදල් අමාත්‍යාංශය හා තාක්ෂණ අමාත්‍යාංශයේ ලේකම්වරු හා තොරතුරු හා සන්නිවේදන තාක්ෂණ නියෝජිතායතනයේ (ICTA) සභාපතිවරයා මෙම කමිටුවේ සෙසු සාමාජිකයෝ වෙති.

රජයේ ගිණුම් පිළිබඳ කාරක සභාවේ සභාපති, රාජ්‍ය අමාත්‍ය ලසන්ත අලගියවන්න, ක්‍රම සහ විධි කාරක සභාවේ සභාපති පාර්ලිමේන්තු මන්ත්‍රී පාඨලී චම්පික රණවක යන මහත්වරුන්ගේ ප්‍රධානත්වයෙන් මෙම රැස්වීම පැවැත්විණි.

මේ අනුව සියලු අදාළ ආයතන සම්බන්ධීකරණයෙන් සතියක් ඇතුළත මූලික සාකච්ඡාවක්  පවත්වා  මැයි 15 වැනිදා මූලික සැලසුම්වල ඉදිරිපත් කිරීමක් කෝපා කමිටුව ඉදිරියේ සිදු කරන ලෙසටත් ඊට අදාළ වාර්තාවක් ද ලබාදෙන ලෙසත් එම තාක්ෂණික කමිටුවට දැනුම් දුන්නේය. එසේම ඉන් අනතුරුව මෙම වැඩපිළිවෙල ක්‍රියාත්මක වන තුරු සෑම මසකට වරක්ම මේ පිළිබදව ප්‍රගති සමාලෝචනයක් ලබා ගැනීමට ද මෙහිදී තීරණය විය.    

ජනාධිපති ලේකම් කාර්යාලය, අග්‍රාමාත්‍ය කාර්යාලය, මුදල්, ආර්ථික ස්ථායිකරණ සහ ජාතික ප්‍රතිපත්ති අමාත්‍යාශය, තාක්ෂණ අමාත්‍යාංශය, දේශීය ආදායම් දෙපාර්තමේන්තුව, සුරාබදු දෙපාර්තමේන්තුව, මෝටර් රථ ප්‍රවාහන දෙපාර්තමේන්තුව, ශ්‍රී ලංකා රේගුව, සෞඛ්‍ය, පෝෂණ හා දේශීය වෛද්‍ය අමාත්‍යාංශය, කෘෂිකර්ම දෙපාර්තමේන්තුව, පුද්ගලයන් ලියාපදිංචි කිරීමේ දෙපාර්ත‍මේන්තුව, තොරතුරු සහ සන්නිවේදන තාක්ෂණ නියෝජිතායතනය, ආගමන සහ විගමන දෙපාර්තමේන්තුව ඇතුළු ආයතන ගණනාවක නිලධාරීන්  මෙම අවස්ථාවට කැඳවා තිබිණි.

2016 වසරේදී රජයේ ගිණුම් පිළිබඳ කාරක සභාව විසින් මේ සම්බන්ධව රජයේ ආදායම එකතු කිරීම, වැඩි දියුණු කිරීම සදහා රජයේ අදාළ සියලු ආයතන ඒකාබද්ධ කර තොරතුරු තාක්ෂණික පද්ධතියක් සකස් කිරීම සදහා අවශ්‍ය ක්‍රියාමාර්ග ගැනීමට නිර්දේශයක් ලබා දී තිබියදී එය ක්‍රියාත්මක නොවීම පිළිබඳව කෝපා කමිටු සභාපතිවරයා රජයේ ආදායම් එකතු කරන ආයතනවලට සිය දැඩි අප්‍රසාදය පළ කළේය. ජාත්‍යන්තර මූල්‍ය අරමුදල සමග වැඩපිළිවෙල තුළ පවතින ආර්ථික අර්බුදය විසදා රජයේ ආදායම වැඩි කර ගැනීමට සියලු ආයතන ඒකාබද්ධ කොට විධිමත් පරිඝණක පද්ධතියක් සකස් කිරීම අත්‍යවශ්‍ය බව ද ඒ මහතා අවධාරණය කර සිටියේය.

මෙහිදී අදහස් දක්වමින් ක්‍රම සහ විධි කාරක සභාවේ සභාපති – පාඨලී චම්පික රණවක මහතා පවසා සිටියේ මේ සදහා අවශ්‍ය තාක්ෂණික පසුබිම, අදාළ ආයතන මේ සදහා කොතරම් දුරට සවිබල ගැන්විය යුතුද යනාදි කාරණා අධ්‍යයනය කොට සංයුක්ත වැඩපිළිවෙලක් සකස් කළ යුතු බවයි.

