අභිරහස් ලෙස මරණයට පත්වූ ජනශක්ති සමූහ ව්‍යාපාරයේ අධ්‍යක්ෂ දිනේෂ් ෂාෆ්ටර් මහතාගේ මරණය ආගන්තුක පුද්ගලයෙකු විසින් සිදුකළ බවක් මෙතෙක් සිදුකරන ලද විමර්ශන තුළින් අනාවරණයවී නොමැති බව අපරාධ පරීක්ෂණ දෙපාර්තමේන්තුව අද (09) අධිකරණය හමුවේ කියා සිටියේය.
රජයේ රස පරීක්ෂක වාර්තා උපුටා දක්වමින් විමර්ශන නිලධාරින් වැඩිදුරටත් කියා සිටියේ මෙම මරණයට හේතුවී ඇත්තේ සයනයිඩ් ශරීරගතවීමකින් බවය.
ජනශක්ති සමූහ ව්‍යාපාරයේ අධ්‍යක්ෂ දිනේෂ් ෂාෆ්ටර් මහතාගේ මරණය සම්බන්ධයෙන් වූ නීති කෘත්‍යය කොළඹ අංක 02 මහෙස්ත්‍රාත් අධිකරණයේ අතිරේක මහෙස්ත්‍රාත් රජීන්ද්‍රා ජයසූරිය මහත්මිය ඉදිරියේ අද දිනයේත් කැඳවනු ලැබීය.
එහිදී අධිකාරණය හමුවේ පෙනී සිටි අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන සහ සංවිධානාත්මක අපරාධ විමර්ශන කොට්ඨාසයේ අධ්‍යක්ෂ, ජ්‍යෙෂ්ඨ පොලිස් අධිකාරි හේමාල් ප්‍රශාන්ත ඇතුළු විමර්ශන නිලධාරින් කණ්ඩායම සිය විමර්ශනවල ප්‍රගතිය වාර්තා කළේය.
අතිරේක මහෙස්ත්‍රාත්වරිය හමුවේ විමර්ශනවලට අදාළව සාක්ෂි ලබාදීම සිදුකළේ උප පොලිස් පරීක්ෂක මනෝජ් ගයන්ත මහතාය.
“ස්වාමිනි, ව්‍යාපාරික දිනේෂ් ෂාෆ්ටර් මහතා මියගිය ඉකුත් වසරේ දෙසැම්බර් 15 වන දිනට අදාළව ඔහුගේ මල්පාර නිවසේ සිට බොරැල්ල සුසාන භූමිය දක්වා වූ CCTV කැමරා දර්ශන රැසක් අපේ පරීක්ෂාවට ලක්වුණා. ඔහු නිවසින් පිටවෙලා තිබෙන්නේ දහවල් 2ට පමණ. එම නිවසේ ගේට්ටුවේ CCTV දර්ශන සමීපව පරීක්ෂා කිරීමේදී පෙනී ගියා ෂාෆ්ටර් මහතා මියයන අවස්ථාවේ ගෙල පෙදෙසේ තිබී හමුවූ කේබල් පිටයට සමාන කේබල් පටියක් ඔහු නිවසින් පිටවන අවස්ථාවේ රියදුරු අසුනට යාබද අසුනේ තිබූ බව. ස්වාමිනි, එම කේබල් පටිය DISH TV කේබල් පටියක් බව අප විසින් හඳුනාගනු ලැබුවා.”
“එමෙන්ම ස්වාමිනි ෂාෆ්ටර් මහතාගේ ගෙල පෙදෙසේ තිබු මෙම කේබල් පටියට සමාන කේබල් පටියක් ඔහුගේ නිවසේ බිරිඳගේ මවගේ කාමරයට අතුළුවන ආලින්ද කොටසේ වැඩ කොකරන රූපවාහිනි යන්ත්‍රණයක තිබී හමුවුණා. මෙම කේබල් පටි දෙකේම සමානකමක් අප නිරීක්ෂණය කළ බැවින් අපි ඒවා රජයේ රස පරීක්ෂකවරයාගෙන් වාර්තාවක් ලබාගැනීමට යොමුකළා.”
