ජාතික ක්‍රිකට් තේරීම් කමිටුවේ සභාපති ප්‍රමෝද්‍ය වික්‍රමසිංහ මහතා ඊයේ (27) දෙවැනි දිනයටත් ක්‍රීඩාවලට සම්බන්ධ වැරැදි වැළැක්වීමේ විශේෂ විමර්ශන ඒකකයට කැඳා පැය පහහමාරක කාලයක් ප්‍රකාශ ලබාගත් බව එම ඒකකයේ ප්‍රධානි සහකාර පොලිස් අධිකාරී ජයනාත් වනසිංහ මහතා කියයි.
ඒ මහතා මාධ්‍ය වෙත අදහස් දක්වමින් මේ බව පවසා ඇති අතර ශ්‍රී ලංකා ක්‍රිකට් කණ්ඩායමේ පසුබැස්ම කුමන්ත්‍රණකාරී වැඩපිළිවෙළක ප්‍රතිඵලයක් බව සඳහන් කරමින් පසුගියදා නිකුත් කළ මාධ්‍ය නිවේදනය පිළිබඳ කරුණු විමසීමට ප්‍රමෝද්‍ය මහතා කැඳවා තිබිණි.
නීතිඥ ශිරාල් ලක්තිලක මහතා සමඟ විශේෂ විමර්ශන ඒකකය වෙත පැමිණි ජාතික ක්‍රිකට් තේරීම් කමිටුවේ සභාපතිවරයා ඊයේ සිදු කරනු ලැබුවේ පසුගිය සතියේ ඔහු විසින් ලබා දුන් ප්‍රකාශයේ ඉතිරි කොටස බව ද සහකාර පොලිස් අධිකාරිවරයා වැඩිදුරටත් පවසා තිබේ.
‘ඊයේ දහවල් 12.00 පමණ ප්‍රමෝද්‍ය විශේෂ විමර්ශන ඒකකයට පැමිණි අතර ඔහු පස්වරු 5.30 පමණ දක්වා කාලයක් ඇතුළත ඔහුගේ ප්‍රකාශය ලබා දුන්නා. අපට නැවත ඔහුගෙන් යම් යම් තහවුරු කිරීම් අවශ්‍ය වුවහොත් නැවත කැඳවීමට සිදු වෙනවා. නමුත් දැනට මේ තිබෙන තොරතුරු අධ්‍යයනය කරලා නීතිපතිතුමාට වාර්තාවක් අපි ලබා දෙනවා.‘ ක්‍රීඩාවලට සම්බන්ධ වැරැදි වැළැක්වීමේ විශේෂ විමර්ශන ඒකකයේ ප්‍රධානියා වැඩිදුරටත් පවසා ඇත.
ඊයේ දිනයේදී සිය ප්‍රකාශය ලබා දෙන අතරතුර ප්‍රමෝද්‍ය වික්‍රමසිංහ සමාජ මාධ්‍යජාලා හි පළවු යම් යම් තොරතුරු විශේෂ විමර්ශන ඒකකයේ ස්ථානාධීපතිවරයාට ලබා දී ඇතැයි ද සහකාර පොලිස් අධිකාරිවරයා වැඩිදුරටත් සඳහන් ක‍ළේය.
පසුබැස්මට හේතු වූ කුමන්ත්‍රණකාරී වැඩපිළිවෙළ පසුපස ක්‍රිකට් ආයතනයේ බලය සඳහා සබැඳි පුද්ගලයන් ද තරග පාවාදීමේ සූදුවේ නිරතව සිටින තැරුව්කරුවන් ද ආත්මාර්ථකාමීත්වය පදනම්ව ජාතික කණ්ඩායම තුළ තම ස්ථානය තහවුරු කර ගැනීමට වෙර දරන පුද්ගලයන් ද සිටින බව තමාට නිරීක්ෂණය වන්නේ යැයි ප්‍රමෝද්‍ය වික්‍රමසිංහ සිය මාධ්‍ය නිවේදනයෙන් සඳහන් කර තිබිණි.
‘ඉදිරියේ දි මේ සම්බන්ධ ප්‍රකාශ ලබාගැනීමට තව කාවහරි ගෙන්වීම තීරණය වෙන්නේ මේ කරුණු සියල්ල අධ්‍යයනය කිරීමෙන් පසුවයි. දැනට එවැනි තීරණයක් අරන් නෑ. කොහොම වුණත් අපේ වාර්තාව ඉදිරිපත් කරන්නේ නීතිපතිවරයාටයි. නීතිපතිවරයා තමයි තීරණය කරන්නේ මේ සම්බන්ධව ගත යුතු පියවර මොකක්ද කියලා.‘ සහකාර පොලිස් අධිකාරිවරයා වැඩිදුරටත් කීවේය.
