අද (17) අලුයම 1න් අවසන්වූ පැය 17 තුළ දිවයිනේ ප්රදේශ රැසකට මිලිමීටර් 100 ඉක්මවූ අධික වැසි ඇද හැලී තිබේ.
වැඩිම වර්ෂාපතනය වාර්තා වන්නේ ගාල්ල නෙළුව ප්රදේශයෙන් ය.
එම අගය මිලිමීටර් 191.5 කි.
කළුතර, වලල්ලාවිට ප්රදේශයෙන් මිලිමීටර් 177 ක වර්ෂාපතනයක් වාර්තා වන අතර කළුතර ,හොරණ ප්රදේශයෙන් මිලිමීටර් 120 වර්ෂාපතනයක් වාර්තා වෙයි.
කොළඹට ලැබී ඇති වර්ෂාපතනය මිලිමීටර් 116.5 කි.
ඇහැලියගොඩ මිලිමීටර් 116 ක් හා ගාල්ල උඩුගමට මිලිමීටර් 115.5 ක වර්ෂාපතනයක් ලැබී තිබේ.
තද වැසි පිළිබඳ අනතුරු ඇඟවීමේ නිවේදනයක් නිකුත් කරමින් කාලගුණ විද්යා දෙපාර්තමේන්තුව පවසන්නේ, පහළ වායු ගෝලයේ පවතින කැළඹිලි ස්වභාවය මීට හේතුවී ඇති බවයි.
දිවයිනේ නිරිත දිග ප්රදේශවල දැනට පවතින වැසි තත්ත්වය තවදුරටත් අපේක්ෂා කළ හැකි බව එහි දැක්වෙයි.
බස්නාහිර සහ සමබරගමුව පළාත් වලට මෙන්ම , ගාල්ල සහ මාතර දිස්ත්රික්ක වල ඇතැම් ස්ථාන වලට මිලිමීටර් 150ට වැඩි ඉතා තද වැසි ඇති විය හැකි බව කාලගුණ අනාවැකියේ සඳහන් ය.
මේ අතර , පවතින වැසි තත්ත්වය හමුවේ දිස්ත්රික්ක කිහිපයක ප්රාදේශීය ලේකම් කොට්ඨාස කිහිපයක් සඳහා නායයෑමේ අනතුරු ඇඟවීම් නිකුත් කර තිබේ.
ඒ අනුව ගාල්ල දිස්ත්රික්කයේ නායයෑමේ අනතුරු ඇඟවීම් නිකුත් කර ඇත්තේ නෙළුව, ඇල්පිටිය, නාගොඩ සහ යක්කලමුල්ල ප්රාදේශීය ලේකම් කොට්ඨාශ සඳහායි.
කළුතර දිස්ත්රික්කයේ හොරණ සහ මතුගම ප්රාදේශීය ලේකම් කොට්ඨාස සඳහා නායයෑමේ අනතුරු ඇඟවීම් නිකුත් කෙරිණ.
මාතර දිස්ත්රික්කයේ නායයෑම් පිළිබඳ අනතුරු ඇඟවීම් නිකුත් කළේ, පිටබැද්දර ප්රාදේශීය ලේකම් කොට්ඨාසය සඳහායි.