“එමෙන්ම මරණකරුගේ ගෙල පෙදෙසේ තිබු DISH TV කේබල් පටි අංක 01 සහ 02 ලෙස අංකනය වී තිබු අතර නිවසේ තිබි හමුවූ DISH TV කේබල් පටි අංකනය වී තිබුනේ අංක 03 සිට 41 දක්වායි. එමෙන්ම ස්වාමිනි මරණකරුගේ දෑත බැඳ තිබු ZIP TIE පටිය කෙරෙහිද අපගේ විශේෂ අවධානයක් යොමුවුණා. මන්ද ඊට සමාන ZIP TIE පටි 11ක් දිනේෂ් ෂාෆ්ටර් මහතාගේ නිවසේ තිබී සොයා ගත්තා.”
අතිරේක මහෙස්ත්‍රාත්වරිය හමුවේ කරුණු දැක්වූ විමර්ශන නිලධාරියා වැඩිදුරටත් මෙලෙස සාක්ෂි ලබාදුනි.
“ස්වාමිනි, මරණකරු මල්පාර නිවසේ සිට බොරැල්ල සුසාන භූමිය දක්වා ගමන් ගන්නා අතරතුර ආපන ශාලාවකින් පැටිස් එකක් සහ පේස්ට්‍රියක් මිලට අරගෙන තිබෙනවා. පසුව අනුභව නොකළ පේස්ට්‍රියක් ඔහුගේ මෝටර් රථයේ තිබී සොයා ගැනුනා. එමෙන්ම ස්වාමිනි මොහු නිවසේ සිට බොරැල්ල කනත්ත දක්වා යන අතරතුර වෙනත් කිසිදු මෝටර් රථයක් හෝ පුද්ගලයෙකු ඔහු ලුහුබැදි බවක් විමර්ශනවලදී නිරීක්ෂණය වුනේ නැහැ.”
“එමෙන්ම වෙනත් කිසිදු පුද්ගලයෙකු මෙම මෝටර් රථයේ ගමන් ගත් බවක්ද අපට අනාවරණය වුනේ නැහැ. ස්වාමිනි, මරණකරුගේ මෝටර් රථය කනත්තට ඇතුළුවන අවස්ථාවේ බොරැල්ල කනත්තේ සේවය කරමින් සිටි පුද්ගලයින් දෙදෙනෙකුගෙන් අප විමර්ශනවලදී ප්‍රකාශ ලබා ගත්තා. ඔවුන් ප්‍රකාශ ලබාදෙමින් සඳහන් කළා කිසිදු බාහිර පුද්ගලයෙකු මෝටර් රථයට නගින හෝ බසින දර්ශනයක් නිරීක්ෂණය නොවු බව. පසුව සුදු මහත පුද්ගලයෙකු කාර් රථයේ පිටුපස සිට ඉදිරියට ගමන් කරනවා ඔවුන් දැක තිබෙනවා.”
“එම පුද්ගලයා මෝටර් රථයේ දොර හැර කෑ ගැසීමත් සමඟයි මෙම සේවකයින් දෙදෙනා එම ස්ථානයට ගොස් ඇත්තේ. එවිට ඔවුන් දැක තිබෙනවා රියදුරු අසුනේ සිටී තැනැත්තාගේ බෙල්ල වම් පැත්තට බරවෙලා, ඇදගෙන සිටී ටී ෂර්ටයේ වමනය තිබූ ආකාරයක්. දෑත් පටියකින් බැඳලා පපු ප්‍රදේශයේත් වයරයක් තිබී තිබෙනවා. පසුව එම පුද්ගලයින් දෙදෙනාගෙන් එක් අයෙකු සුදු උස මහත පුද්ගලයාත් සමග මෝටර් රථයේ සිටී තැන්ත්තාව රෝහල්ගත කර තිබෙනවා.”
මෙහිදී දිනේෂ් ෂාෆ්ටර් මහතා මරණය සිදුවන අවස්ථාව වනවිට ඔහු සිටි මානසික තත්ත්වය සම්බන්ධයෙන්ද විමර්ශකයා අධිකරණයට සාක්ෂි ලබාදී තිබේ.
