Connect with us

පුවත්

පාස්ටර් ජෙරම්ට හා බිරියට අයත් ගිණුම්වල කෝටි 1,226ක් 

Published

on

ෆෙඩ්රික් ක්‍රිස්ටෝපර් ජෙරම් ප්‍රනාන්දු නොහොත් ෆාස්ටර් ජෙරම් යන අයට අයත් රජයේ සහ පුද්ගලික බැංකු 12ක ගිණුම්වලට රුපියල් කෝටි 1226ක් ලැබී ඇති බව අපරාධ පරීක්ෂණ දෙපාර්තමේන්තුව විසින් අධිකරණයට කරුණු වාර්තා කර තිබේ.

මේ ගිණුම් ජෙරම්ගේ පුද්ගලික ගිණුම්, ඔහුට අයත් පුද්ගලික ව්‍යාපාරයේ ගිණුම්, ඔහුගේ යාඥා සිදු කරනු ලබන පල්ලියට අයත් ගිණුම් සහ ඔහුගේ බිරිඳ වන මෙලනි ඩයන් වැන්කියුලස්බර්ග්ට අයත් ඒවාය.

අන්තර්ජාලය ඔස්සේ අන්‍ය ආගමිකයන් හා ආගමික ඇදහිලි විවේචනය කරමින් ජාතීන් මෙන්ම ආගමිකයන් අතර සංහිඳියාව බිඳහෙළන දේශන පැවැත්වූ බව කියන ෆෙඩ්රික් ක්‍රිස්ටෝපර් ජෙරම් ප්‍රනාන්දු නොහොත් ෆාස්ටර් ජෙරම් පිළිබඳව පසුගිය 7 වැනිදා සිට 12 වැනිදා දක්වා අපරාධ පරීක්ෂණ දෙපාර්තමේන්තුව විසින් සිදු කළ සෝදිසි මෙහෙයුම්වලට අනුව ගොනු කර ඇති වාර්තාවේ මේ බව දක්වා තිබේ.

ෆාස්ටර් ජෙරොම් දේශන පවත්වා ඇති කටුනායක වේයන්ගොඩ පාරේ පිහිටි මිරකල් ඩෝම් ආයතනය ස්ථාපිත කිරීම සඳහා රුපියල් මිලියන 6100ක් වැය කරමින් පුද්ගලයන් 5000කට එකවර ආසන වෙන් කර ඇති බවට අපරාධ පරීක්ෂණ දෙපාර්තමේන්තුව සිදු කළ විමර්ශනවලදී වැඩිදුරටත් අනාවරණය වී තිබේ.

ඒ සම්බන්ධයෙන් සිදු කළ විමර්ශන සඳහා කොටුව මහේස්ත්‍රාත් අධිකරණයෙන් ලබා ගත් සෝදිසි වරෙන්තුවක් මත සිදු කළ සෝදිසි මෙහෙයුම සම්බන්ධයෙන් අධිකරණයට වැඩිදුර වාර්තාවක් ගොනු කරමින් ඔවුන් මේ බව කියා තිබේ.

මෙම මුදල් ලැබුණු ආකාරය සම්බන්ධයෙන් මුදල් විශුද්ධිකරණ පනත යටතේ විමර්ශන සිදු කරන බව අපරාධ පරීක්ෂණ දෙපාර්තමේන්තුව අධිකරණයට දන්වා ඇත.

එමෙන්ම පසුගිය මාර්තු මාසයේ සිට මැයි මාසය දක්වා දේශන 10ක් මිරකල් ඩෝම් ආයතනයේ පවත්වා ඇති බවත්, එහි තිබී සංස්කරණය නොකළ සීඩී තැටි දෙකක් සිය භාරයට ගත් බවත් එම වාර්තාවේ සඳහන් වේ.

