චීනයේ රාජ්‍ය සංචාරයක නිරත ජනාධිපති අනුර කුමාර දිසානායක මහතා, අද (15) පස්වරුවේදී චීන ජනාධිපති ෂී ජින්පිං මහතාව හමුවිය.

චීන මහජන ශාලාව වෙත පැමිණි ජනාධිපති අනුර කුමාර දිසානායක මහතාව චීන ජනාධිපති ෂී ජින් පිං මහතා විසින් ඉතා උණුසුම් ලෙස පිළිගනු ලැබූ අතර ආචාර වෙඩිමුර සහිතව ඉතා අභිමානවත් අයුරින් එම පිළිගැනීමේ උත්සවය සංවිධානය කර තිබිණි.

අනතුරුව රාජ්‍ය නායක දෙපළ අතර සුහද කථාබහකින් පසු දෙරට අතර ද්විපාර්ශ්වික සාකච්ඡා ආරම්භ විය.

‘එක් තීරයක්, එක් මාවතක්’ ගොඩනගන්න ලංකාව කැපවෙනවා – ජනපති අනුර

මෙහිදී අදහස් දැක්වූ ජනපති අනුර කුමාර දිසානායක මහතා පවසා ඇත්තේ ‘එක් චීනයක් ප්‍රතිපත්තිය’ වෙනුවෙන් ලක් රජය පෙනී සිටින බවයි.

ශ්‍රී ලංකාවේ ස්වාධීනත්වය, ස්වෛරීභාවය සහ නීත්‍යානුකූල අයිතිවාසිකම් ආරක්ෂා කිරීම සඳහා චීනය ලබා දුන් වටිනා සහයෝගයටද ඔහු කෘතඥතාව පළ කර සිටියේය.

කලාපීය සම්බන්ධතාවය වැඩි දියුණු කිරීමට එක් තීරයක් සහ මාවතක් (Belt and Road) ව්‍යාපෘතිය ගොඩනැගීමට ශ්‍රී ලංකාව කැපවී සිටින බවත් ශ්‍රී ලංකා ජනාධිපතිවරයා මෙහිදී පවසා ඇත.

ලංකාවේ ආයෝජනය කිරීමට තවදුරටත් චීන සමාගම් වෙත ලංකාව ආරාධනා කරන බව පැවසූ දිසානායක මහතා,  යටිතල පහසුකම්, බලශක්තිය, කෘෂිකර්මාන්තය, මූල්‍ය, දරිද්‍රතාවය අවම කිරීම, ඩිජිටල් පරිවර්තනය, සංචාරක, සමුද්‍රීය කටයුතු හා පිරිස් පුහුණුව වැනි ක්ෂේත්‍ර තුළ, චීනය හා සහයෝගීතාව ශක්තිමත් කිරීමට කැමැත්ත පළ කළේය.

චීන සමූහාණ්ඩුව දශක කීපයක් තිස්සේ ශ්‍රී ලංකාව සමාජ ආර්ථික සංවර්ධනය සඳහා වැදගත් කාර්යභාර්යයක් ඉටු කර ඇති බවත්, මෙම සංචාර අපගේ රටවල් සහ ජනතාවගේ අඅන්‍යෝන්‍ය අභිවෘද්ධිය වෙනුවෙන් බහුපාර්ශ්වික සහයෝගීතාවය ශක්තිමත් වනු ඇතැයි බලාපොරොත්තු වන බවත් ජනපතිවරයා මෙහිදී පවසා ඇත.

තවද, ගෝලීය දකුණේ වැදගත් නායකයෙකු වන චීනය, ජාත්‍යන්තර කටයුතුවල දී සංවර්ධනාත්මක කාර්යභාරයක් ඉටු කරන බවත්, චීනය සමඟ විවිධ බහුපාර්ශ්වික අවස්ථාවලදී සම්බන්ධීකරණ හා අන්‍යෝන්‍ය සහාය ශක්තිමත් කොට පොදු අයිතිවාසිකම් ආරක්ෂා කිරීමට ශ්‍රී ලංකාව බලාපොරොත්තු වන බවත් දිසානායක මහතා වැඩිදුරටත් පවසා ඇත. 

ලංකාවේ සංවර්ධනයට නව අවස්ථා – ජනපති ෂී

මෙහිදී අදහස් දක්වමින් චීන ජනපති ෂී ජින්පිං මහතා පෙන්වා දී ඇත්තේ මීට 68 වසරකට පෙර චීනය සහ ශ්‍රී ලංකාව අතර රාජ්‍ය තාන්ත්‍රික සබඳතා ඇරඹුනු දින සිට දෙරටේ සබඳතා සැම විටම විධිමත් හා ස්ථාවර වර්ධනයක පවතින බවත්, මිත්‍රශීලී සහජීවනය සහ අන්‍යෝන්‍ය වශයෙන් වාසිදායක සහයෝගීතාවය සඳහා ලොකු කුඩා රටවලට ආදර්ශයක් සපයා ඇති බවත්ය.

එසේම, චීනය සහ ශ්‍රී ලංකාව අතර “එක් තීරයක් එක් මාවතක්” වැඩපිළිවෙල උසස් තත්ත්වයෙන් ඒකාබද්ධව ගොඩනැගීම වඩාත් ඵලදායී ප්‍රතිඵල ලබා ගෙන ඇති අතර එය දෙරටේ ජනතාවට ප්‍රායෝගිකව සුභ සෙත සලසා තිබෙන බව හෙතෙම කියා සිටියේය.