“ස්වාමිනි, මෙම මරණයට අදාළව මරණකරුගේ පුද්ගලික සහකරුගෙන් සහ බිරිඳගෙන්ද ප්‍රකාශ සටහන් කර ගත්තා. ප්‍රශ්න කිරීම්වලදී අනාවරණය වුණා මියගිය දිනේෂ් ෂාෆ්ටර් නැමැත්තා කලක සිට සිත් තැවුලෙන් පසුවූ බව. ඔහු අධික කේන්ති ගන්නා තත්ත්වයකින්, ව්‍යාපාර කෙරෙහි උනන්දුවක් නැති අයුරින් හැසිරිලා තිබෙනවා. දිනේෂ් ෂාෆ්ටර් විශාදය නැමැති රෝගයෙන් පෙළීම නිසා විශේෂඥ මනෝවෛද්‍ය නිල් ප්‍රනාන්දු මහතාගෙන් ප්‍රතිකාර ලබාගෙන තිබෙනවා. ඔහු ව්‍යාපාරිකයින් කිහිප දෙනෙකු සමග මුදල් ගනුදෙනු කර විශාල වශයෙන් පාඩු ලබා ඇති බව ඔහුගේ ජංගම දුරකතන පරීක්ෂා කිරීමේදී පෙනී ගියා.”
“කෙසේ නමුත් එකී කිසිදු පුද්ගලයෙකු හෝ ඔවුන්ගේ සමීපතමයෙකු මෙම මරණය සිදුවූ දින බොරැල්ල කනත්ත ආසන්න ප්‍රදේශයට ආ ගිය බවක් නිරීක්ෂණය වුනේ නැහැ.
ෂාෆ්ටර්ට වැඩිම මුදල් පාඩුව සිදුවෙලා තියෙන්නේ බ්‍රයන් තෝමස්ගෙන්. ඔවුන් දෙදෙනා අතර ගැටුම්කාරී තත්ත්වයක් පවා ඇතිවී තිබෙනවා. ඒ සම්බන්ධයෙන් නඩුවකුත් පවතිනවා. බ්‍රයන් තෝමස්ගෙන් පමණක් මරණකරුට සිදුවී ඇති පාඩුව රුපියල් කෝටි 140කට වැඩියි. කෙසේ වුනත් ස්වාමිනි, මෙම මරණය සම්බන්ධයෙන් විශේෂඥ වෛද්‍ය රූල් හක් මහතා නිකුත් කළ පශ්චාත් මරණ පරීක්ෂණය වාර්තාවේ දැක්වෙන්නේ මෙම මරණය සයනයිඩ් ශරීරගතවීමෙන් සිදුවූ මරණයක් බවය.”
“එමෙන්ම අප කළ විමර්ශනවලදී මෙම මරණය සඳහා ආගන්තුක පුද්ගලයෙකු පැමිණි බවක් හෝ මරණය සිදුකළ බවක් අනාවරණය වන්නේ නැහැ. කෙසේ නමුත් අප තවදුරටත් විමර්ශන ඉදිරියට පවත්වාගෙන යනවා.”
මෙහිදී දිනේෂ් ෂාෆ්ටර් මහතාගේ බිරිඳ ඇතුළු පවුලේ පාර්ශ්වය වෙනුවෙන් පෙනී සිටි ජනාධිපති නීතිඥ අනුජ ප්‍රේමරත්න මහතා කියා සිටියේ මෙම මරණයට සම්බන්ධ වෛද්‍ය වාර්තාවල පරස්පරතා රැසක් තමා නිරීක්ෂණය කරන බවය.
ඉදිරිපත් වූ කරුණු සලකා බැලු අතිරේක මහෙස්ත්‍රාත් රජීන්ද්‍රා ජයසූරිය මහත්මිය විමර්ශන තවදුරටත් සිදුකෙරෙන බැවින් නඩුව ලබන මස 08 වනදා දක්වා කල් තැබීය.
(අද දෙරණ)