එහි සිටි එම ආයතනයේ මාධ්‍ය අංශ ප්‍රධානී සචින් ධනුෂ්ක පුංචිහේවා යන අයගේ ප්‍රකාශ සටහන් කරගෙන තිබෙන අතර එම ආයතනයේ ස්ථාපිත කර ඇති සීසීටීවී දර්ශන එම අවස්ථාවේ නොමැති බවට අශෙල් මේනක ප්‍රනාන්දු යන අය සඳහන් කර තිබේ.

එම දර්ශන කඩිනමින් ලබා දෙන බවට ඔහුගේ ප්‍රකාශයේ සඳහන් කර ඇතත් ඒවා මේ දක්වා ලැබී නැති බවත් මෙම විමර්ශනයට අවශ්‍ය සාක්ෂි ඔවුන් චේතනාන්විතව වසන් කරන බැවින් හෙට (26) සචින් ධනුෂ්ක පුංචිහේවා යන අයට නොතිසියක් නිකුත් කරන ලෙස වැඩිදුර වාර්තාව ඉදිරිපත් කරමින් අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය.

එමෙන්ම පසුගිය 18 වනදා දේවගැති ජෙරොම් යන අයට අයත් බව කියන කිංග්ස් රිවිවල් චර්ච් ආයතනය අධිකරණයෙන් ලද සෝදිසි වරෙන්තුව මත සෝදිසි කළ බවත් එම ආයතනය 2001 වසරේ සිට භාෂා ත්‍රිත්වයෙන්ම දේශනා පවත්වා ඇති බවත් එහි ස්ථිර සාමාජිකයන් 1200ක් සිටින බවත් පොලිසිය ඉදිරිපත් කළ වැඩිදුර වාර්තාවේ දක්වා ඇත. 

එහි පවත්වනු ලබන දේශනා පටිගත කරනු නොලබන බවද එහි සිටි භාරකරු වන කේ. ආර්. ඒ. සී. කුලසේකර යන අය සඳහන් කර ඇත.

අධිකරණ නියෝග ප්‍රකාරව ලබා ගත් සෝදිසි වරෙන්තුවලට අනුව මෙනේරිගම ගල්කිස්ස ස්ථානයක්ද සෝදිසි කළ බවත් එමෙන්ම මෙම සැකකාර දේවගැතිවරයා සිදු කළ ප්‍රකාශ සම්බන්ධයෙන් කල්මුණේ මරදගහමුල ජමියතුල් උලමා සංවිධානයේ සාමාජිකයන් විසින්ද ස්වේච්ඡාවෙන් පැමිණ ප්‍රකාශ ලබා දී ඇති අතර එහි සභාපතිවරයා වන පී.එම්.එස්.ඒ. අන්සර් මවුලානා යන අය මෙම දේවගැතිවරයා ඉස්ලාම් ආගම සහ එහි භක්තිකයන් සම්බන්ධයෙන් වෛරී ප්‍රකාශ සිදු කර ඇති බවට ප්‍රකාශයක් ලබා දී ඇති බවද අපරාධ පරීක්ෂණ දෙපාර්තමේන්තුව විසින් නිකුත් කළ වැඩිදුර වාර්තාවේ දක්වා ඇත.

මේ සම්බන්ධයෙන් එම දේවගැතිවරයාගේ සමාගමේ සංවිධායිකාවක වන රුවනි නිවන්තිකා, වවුනියාව උකුලංකුලම මහේන්ද්‍රරාජා මයුරදන්, කොළඹ 02 පදිංචි මොහොමඩ් අස්ලාම් ඔස්මන්, මොරටුව පදිංචි ගයත්‍රි සංජීව, බෞද්ධ කටයුතු කොමසාරිස් ජනරාල්වරයා, හින්දු, මුස්ලිම්, ක්‍රිස්තියානි ආගමික කටයුතු දෙපාර්තමේන්තුවල අධ්‍යක්ෂකවරුන්ගෙන් ප්‍රකාශ සටහන් කරගෙන ඇති බවත් අපරාධ පරීක්ෂණ දෙපාර්තමේන්තුව ගොනු කළ වැඩිදුර වාර්තාවේ දක්වා ඇත.

