Connect with us

පුවත්

අයියා වෙනුවෙන් මල්ලි ඇමති දැමූ කැබිනට් පත්‍රිකාවට ජනපතිගෙන් බාල්දියක්

Published

on

තමන්ට ලබා දුන් ඉඩම් කොටස් ඒකාබද්ධ කරමින් නිවාස සංකීර්ණයක් ඉදිකර විකිණීමට අවසර දෙන ලෙසට ක්‍රිකට් ලෝක කුසලානය දිනූ කණ්ඩායමේ නායක අර්ජුන රණතුංග ඇතුළු ක්‍රීඩකයන් අට දෙනකු කර තිබෙන ඉල්ලීම සම්බන්ධයෙන් තීරණයක් ගත යුත්තේ සියලු ක්ෂේත්‍රයන් පිළිබඳ දැඩි සැලකිල්ලකින් යුතුව බව ජනාධිපති රනිල් වික්‍රමසිංහ මහතා සිය නිරීක්ෂණ ඉදිරිපත් කරමින් කැබිනට් මණ්ඩලයට දැනුම් දී තිබේ.

නේවාසික ව්‍යාපෘතියක් වෙනුවෙන් වෙන් කළ ඉඩම් කොටස් වාණිජ අරමුණක් වෙනුවෙන් යෙදවීම වැරදි පූර්වාදර්ශයක් විය හැකි බවත් ජනාධිපතිවරයා සිය නිරීක්ෂණවල සඳහන් කර ඇත.

ජනාධිපතිවරයා මෙම දැනුම් දීම කර ඇත්තේ නාගරික සංවර්ධන හා නිවාස අමාත්‍යාංශය වෙනුවෙන් විශයභාර කැබිනට් අමාත්‍ය ප්‍රසන්න රණතුංග මහතා විසින් කැබිනට් මණ්ඩලයට ඉදිරිපත් කර තිබූ කැබිනට් පත්‍රිකාවක් සම්බන්ධයෙනි.

ප්‍රසන්න රණතුංග මහතා, 1996 ජයග්‍රාහී ලෝක කුසලාන පිලේ නායක අර්ජුන රණතුංග මහතාගේ සහෝදරයෙකි.

කැබිනට් සන්දේශය ඉදිරිපත් කර ඇත්තේ එම ක්‍රීඩකයන් අට දෙනාට බත්තරමුල්ල, ඩෙන්සිල් කොබ්බෑකඩුව මාවතෙන් වෙන වෙනම ලබා දුන් ඉඩම් කොටස් ඒකාබද්ධ කර නිවාස සංකීර්ණයක් ඉදි කිරීමට අනුමැතිය ඉල්ලමිනි.

මෙම ක්‍රීඩකයන් අට දෙනා හෝ ඔවුන්ගේ නියෝජිතයෙක්, නාගරික සංවර්ධන අධිකාරිය සහ නිවාස සංකීර්ණය මිල දී ගන්නා සමාගම අතර අවබෝධතා ගිවිසුමක් අත්සන් කිරීමට ද කැබිනට් අනුමැතිය ඉල්ලා තිබිණි.

මාස හයක් ඇතුළත සියලු අනුමැතීන් ලබා ගැනීමටත් වසර තුනක් ඇතුළත ඉදිකිරීම් අවසන් කිරීමටත් සැලසුම වී තිබේ.

කෙසේ වුවත් තෑගි ඔප්පු මගින් 1996 ලෝක ශූර ක්‍රිකට් ක්‍රීඩකයන්ට එකම භූමි භාගයක ලබාදුන් මෙම ඉඩම් කට්ටි වෙනත් පාර්ශවයක් වෙත පැවරීම හෝ විකිණීම නීතිමය වශයෙන් අවහිර කර තිබේ.

1997 ජනවාරි 22 වැනිදා ඉදිරිපත් වූ කැබිනට් පත්‍රිකාවක් මගින් 1996 ලෝක ශූර ශ්‍රී ලංකා කණ්ඩායමේ ක්‍රීඩකයන් 15 දෙනකුට 99 අවුරුදු බදු ක්‍රමය යටතේ බත්තරමුල්ල නගරයට ආසන්නයේ රොබට් ගුණවර්ධන මාවතේ පිහිටි හිස් භූමි භාගයකින් එක් අයෙකුට පර්චස් 20 බැගින් ලබාදීමට එවකට කැබිනට් මණ්ඩලයේ අනුමැතිය හිමිව ඇත.