කලාපීය සාමය හා ස්ථාවරත්වය සඳහා ශ්‍රී ලංකාව සමඟ එක්ව පොදුවේ කටයුතු කිරීමට චීනය සූදානමින් සිටින බව ද චීන ජනාධිපතිවරයා වැඩිදුරටත් පැවසීය.

රාජ්‍ය නායක දෙපළ අතර නිල හමුවෙන් පසු දෙරට අතර ආර්ථික, සමාජයිය හා කර්මාන්ත යන ක්ෂේත්‍රවලට අදාළ අවබෝධතා ගිවිසුම් කිහිපයකට අත්සන් තැබීම ද සිදු කෙරිණි.

(මූලාශ්‍රය : CCTV +)

සබැඳි  පුවත් :

ඉන්දීය මහකොමසාරිස් සන්තෝෂ් ජා මහතා හා පොහොට්ටු පක්ෂයේ ජාතික සංවිධායක හා පාර්ලිමෙන්තු මන්ත්‍රී නාමල් රාජපක්ෂ මහතා අතර හමුවක් අද (15) මහකොමසාරිස්වරයාගේ නිල නිවසේදී සිදුව තිබේ.

ක්‍රියාත්මක වෙමින් පවතින සංවර්ධන ව්‍යාපෘති, ආයෝජන, ශ්‍රී ලංකාවේ ආර්ථික පුනර්ජීවනය සහ අන්‍යෝන්‍ය වශයෙන් උනන්දුවක් දක්වන අනෙකුත් ක්ෂේත්‍ර වැනි බහුවිධ ගැටළු පිළිබඳව මෙහිදී අදහස් හුවමාරුකරගත් බව ඉන්දීය මහ කොමසාරිස් කාර්යාල නිල “X” ගිනුමේ සටහන්ව තිබේ.

කොළඹ ජනමාධ්‍යවේදීන්ගේ සංගමයේ නියෝජිතයන් සහ අමාත්‍ය නලින්ද ජයතිස්ස මහතා අතර සාකච්ඡාවක් සෞඛ්‍ය අමාත්‍යාංශයේදී පැවැත්විණි.

එහිදී අමාත්‍ය නලින්ද ජයතිස්ස මහතා පවසා ඇත්තේ, මෙරට සියලු ප්‍රාදේශීය මාධ්‍යවේදීන් සඳහා සිය වෘත්තීයට අදාළ අංග සම්පූර්ණ නේවාසික හා කෙටි කාලීන පුහුණු වැඩසටහන් මාලාවක් සංවිධාන කිරීමට පියවර ගන්නා බවයි.

සියලු ප්‍රාදේශීය මාධ්‍යවේදීන් වෙනුවෙන් ඉල්ලීම් 11 ක් ඇතුළත් සංදේශයක් ඔවුන් අමාත්‍යවරයා වෙත භාර දී තිබෙන අතර, ඉන් කරුණු කිහිපයකටම එම අවස්ථාවේම විසදුම් ලබාදීමට අමාත්‍යවරයා විසින් පියවර ගන්නා ලදී.

නිලධාරීන්ට උපදෙස් ලබා දී තිබෙන්නේ, ප්‍රාදේශිය ජනමාධ්‍යවේදීන් වෙනුවෙන් රක්ෂණ යෝජනා ක්‍රමයක් යළි ඇති කිරීමට අමාත්‍යවරයාගේ අවධානය යොමු වූ අතර ඒ සඳහා විදිමත් සැලැස්මක් සකස් කරන ලෙස ද නිලධාරීන් වෙත උපදෙස් ලබාදී ඇත.

රජයේ ප්‍රවෘත්ති දෙපාර්තමේන්තුවේ හැදුනුම්පත ක්‍රියාකාරී මාධ්‍යවේදීන්ට පමණක් නිකුත් කිරීමට මෙහිදී එකඟතාව පළ වී තිබෙන අතර, සියලු මාධ්‍යවේදීන් සඳහා වෘත්තීය උපකරණ මිලදී ගැනීම සඳහා අඩු පොලී ණය මුදලක් ලබාදීමේ හැකියාව සොයා බැලීම ඇතුළු ප්‍රාදේශීය මාධ්‍යවේදීන්‍ගේ ඉල්ලීම් රැසකට අමාත්‍යවරයා එකගතාව පළ කළ වාර්තා වේ.

අමාත්‍ය නලින්ද ජයතිස්ස මහතා අවධාරණය කළේ, ප්‍රාදේශීය මාධ්‍යවේදීන්ගේ ගැටලුවලට දිය හැකි සියලු විසදුම් ලබාදීමට කැප වන බවයි. කොළඹ ජනමාධ්‍යවේදීන්ගේ සංගමයේ සභාපති නිශාන්ත ප්‍රියදර්ශන ඇතුළු එම සංගමයේ නියෝජිත කණ්ඩායමක් සහ අමාත්‍යාංශ නිලධාරීන් ඇතුළු පිරිසක් මෙම සාකච්ඡාවට එක්විය.