මහේස්ත්‍රාත්වරයා මෙලෙස අවසර ලබා දුන්නේ අපරාධ පරීක්ෂණ දෙපාර්තමේන්තුව මෝසමක් ගොනු කරමින් සිදු කළ ඉල්ලීමක් සලකා බැලීමෙන් අනතුරුවය.

ඔහුගේ සහ අනෙකුත් පිරිස්වලට අයත් බැංකු හරහා මුදල් කෝටි ගණනින් හුවමාරු වී ඇති බවට අපරාධ පරීක්ෂණ දෙපාර්තමේන්තුව සිදු කළ විමර්ශනවලින් අනාවරණය වී ඇති අතර ඊට අදාළව සිදු කරනු ලබන වැඩිදුර විමර්ශන සඳහා මෙම නියෝග ඉල්ලා සිටියේය.

අපරාධ පරීක්ෂණ දෙපාර්තමේන්තුව විසින් පසුගිය මැයි 15 වැනිදා සැකකාර පූජකවරයා සම්බන්ධයෙන් කොටුව මහේස්ත්‍රාත් අධිකරණයට කරුණු වාර්තා කරමින් විදේශ ගමන් තහනමක් ඉල්ලා සිටි අතර ඊට අවසර ලැබුණු අතර ඒ වනවිටත් ඊට පෙරදින (මැයි මස 14) සැකකාර පූජකවරයා සිංගප්පූරුව බලා පිටත්ව ගොස් තිබුණි.

බෞද්ධ තොරතුරු කේන්ද්‍රයේ විධායක අධ්‍යක්ෂක පූජ්‍ය අගුළුගල්ලේ සිරිවිජයනන්ද හිමියන් පොලිස්පතිවරයාට සිදු කළ පැමිණිල්ලකට අනුව අපරාධ පරීක්ෂණ දෙපාර්තමේන්තුවේ ඩිජිටල් වෝහාරික විද්‍යාගාරය විසින් විමර්ශන සිදු කරනු ලබයි.

පුවත්

උතුරු – නැගෙනහිරට සංවර්ධනයේ ප්‍රතිලාභ දෙන බව ජනපති කියයි

Published

on

By

යුද්ධය නිසා උතුරු නැගෙනහිරට බලපෑ ප්‍රශ්න කඩිනමින් අවසන් කර එම ජනතාවට ද සංවර්ධනයේ ප්‍රතිලාභ ලබා දෙන බව ජනාධිපති රනිල් වික්‍රමසිංහ මහතා පවසයි.

උතුරු පළාත තුළ උසස් මට්ටමේ සෞඛ්‍ය සේවාවක් සහතික කිරීම වෙනුවෙන් යාපනය රෝහල නුදුරේදීම ජාතික රෝහලක් බවට පත් කිරීමට කටයුතු කරන බවත් දකුණු පළාත තුළ පැවති දීර්ඝකාලීන අවශ්‍යතාවයක් ඉටු කරමින් කරාපිටිය රෝහල ජාතික රෝහලක් බවට පත් කිරීමට අදාළ කැබිනට් අනුමැතිය හිමිවී ඇති බවද ජනාධිපතිවරයා සඳහන් කළේය.

ජනපතිවරයා යාපනය විශ්වවිද්‍යාලයේ වෛද්‍ය පීඨයේ ඉදිකළ සායනික පුහුණු සහ පර්යේෂණ අංශ ගොඩනැගිල්ල විවෘත කිරීමේ අවස්ථාවට අද (24) පෙරවරුවේ මේ බව පැවසීය.

මේ අතර “උරුමය ”  වැඩසටහන යටතේ යාපනය දිස්ත්‍රික්කයේ ප්‍රාදේශීය ලේකම් කාර්යාල 15ම ආවරණය වන පරිදි සින්නක්කර ඔප්පු 1,286ක් ජනාධිපති රනිල් වික්‍රමසිංහ මහතා අතින් ජනතාවට ලබාදීම අද යාපනයේදී සිදුකෙරිණි.