කාරක සභා සාමාජිකයන් වන රාජ්‍ය අමාත්‍ය මොහාන් ප්‍රියදර්ශන සිල්වා, රාජ්‍ය අමාත්‍ය චාමර සම්පත් දසනායක, පාර්ලිමේන්තු මන්ත්‍රීවරුන් වන නිරෝෂන් පෙරේරා, ජයන්ත කැටගොඩ, ජේ.සී අලවතුවල, මේජර් ප්‍රදීප් උදුගොඩ, මුදිතා ප්‍රිශාන්ති, (ආචාර්ය) හරිනි අමරසූරිය යන මහත්ම මහත්මීහු ද පාර්ලිමේන්තු මන්ත්‍රී සංජීව එදිරිමාන්න මහතාද මෙම අවස්ථාවට එක්ව සිටියහ.

පුවත්

වෛද්‍ය කපිල වික්‍රමනායකගේ පෙත්සම ගැන අධිකරණයෙන් තීරණයක්

Published

on

By

සෞඛ්‍ය අමාත්‍යාංශයේ වෛද්‍ය සැපයීම් අංශයේ අධ්‍යක්ෂ වෛද්‍ය කපිල වික්‍රමනායක මහතා විසින් ඉදිරිපත් කළ පෙත්සම සලකාබැලීම සඳහා ජුනි මස 04 වනදා කැඳවන ලෙස අභියාචනාධිකරණය නියම කලේය.

තමන්ව රක්ෂිත බන්ධනාගාර ගත කිරීමට දුන් නියෝගය නීතියට පටහැනි බවට තීන්දුවක් ලබාදෙන ලෙස ඉල්ලා ඔහු මෙම පෙත්සම ගොනු කර තිබුණි.

ප්‍රමිතියෙන් තොර ප්‍රතිදේහ එන්නත් මිලදීගැනීමේ සිද්ධිය සම්බන්ධයෙන් මාළිගාකන්ද මහෙස්ත්‍රාත් අධිකරණය විසින් ඔහුව රක්ෂිත බන්ධනාගාර ගත කරන ලදී.

අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ශෂී මහේන්ද්‍රන් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් ඉදිරියේ එම පෙත්සම අද (30) කැඳවනු ලැබීය.

එහිදී නීතිපතිවරයා වෙනුවෙන් පෙනී සිටි  නියෝජ්‍ය සොලිසිටර් ජනරාල් නිර්මලන් විග්නේෂ්වරන් මහතා සඳහන් කළේ මෙම පෙත්සමට අදාළ සීමිත විරෝධතා ගොනුකර අවසන් බවය.

ඉන්  අනතුරුව පෙත්සම සලකාබැලීම සඳහා ජුනි මස 04 වනදා කැඳවන ලෙස නියෝග කලේය.

ප්‍රමිතියෙන් තොර ප්‍රතිදේහ එන්නත් මිලදීගැනීමේ සිද්ධිය සම්බන්ධයෙන් තමන්ව පොදු දේපොළ පනත යටතේ නඩුව අවසන් වනතුරු රක්ෂිත බන්ධනාගාර ගත කිරීමට මාළිගාකන්ද මහෙස්ත්‍රාත් අධිකරණය විසින් දී ඇති නියෝගය බලරහිත කරන ලෙස ඉල්ලා ඔහු විසින් මෙම පෙත්සම ඉදිරිපත් කර තිබුණි.

Continue Reading

පුවත්

කබ්රාල්ගේ විදෙස් ගමන් තහනම තාවකාලිකව ඉවතට

Published

on

By

හිටපු මහ බැංකු අධිපති අජිත් නිවාඩ් කබ්රාල් මහතාට වෛද්‍ය ප්‍රතිකාර ලබාගැනීම සඳහා ඔහුට පනවා තිබූ විදේශ ගමන් තහනම තාවකාලිකව ඉවත් කිරීමට ඊයේ (29)  කොටුව මහෙස්ත්‍රාත් කෝසල සේනාධීර මහතා නියෝග කලේය.

ශ්‍රී ලංකා රජයට අයත් මහබැංකු බැඳුම්කර නිකුත් කිරීමේදී අමෙරිකානු ඩොලර් මිලියන 6.5ක මුදලක් අහිමි කිරීම සම්බන්ධ නඩුවට අදාළව හිටපු මහ බැංකු අධිපති අජිත් නිවාඩ් කබ්රාල් මහතාට විදෙස් ගමන් තහනමක් පනවා තිබුණි.

ඒ අනුව, ඔහුට එරෙහිව පනවා තිබූ  විදේශ ගමන් තහනම ලබන ජුනි මස 07 වනදා සිට ජූලි මස 07වනදා දක්වා තාවකාලිකව ඉවත් කිරීමට ඒ ඔහු වෙනුවෙන් පෙනී සිටි නීතිඥ මඩුල්ල මෝසමක් ගොනු කරමින් සිදු කළ ඉල්ලීමට කොටුව මහේස්ත්‍රාත් කෝසල සේනාධීර අවසර ලබා දීම සිදුවිය.

එංගලන්තයේ සිදු කිරීමට නියමිත හෘද රෝග පරීක්ෂාවක් සඳහා මෙලෙස අවසර ලබා දුනි.

අජිත් නිවාඩ් කබ්රාල් මෙම සිද්ධිය සම්බන්ධයෙන් සැකකරුවෙකු ලෙස නම් කර නැති බව කියමින් විදේශ ගමන් තහනම සම්පූර්ණයෙන්ම ඉවත් කරන ලෙස අජිත් නිවාඩ් කබ්රාල් මහතා වෙනුවෙන් ඔහුගේ නීතිඥවරුන් මෙහිදී ඉල්ලීමක් කලේය.

කෙසේවෙතත්, සැකකරුවෙක් ලෙස නම් කර නැතත් සිදු කරන විමර්ශනවලට බාධා විය හැකි බව පවසමින්  මහේස්ත්‍රාත්වරයා එම ඉල්ලීම ප්‍රතික්ෂේප කර තිබේ.

විමර්ශන අනුව ඕනෑම අවස්ථාවක සැකකරුවෙක් ලෙස නම් කළ හැකි බවත් විදේශ ගත වුවහොත් විමර්ශනවලට බාධා විය හැකි බවත් කියමින් මහේස්ත්‍රාත් වරයා මෙම නියෝගය නිකුත් කලේය.

ශ්‍රී ලංකාවේ ප්‍රතිරූපය ඉහළ නැංවීම සඳහා ඇමරිකාවේ පදිංචි පුද්ගලයකුට ඇමරිකානු ඩොලර් මිලියන 6.5ක ප්‍රමාණයක් ලබාදීම සම්බන්ධයෙන් සිදු කරන විමර්ශන අවසන් නොකිරීම නිසා ඉතා අත්‍යවශ්‍ය කටයුත්තකට හෝ විදේශගත වීමට ඔහුට නොහැකි වී ඇති බවත් විශිෂ්ට රාජ්‍ය සේවකයකුට එලෙස බාධා කිරීම ඉතා අසාධාරණ බවත් කියමින් නීතිඥ මල්දිනි හේරත් හා නීතිඥ ෂෙනාල් විජේසිංහ සමග පෙනීසිටි ජ්‍යෙෂ්ඨ නීතිඥ චමින්ද අතුකෝරළ මහතා මෙහිදී අධිකරණය හමුවේ කරුණු දක්වන ලදී.

කරුණු සලකා බැලූ මහෙස්ත්‍රාත්වරයා, ලබන මස 5 වැනිදා සිට ජූලි මස 5 වැනිදා දක්වා කාලය සඳහා විදේශ ගමන් තහනම ඉවත් කිරීමට ද නියෝග කලේය.

සබැඳි පුවත්

Continue Reading

පුවත්

අධිකරණයට අපහාස කළැයි මෛත්‍රීට පෙත්සමක්

Published

on

By

අධිකරණයට අපහාස කළේ යැයි චෝදනා කරමින් හිටපු ජනාධිපති මෛත්‍රීපාල සිරිසේන මහතාට එරෙහිව අභියාචනාධිකරණය හමුවේ පෙත්සමක් ගොනු කර තිබේ.

ශ්‍රී ලංකා නිදහස් පක්ෂයේ විධායක සභිකයකු වන මොන්ටේගු සරත්චන්ද්‍ර මහතා විසින් පෙත්සම ඉදිරිපත් කරන ලදී.

පෙත්සම අද (30) අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ෂශී මහේන්ද්‍රන් යන විනිසුරු මඩුල්ල ඉදිරියේ කැඳවනු ලැබීය.

එහිදී අධිකරණය විසින් පෙත්සම්කාර පාර්ශ්වයේ නීතිඥවරයාට නියෝග කළේ, මෙම පෙත්සමට අදාළව කරුණු තහවුරු කිරීම සඳහා වගඋත්තරකාර මෛත්‍රීපාල සිරිසේන මහතා වෙත නොතීසි යැවීමට පියවර ගන්නා ලෙසයි.

ශ්‍රී ලංකා නිදහස් පක්ෂයේ සභාපතිවරයා වශයෙන් කටයුතු කිරීම වළක්වාලමින් කොළඹ දිසා අධිකරණය විසින් අතුරු තහනම් නියෝගයක් නිකුත් කර තිබියදී එය උල්ලංඝනය වන ආකාරයෙන් කටයුතු කිරීම තුළින් අධිකරණයට අපහාස කළේ යැයි චෝදනා කොට හිටපු ජනාධිපති මෛත්‍රීපාල සිරිසේන මහතාට එරෙහිව මෙම පෙත්සම ඉදිරිපත් කර තිබේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved