මධ්‍යම අධිවේගී මාර්ගයේ පළවෙනි පියවරේ ඉදිකිරීම් කටයුතු සිදු කරන වේයන්ගොඩ, දාරළුව ප්‍රදේශයේ තිබූ වඳ වී යන දුර්ලභ ගණයේ ශාක විශේෂයකට අයත් පඬුකරඳ ගසක් හොරෙන් කපා වල දමා ඇති බව කියන ප්‍රදේශයට වහාම පොලිස් ආරක්ෂාව සපයන ලෙසට ගම්පහ අතිරේක මහේස්ත්‍රාත් ෆාතිමා සහානා මහ්ජි බෙම්මුල්ල පොලීසියට නියෝග කර තිබේ.

එහිදී මහේස්ත්‍රාත්වරිය නියෝග කර ඇත්තේ එම ගස වලදමා තිබෙන ස්ථානය ස්ථිරවම හඳුනා ගෙන එය ගොඩ ගැනීමට අවශ්‍ය පියවර ගන්නා ලෙසටයි.
`
ගම්පහ දිසා වන නිලධාරී ඉසුරු අලවත්ත වෙත අදාළ නියෝගය නිකුත් කර ඇත.

දාරළුව ප්‍රදේශයේ තිබූ එම පඬුකරඳ ගස කපා ඉවත් කර ඇති බව පවසමින් ගම්පහ දිසා වන කාර්යාලය මගින් බී වාර්තාවක් මගින් මීට පෙර අධිකරණයට කරුණු වාර්තා කර තිබුණි.

එම නඩුව ඊයේ නැවත කැඳවූ අවස්ථාවේ පුරාවස්තු සුරැකීමේ සංවිධානයේ සභාපති පූජ්‍ය උඩස්ගිරියේ සමිත හිමියන් වෙනුවෙන් පෙනී සිටි නීතීඥවරයා කරුණු දක්වමින් අභියාචනාධිකරණයේ තීන්දුවකට පිටු පාමින් විනාඩි අටක් වැනි කෙටි කාලයක් තුළ මෙම දුර්ලභ ගණයේ ගස හොරෙන් කපා වල දමා ඇති බව අධිකරණයට දන්වා සිටියේය.

පඬුකරඳ ශාකය වඳ වී යන ශාඛ වර්ගයක් බවට රතු දත්ත පොතේ සඳහන් කර ඇති බවත් කැබිනට් තීරණයකට අනුව නීති විරෝධීව මෙම ගස හොරෙන් කපා වල දමා ඇති බව දැන ගන්නට ලැබී ඇති බවත් වැඩිදුරටත් පෙන්වා දී ඇත.

මෙහිදී අධිකරණය නැගූ ප්‍රශ්නයකට පිළිතුරු දෙමින් ගම්පහ දිසා වන නිලධාරී ඉසුරු අලවත්ත  කැබිනට් තීරණයකට අනුව ගස කපා ඉවත් කළ බව මධ්‍යම අධිවේගී මාර්ගයේ පළවෙනි පියවරේ ව්‍යාපෘති අධ්‍යක්ෂවරයා තමන්ට දැනුම් දුන් බව හෙළිකළ‌ේය.

ඊයේ උදෑසන අතිරේක වන සංරක්ෂක ජනරාල්වරයා විද්‍යූත් තැපෑලෙන් ඒ බව දන්වා සිටි බවද ඔහු ප්‍රකාශ කර සිටියේය.

එම ගස නැවත ගොඩ ගැනීමක් සිදු කරන්නේනම් ඒ සඳහා අවශ්‍ය සම්පත් යන්ත්‍ර සූත්‍ර තම දිසා වන කාර්යාලය සතුව නොමැති බවද දිසා වන නිලධාරීවරයා අධිකරණය හමුවේ ප්‍රකාශ කර සිටියේය.

ගස කපා වල දමා ඇති ස්ථානය පිළිබඳ මධ්‍යම අධිවේගී මාර්ගයේ පළවෙනි පියවරේ ව්‍යාපෘති අධ්‍යක්ෂවරයා දැනුම්වත්ව සිටින හෙයින් එම ගස ගොඩ ගැනීම සදහා නිෂ්චිත ස්ථානය හඳුනා ගෙන ලබන 24 වැනිදා අධිකරණය ඉදිරියේ පෙනී සිටින ලෙසට මහේස්ත්‍රාත්වරිය ගම්පහ දිසා වන නිලධාරීවරයාට මෙහිදී නියෝග කළ‌ේය.

උදාසීන තත්වයකින් තොරව නියෝග වහා ක්‍රියාත්මක කරන ලෙසට ද මෙහිදී මහේස්ත්‍රාත්වරිය දන්වා සිටි අතර නඩුව නැවත කැදවීම මේ මස 24 වනදාට කල් තැබිණි.

සබැඳි පුවත්
දාරළුවේ “පඬුකරඳ” ගහ කැපුවේ කැබිනට් අනුමැතියට අනුව! (වීඩියෝ)