පානදුර පිංවත්ත ප්‍රදේශයේදී වෙඩි තබා ඝාතනයට ලක්වූ කෝටිපති ව්‍යාපාරිකයාගේ ඝාතනයට අදාළව ඔහුගේ පළමු බිරිඳ ඇතුළු 15 දෙනෙකුගෙන් ප්‍රකාශ සටහන් කරගෙන ඇතැයි වාර්තා වේ.

කඩවත කිරිල්ලවල ප්‍රදේශයේ පදිංචි සුරාසල් හිමිකරුවකු වූ අනුරාධ සම්පත් කුඩාගම නමැති 52 හැවිරිදි ව්‍යාපාරිකයකු පසුගිය 28 වැනිදා උදෑසනය මෙලෙස ඝාතනයට ලක්ව තිබිණි.

එම ව්‍යාපාරිකයා සිය පළමු විවාහයේ බිරිඳ අත්හැරීමෙන් පසුව කළුතර ප්‍රදේශයේ දෙදරු මවක් සමගින් පිංවත්ත ප්‍රදේශයේ නිවසක ජීවත්ව ඇති බවත්, වෘත්තියෙන් ගුරුවරියක් වන ඇය සහ ඇගේ දරුවන් පාසල් හැරලා පිංවත්තේ ඉදිවෙමින් පවතින ව්‍යාපාරිකයාගේ නිවස අසලට පැමිණි අවස්ථාවේදී නන්නාදුනන යතුරුපැදිකරුවන් දෙදෙනකු විසින් ඔහුව වෙඩි තබා ඝාතනය කර තිබිණි.

එම වෙඩි ප්‍රහාරයෙන් දකුණු කම්මුලින් ඇතුළු වූ වෙඩි උණ්ඩ ගෙල හරහා වම් කිහිල්ලෙන් ඉවතට පැන මරණකරු මෝටර් රථයේම මියගොස් තිබිණි.

එම වෙඩික්කරුවන් පැමිණි යතුරුපැදිය වාද්දුව වේරගම ප්‍රදේශයේ අත්හැර දමා ගොස් තිබියෙදී හමුවූ අතර එහි අංක තහඩු ව්‍යාජ ඒවා බව විමර්ශන මගින් හෙළිවී තිබිණි.

ව්‍යාපාරිකයාගේ පළමු විවාහක බිරිඳ හා ඇයගේ පාර්ශ්වය සමගින් මෑතකදී ඇතිකරගත් ගැටලුවක් මත මෙම ඝාතනය සිදුවූයේද යන්න පිළිබඳව ද පොලිසිය විමර්ශන සිදුකර සිටියි. 

එමෙන්ම ඝාතනයට ලක්වූ ව්‍යාපාරිකයා පිංවත්තේ ඉඩම සම්බන්ධයෙන් තවත් පුද්ගලයකු හා ආරවුලක්ද ඇතිකරගෙන ඇතැයිද එකී පුද්ගලයාගේ කොන්ත්‍රාත්තුවක් මත මෙම ඝාතනය සිදුවී ඇත්දැයි සොයා වැඩිදුර විමර්ශන සිදුකෙරේ.

මෙම ඝාතනයට අදාළව ප්‍රකාශ ලබා ගත් පිරිස අතර ව්‍යාපාරිකයාගේ බිරිඳ, ඔහු හා ජීවත්වූ කාන්තාව, ඔහුගේ සේවකයන් ඇතුළු 15 දෙනෙකු සිටිති.

ඝාතනය සම්බන්ධයෙන් මෙතෙක් කිසිවකු හෝ අත්අඩංගුවට ගෙන නොමැති අතර පානදුර කොට්ඨාස භාර ජ්‍යෙෂ්ඨ පොලිස් අධිකාරීවරයාගේ අධීක්ෂණය යටතේ වැඩිදුර විමර්ශන සිදු කෙරේ.

සබැඳි පුවත්

පිංවත්තේදී තවත් අයෙකුට වෙඩි!https://sinhala.srilankamirror.com/news/%e0%b6%b4%e0%b7%92%e0%b6%82%e0%b7%80%e0%b6%ad%e0%b7%8a%e0%b6%ad%e0%b7%9a%e0%b6%af%e0%b7%93-%e0%b6%ad%e0%b7%80%e0%b6%ad%e0%b7%8a-%e0%b6%85%e0%b6%ba%e0%b7%99%e0%b6%9a%e0%b7%94%e0%b6%a7-%e0%b7%80/