ඒ එවකට ක්‍රීඩා ඇමැතිධුරය දැරූ එස්.බී. දිසානායක මහතා ඉදිරිපත් කළ කැබිනට් පත්‍රිකාවක් මගිනි. 

එහිදී පර්චසයක තක්සේරු වටිනාකම ලෙස තීරණය කර ඇත්තේ රුපියල් දහසකි.

කෙසේවුවද, එසේ ඉඩම් හිමිවූ 7දෙනෙකු මෙම නිවාස ව්‍යාපෘතියට ඉඩම් ලබාදීම ප්‍රතික්ෂේප කර තිබේ.

තමන්ට ලබා දුන් ඉඩම්වල නිවාස සංකීර්ණයක් ඉදි කර විකිණීමට ක්‍රීඩකයන් කර තිබෙන ඉල්ලීම නිසා එම ඉඩම් කොටස් ලබා දීමේ මූලික අරමුණ සම්පූර්ණයෙන්ම වෙනස්ව වාණිජ අරමුණක් වී තිබෙන බවත් ජනාධිපතිවරයා සිය නිරීක්ෂණවල තවදුරටත් සඳහන් කර ඇත.

පුවත්

ග්‍රාමීය සංවර්ධනයට රජයෙන් බිලියන 20 ක්

Published

on

By

ග්‍රාමීය ජනතාවට අවශ්‍ය පහසුකම් සැලසීමට මෙන්ම අඩු ආදායම්ලාභී පවුල්වල ජීවන තත්ත්වයන් නංවාලීමේ ව්‍යාපෘති රැසක් ඉදිරි මාස කිහිපය තුළ ක්‍රියාත්මක කිරීමට රජය සැලසුම් කර ඇත.

කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා පවසන්නේ, එම වැඩ කටයුතු සඳහා රජය විසින් රුපියල් බිලියන 20.6ක මුදලක් වැය කිරීමට පියවර ගන්නා බවට ජනාධිපති රනිල් වික්‍රමසිංහ මහතා අමාත්‍ය මණ්ඩලය දැනුම්වත් කළ බවය.

මේ හේතුවෙන්, හැකි තරම් නව කෘෂිකාර්මික ව්‍යාපෘති සකසන්නැයි අමාත්‍යවරයා විසින්  නිලධාරීන්ට උපදෙස් ලබා දී තිබේ.

එම කෘෂිකාර්මික ව්‍යාපෘති ගම්මානවල ගොවි ජනතාවගේ ආදායම් තත්ත්වයන් ඉහළ නැංවීම, ඔවුන්ගේ යටිතලපහසුකම් සංවර්ධනය සහ නව කෘෂි තාක්ෂණය ඉලක්ක කර ගනිමින් සකසන ලෙසද මෙහිදී මහින්ද අමරවීර අමාත්‍යවරයා උපදෙස් දී ඇති බව සඳහන්ය.

කෘෂිකර්ම හා වැවිලි කර්මාන්ත අමාත්‍යාංශයේදී පැවති සාකච්ඡාවක් අමතමින් අමාත්‍යවරයා මෙම උපදෙස් ලබා දී ඇත.

Continue Reading

පුවත්

“ආර්ථික පරිවර්තන පනත ඉතා භයානකයි”

Published

on

By

ආණ්ඩුව පාර්ලිමේන්තුවට ඉදිරිපත් කර ඇති ආර්ථික පරිවර්තන පනත ඉතා භයානක ප්‍රතිඵල ගෙන දෙන පනතක් යයි පාර්ලිමේන්තු මන්ත්‍රී මහාචාර්ය ජී.එල් පීරිස් මහතා කොළඹ අද (27) පැවති මාධ්‍ය හමුවකදී පැවසීය.

මේ වන විට පවතින්නේ ජනවරමක් රහිත පාර්ලිමේන්තුවක් බැවින් එමගින් මෙවැනි පනතක් සම්මත කර ගැනීම ඉතා භයානක බවද මහාචාර්යවරයා කීය. 

මන්ත්‍රීවරයා වැඩිදුරටත් කියා සිටියේ රජය ලාභ ලබන ආයතන ලහි ලහියේ විකුණා දැමීමට අවශ්‍යය පිඹුරුපත් කඩිනමින් සකස් කරන බව දැනගන්නට ලැබී ඇති බවය

ජනතා ගැටලු විසඳීම සඳහා අභිනව පාර්ලිමේන්තුවක අවශ්‍යතාවය  වර්තමාන සමාජය තුළින් පිළිබිඹු වන බව කී ඒ මහතා තරුණ පරපුර ඇමතීම සියලු පක්ෂ නායකයින්ගේ යුතුකම බවත් අනාගතයේ ජීවනාලිය  ඔවුන් බවඅමතක නොකළ යුතු යයිද සඳහන් කළේය

වත්මන් ආණ්ඩුව  මැතිවරණවලට දක්වන බිය සුළු බව හේතුවෙන් මුදල් නොමැති යැයි පවසා මැතිවරණ කල් දැමීමට අර  අඳිමින් සිටින බව පැවසූ මහාචාර්යවරයා ඒ සඳහා නොයෙකුත් උපක්‍රම යොදමින් සිටින බවද පැවසීය

පළමුව පැවැත්වෙන්නේ පාර්ලිමේන්තු මැතිවරණයද ජනාධිපතිවරණයද යන්න ගැන ජනතාව කිසියම් කුතුහලයකින් පෙළෙන බව පැවසූ මන්ත්‍රීවරයා ආණ්ඩුක්‍රම ව්‍යවස්ථාවට අනුව ජනාධිපතිවරණය අනිවාර්යයෙන්ම පැවැත්විය යුතු බව සඳහන් කළේය

Continue Reading

පුවත්

මුදවාගැනීමේ මෙහෙයුමකට මන්ත්‍රීවරු 3ක් තායිලන්තයට

Published

on

By

විපක්ෂයේ මන්ත්‍රීවරුන් තිදෙනෙක් අද (27) අලුයම තායිලන්තය බලා පිටත්ව ගියහ.

ඒ, මියන්මාරයේ සයිබර් අපරාධ කලාපයේ ත්‍රස්ත ග්‍රහණයේ සිටින ශ්‍රී ලාංකිකයින් සහ රුසියානු – යුක්‍රේන යුද්ධයට මැදිවී රුසියාවේ සිටින ශ්‍රී ලාංකික රණවිරුවන් බේරාගෙන යළි ශ්‍රී ලංකාව වෙත රැගෙන ඒමේ රාජ්‍යතාන්ත්‍රික මෙහෙයුම සඳහා එම රටවල රාජ්‍යතාන්ත්‍රික නිලධාරීන් සහ තෙවන පාර්ශ්වයන් සමග සාකච්ඡා කර වැඩපිළිවෙළක් සකස් කිරීම සඳහාය.

මෙම විපක්ෂ මන්ත්‍රී කණ්ඩායමට නීතීඥ වසන්ත යාපා බණ්ඩාර, ජේ.සී. අලවතුවල සහ සුජිත් සංජය පෙරේරා යන මන්ත්‍රීවරුන් ඇතුළත් වේ.

ඔවුන් මියන්මාරයේ සහ රුසියාවේ දින 05 බැගින් ගත කරමින් මෙම මෙහෙයුම දියත් කිරීමට නියමිතය.

මන්ත්‍රීවරුන් පිරිස ත්‍රෛනිකායික මහනාහිමිවරුන්ගේ සහ විපක්ෂ නායකවරයාගේ ඉල්ලීම් රැගත් ලිපි, මියන්මාරය සහ රුසියාව බලා පිටත්ව ගොස් තායිලන්තයේ සහ මියන්මාරයේ සංඝනායක හිමිවරුන් සහ රුසියාවේ රාජ්‍යතාන්ත්‍රික නිලධාරීන් හමුවී භාරදීමට ද නියමිත බවට වාර්තා වේ.

පිරිස අද අලුයම 01.10ට පමණ ශ්‍රී ලන්කන් ගුවන් සේවයේ UL – 402 දරන ගුවන්යානයෙන් තායිලන්තයේ බැංකොක් නුවර බලා පිටත්ව ගොස් ඇත.

Continue Reading
Advertisement

Trending

Copyright © 2023 Sri Lanka Mirror. All Rights Reserved