උතුරු ශ්රී ලංකාවේ බිම් බෝම්බ ඉවත් කිරීමේ මානුෂීය කටයුතු සඳහා ජපාන රජය විසින් ස්කැවිතා මානුෂීය ආධාර සහ සහන ව්යාපෘතිය [Skavita Humanitarian Assistance and Relief Project (SHARP)] වෙත ඇමරිකානු ඩොලර් 547,443 (ආසන්න වශයෙන් රුපියල් මිලියන 170) ක් ලබා දී ඇත.
මේ සඳහා වන ආධාර ප්රදාන කොන්ත්රාත්තුව 2023 අගෝස්තු මස 11 වන දින කිලිනොච්චි දිස්ත්රික්කයේ SHARP කඳවුරේදී ජපන් තානාපති – මිසුකොෂි හිදෙඅකි මහතා සහ SHARP හි අධ්යක්ෂ /ක්ෂේත්ර වාර්තාකරණ නිලධාරී මේජර් ජෙනරාල් (විශ්රාමික) සුමති රන්ජන් බාලසූරිය මහතා අතර අත්සන් කරන ලදී.
ශ්රී ලංකාවේ ප්රතිසන්ධානය සහ තිරසාර සංවර්ධනය ප්රවර්ධනය කිරීම සඳහා ගැටුම්වලින් පීඩාවට පත් ප්රදේශයන් සඳහා අඛණ්ඩව සහාය දැක්වීමට ජපානයේ කැපවීම තානාපති මිසුකොෂි මහතා ප්රකාශ කළේය.
ශ්රී ලංකා බිම් බෝම්බ ඉවත් කිරීමේ ක්රියාකාරී වැඩසටහන ආරම්භයේ සිටම ජපන් රජය බිම් බෝම්බ ඉවත් කිරීමේ කටයුතු සඳහා අඛණ්ඩව සහය දක්වන අතර, මේ වන විට ලබා දී ඇති මුළු ආධාර ප්රමාණය ඇමෙරිකානු ඩොලර් මිලියන 43 ඉක්මවයි. ශ්රී ලංකාව වෙනුවෙන් වන ජපානයේ නිල සංවර්ධන ආධාර ප්රතිපත්තියේ ප්රමුඛතා ක්ෂේත්රවලින් එකක් වන්නේ ගැටුම්වලින් පීඩාවට පත් කලාප සංවර්ධනය කිරීමයි.
මෙම මූල්ය වර්ෂයේ දී මෙම ව්යාපෘතිය මගින් කිලිනොච්චි, මුලතිව් දිස්ත්රික්කවල අපවිත්ර වූ ඉඩම් එළි පෙහෙළි කිරීමෙන් අභ්යන්තරව අවතැන් වූ පුද්ගලයන් 400කට අධික ප්රමාණයක් නැවත පදිංචි කිරීමටත්, සෘජුව හෝ වක්රව පුද්ගලයන් 2,300කට අධික පිරිසකගේ ජීවනෝපාය වැඩිදියුණු කිරීමටත් හැකිවනු ඇතැයි අපේක්ෂා කෙරේ.
මෙම ප්රදානය ලබාදීම පිළිබඳව අදහස් දක්වමින් මේජර් ජෙනරාල් (විශ්රාමික) සුමති රන්ජන් බාලසූරිය මහතා ප්රකාශ කළේ;
“SHARP ආයතනය පටන් ගැන්මේ සිට, 2016 වසරේ බිම් බෝම්බ ඉවත් කිරීමේ මෙහෙයුම් ආරම්භ කර ඉන් අනතුරුව 2021 දක්වා වසර 6ක් අඛණ්ඩව SHARP වෙත එකම පරිත්යාගශීලියා ලෙස කටයුතු කරමින් අප වෙත දැක්වූ විශ්වාසය පිළිබඳව ජපාන තානාපති කාර්යාලයට SHARP කෘතඥ වන අතර, එය ඉතා හෘදයාංගමව අගය කරයි. 2023 ජූලි වන විට, ජපාන රජයේ ආධාර උපයෝගී කරගනිමින්, SHARP විසින් වර්ග මීටර් 2,414,199 ක් පූර්ණ ලෙස නිදහස් කර පුද්ගල නාශක බිම්බෝම්බ 11,471 ක්, යුධ ටැංකි නාශක බිම්බෝම්බ 168 ක්, පුපුරා නොගිය යුධෝපකරණ [unexploded ordnance (UXOs)] 4,166 ක් සහ සුළු අවි පතරොම් [small arms ammunition (SAAs) ] 19,647 ට වැඩි සංඛ්යාවක් ඉවත් කර ඇත මේ මගින් මෙහි පදිංචි වී සිටින පවුල් 2,596 කට අධික සංඛ්යාවක් නැතහොත් පුද්ගලයන් 10,300 ක් සෘජුව සහ වක්රව ප්රතිලාභ ලබා ඇත. මෙය SHARP විසින් නිෂ්කාශණය කරන ලද මුළු ඉඩම් වලින් 90% කට වඩා වැඩි ප්රමාණයක් වේ.”
“ලබා දී ඇති අරමුදල් සම්පූර්ණයෙන්ම යුක්ති සහගත ලෙස පරිහරණය කිරීමට සහ අපගේ අනුග්රාහකයින්ගේ අභිලාෂයන් සපුරාලීම සඳහා ජපාන තානාපති කාර්යාලය සහ අනෙකුත් සියළුම ආයතන සමඟ කඩිසරව, කාර්යක්ෂමව සහ ඵලදායි ලෙස පූර්ණ සහයෝගයෙන් කටයුතු කරමින් අපගේ උපරිම ශක්තියෙන් මෙහෙයුම් දිගටම කරගෙන යාමට අප බලාපොරෙතේතු වෙමු.”
“SHARP සඳහා අනුග්රහය දැක්වීමෙන් සහ නිරන්තර දක්වන නොමසුරු සහය වෙනුවෙන් SHARP හි සියලුම සාමාජිකයින්ගේ හෘදයාංගම කෘතඥතාව සහ ස්තුතිය, ගරු තානාපති මිසුකොෂි හිදෙඅකි මහතා වෙත සහ ජපාන තානාපති කාර්යාලයේ සියලුම GGP කාර්ය මණ්ඩල සාමාජිකයින්ට මෙන්ම ජපානයේ සියලුම ජනතාව වෙත අප පිරිනැමීමට කැමතියි. ජපාන තානාපති කාර්යාලය ශ්රී ලංකාවේ බිම් බෝම්බ ඉවත් කිරීමේ ක්රියාකාරකම්වලට සහය දැක්වීමට පෙරමුණේ සිටින අතර, අපගේ රටේ ජනතාවගේ යහපැවැත්ම සඳහා ඔවුන්ගේ ඇති අඛණ්ඩ කැපවීම, සහයෝගය සහ සහාය ඉතා කෘතවේදීව සිහිකර සිටින්නෙමු.”