එමෙන්ම උතුරු පළාතට අයත් මුලතිව්, කිලිනොච්චිය, වවුනියාව හා මන්නාරම දිස්ත්‍රික්කවලට අදාළව “උරුමය” වැඩසටහන යටතේ සින්නක්කර ඔප්පු 13,858ක් ඉදිරියේදී ලබා දීමට නියමිතව තිබේ.


Continue Reading

පුවත්

පැපුවා නිව් ගිනියාවේ දරුණු  නායයාමක්

Published

on

By

පැපුවා නිව් ගිනියාවේ දුෂ්කර ගම්මාන හයකට බලපෑම් එල්ල කරමින් ඇති වූ නායයෑමෙන් ජීවිත රැසක් අහිමි වී ඇතැයි විදෙස් මාධ්‍ය වාර්තා කර තිබේ.

ඊයේ (23) සිදු වූ මෙම නායයෑමෙන් නිවාස 100කට වැඩි ගණනක් පස්වලින් සම්පූර්ණයෙන්ම යට වී ඇති බව විදෙස් වාර්තාවල දැක්වේ.

මෙහිදී සිදු වී ඇති ජීවිත හානි ගණන හෝ සුන්බුන් අතර කොපමණ පිරිසක් සිරවී ඇති ද යන්න නිශ්චිතවම තවමත් ප්‍රකාශ කළ නොහැකි බවද පැවසේ.

මෙම නායයෑම සිදු වූ  Enga නම් ප්‍රදේශයේ ආණ්ඩුකාරවරයා මාධ්‍යයට පවසා ඇත්තේ මෙය මීට පෙර සිදුනොවූ ස්වභාවික ව්‍යවසනයක් බවය.

එමෙන්ම පැපුවා නිව් ගිනියාවේ අග්‍රාමාත්‍ය James Marape පවසා ඇත්තේ, මළ සිරුරු ගොඩගැනීම සඳහා අවශ්‍ය සහන සේවා සැපයීමට සහ යටිතල පහසුකම් සඳහා අදාළ ස්ථානයට ආපදා නිලධාරීන් යොමු කර ඇති බවය.

Continue Reading

පුවත්

හලාවත ගොල්ෆ් පිටියක් හදන්න සැලසුම් කරයි

Published

on

By

හලාවත ගොල්ෆ් පිටියක් ඉදිකිරීමට සැලසුම් කරන බව කැබිනට් ප්‍රකාශක බන්දුල ගුණවර්ධන මහතා  නිවේදනය කළේය.

ඒ ඉරණවිල හා හලාවත ප්‍රදේශය සංචාරක කේන්ද්‍රස්ථානයක් ලෙස සංවර්ධනය කිරීමේ සමස්ත උපාය මාර්ගයේ කොටසක් ලෙස බවද ඔහු කීය.

මේවන විට ශ්‍රී ලංකාව තුළ දැනටමත් කොළඹ, මහනුවර සහ නුවරඑළියේ ගොල්ෆ් පිටි කිහිපයක් තිබේ.

සිදුරු 18කින් යුත් ගොල්ෆ් පිටි පහක් සහ සිදුරු 9කින් යුත් ‍ගොල්ෆ ක්‍රීඩාංගණ කිහිපයක් ද ශ්‍රී ලංකාව සතුවේ.

ගොල්ෆ් පිටියට අමතරව හලාවත සහ බිංගිරිය අතර සම්බන්ධක මාර්ගයක් ඉදිකෙරෙන අතර ඉන් අපනයන කලාපයක් පුළුල් කරන බව ද අමාත්‍ය ගුණවර්ධන මහතා පවසයි.

හලාවත – ඉරණවිල සංචාරක මධ්‍යස්ථානයේ සංවර්ධන කටයුතු බිංගිරිය ඒකාබද්ධ සංවර්ධන සැලැස්මට සම්බන්ධ කාර්ය සාධක බලකායක් මගින් අධීක්ෂණය කිරීමට නියමිත බවද පැවසේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved