හොරකම්, වංචා, දූෂණ නතර කිරීම සහ රාජ්‍ය පාලනය ප්‍රභූන්ගෙන් බේරා ගැනීම යන අභිලාශයන් ජනතාවට තිබුණු බවත්, දැන් අන්තිමට ප්‍රභූ රාජ්‍ය නිලධාරීන්, ජාවාරම්කාර ව්‍යාපාරික තක්කඩි නැවත පැමිණ රාජ්‍ය යාන්ත්‍රණය අත්පත් කරගනිමින් සිටින බව ජන අරගල සන්ධානයේ ජාතික විධායක සභික පුබුදු ජයගොඩ මහතා කියයි.

කොළඹ පැවැති මාධ්‍ය හමුවකදී ඔහු මේ බව පැවසීය.

නව ජනාධිපතිවරයාගෙන් හා ජාතික ජනබලවේගයෙන් සිය සංවිධානයට එයට ඉඩ නොදෙන්නැයි ඉල්ලා සිටින බවද ඔහු කියා සිටියේය.

එසේම ජාත්‍යන්තර මූල්‍ය අරමුදල සමඟ හිටපු ජනාධිපති රනිල් වික්‍රමසිංහ මහතා ගෙන ගිය වැඩ පිළිවෙළ එලෙසම ක්‍රියාත්මක කිරීමට ජනාධිපති අනුර කුමාර දිසානායක මහතා ද එකඟතාවයකට පැමිණ ඇති බවට ද ජාගොඩ මහතා චෝදනා කරයි.

ජනතා විමුක්ති පෙරමුණේ නිර්මාතෘ රෝහණ විජේවීර මහතා ගේ පුත් උවිඳු විජේවීර මහතා ඉදිරි පාර්ලිමේන්තු මැතිවරණයට කුරුණෑගල දිස්ත්‍රික්කයෙන් ඉදිරිපත් වීමට නියමිත බව වාර්තා වේ. 

උවිඳු විජේවීර දෙවැනි පරපුර දේශපාලන පක්ෂයේ නායකයා වශයෙන් කටයුතු කරන අතර, ඔහු මේ වනවිට කුරුණෑගල දිස්ත්‍රික්කය තුළ එම පක්ෂයේ සංවිධාන කටයුතු සම්පූර්ණයෙන්ම අවසන් කර තිබීම හේතුවෙන් මෙසේ කුරුණෑගල දිස්ත්‍රික්කයෙන් මැතිවරණයට තරග කිරීමට තීරණය කර ඇති බවද පැවැසේ. 

මේ වනවිට ශ්‍රී ලංකා පොදුජන පෙරමුණේ නායක නාමල් රාජපක්ෂ මහතා ද කුරුණෑගල දිස්ත්‍රික්කයෙන් මහා මැතිවරණයට ඉදිරිපත් වීමට සූදානමින් සිටින බවට පැතිර යන ආරංචිය ඔහු  විසින් ප්‍රතික්ෂේප කර තිබුණද බොහෝ විට එය සිදුවිය හැකි බව ද මේ අතර වාර්තා වේ.

හිටපු ජනාධිපති රනිල් වික්‍රමසිංහ මහතාගේ ආරක්ෂාව ඉවත්කර ඇති බවට පැතිර යන ප්‍රචාර සම්පූර්ණයෙන්ම අසත්‍ය බව පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා කියයි.

හිටපු ජනාධිපතිවරයාගේ ආරක්ෂාවට යොදවා ඇති පොලිස් විශේෂ කාර්ය බලකායේ නිලධාරීන් 50 දෙනෙකු ඇතුළු ආරක්ෂක අංශ නිලධාරීන් තවදුරටත් එළෙසම කටයුතු කරන බව පොලිස් මාධ්‍ය ප්‍රකාශකවරයා මාධ්‍යට පවසා ඇත.

හිටපු ජනාධිපති රනිල් වික්‍රමසිංහ මහතාගේ ආරක්ෂාව ඉවත්කර ඇති බවට පැතිර යන ප්‍රචාර සම්බන්ධයෙන් මාධ්‍ය සිදුකළ විමසීමකට පිළිතුරු දෙමින් පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා මේ බව පවසා තිබේ.

කෙසේ වෙතත් හිටපු ජනාධිපතිවරයාට ලබාදිය යුතු නිලධාරීන් ගණන කඩිනමින් තීරණය කර ස්ථාපිත කිරීමට බලාපොරොත්තු වන බවද ඔහු මෙහිදී පවසා ඇත.

මේ අතර වත්මන් ජනාධිපති අනුර කුමාර දිසානායක මහතාගේ ජනාධිපති ආරක්ෂක කොට්ඨාසය ස්ථාපිත කිරීම සඳහා අවශ්‍ය නිලධාරීන් සංඛ්‍යාව මේ වනවිට තීරණය කර ඇති අතර, අතිරික්ත නිලධාරීන් ඉවත්කිරීම ද සිදුව ඇති බව ද වාර්තා වේ.

Last Update – October 6 11:24 pm

රනිල්ගේ පොලිස් ආරක්ෂාව ඉවතට ; පුද්ගලික ආරක්ෂකයාත් නැවත කැඳවයි

හිටපු ජනපති රනිල් වික්‍රමසිංහ මහතාට ලබාදී තිබූ 300ක පොලිස් බලඇනිය නැවත කැඳවා තිබේ.

එසේ නැවත කැඳවූ පිරිස අතර වික්‍රමසිංහ මහතාගේ පුද්ගලික ආරක්ෂකයා ලෙස දීර්ඝ කාලයක් කටයුතු කළ අශෝක ආරියවංශ මහතා ද සිටීම විශේෂිතය.

වැඩබලන පොලිස්පතිවරයා විසින් අදාළ නියෝගය අද (06) පස්වරුවේදී සිදු කර ඇත.