රුපියල් කෝටි ගණනක් වටිනා වාහන දෙකක් නීති විරෝධී ආකාරයෙන් තබා ගෙන සිටි බව පැවසෙන මහනුවර ප්‍රදේශයේ වාහන අලෙවි ආයතනයක හිමිකරුවකුට රටින් පිටවීම තහනම් කරමින් මහනුවර මහේස්ත්‍රාත් වාසනා නවරත්න මහත්මිය ඊයේ (12) තහනම් නියෝගයක් නිකුත් කලේය.

නීති විරෝධී වාහන සම්බන්ධයෙන් ප්‍රකාශ ගැනීමට පොලිසියට පැමිණෙන ලෙස අවස්ථා කිහිපයකදී සැකකරුට දැනුම් දුන්නත් ඔහු පොලිසිය මඟහරින බවත් ඔහු විදේශ ගතවීමට හැකියාවක් ඇති බව පවසමින් මහනුවර කොට්ඨාස අපරාධ විමර්ශන ඒකකය කළ ඉල්ලීමක් පිළිගත් මහෙස්ත්‍රාත්වරිය අදාළ තහනම් නියෝගයක් නිකුත් කර තිබුණි.

විදේශ ගමන් වළකාලමින් මෙලෙස තහනම් නියෝගයක් නිකුත් කර ඇත්තේ මහනුවර ප්‍රදේශයේ වාහන අලෙවි ආයතනයක හිමිකරුවකු බව පැවසෙන දොන් ඉසුරු ප්‍රදීප් සද්ධාතිස්ස සේරම් නමැත්තකුටය.

මහනුවර කොට්ඨාශ අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂකවරයා සිද්ධියට අදාළ විමර්ශන අධිකරණයට වාර්තා කරමින් පවසා සිටියේ මහනුවර අනිවත්ත වටරවුම් පාරේ නිවසක ගරාජයක් තුළ සැකකටයුතු වාහන දෙකක් ගාල් කර ඇති බවට ලැබුණු තොරතුරකට අනුව කළ විමර්ශනයේදී පසුගිය ඔක්තෝබර් 20 වැනිදා කළ වැටලීමකදී නිවසේ ගරාජයේ සැක කටයුතු සඟවා තිබියදී බී.එම්.ඩබ්ලිව්. රේසිං වර්ගයේ නවීන මෝටර් රථයක් සහ මිට්සුබිෂි වර්ගයේ ජීප් රථයක් සොයා ගත් බවය.

අදාළ මෝටර් රථ රජයේ රස පරීක්ෂකවරයාට ඉදිරිපත් කිරීමෙන් පසු බී.එම්.ඩබ්ලිව්. වර්ගයේ මෝටර් රථය මෙරට එකලස් කරන ලද වාහනයක් බවටද මිට්සුබිෂි වර්ගයේ ජීප් රථයේ චැසි අංකය සූරා දමා ඇති බවටද රජයේ රස පරීක්ෂකවරයා වාර්තා කොට ඇතැයි දැනුම් දුන් ප්‍රධාන පොලිස් පරීක්ෂකවරයා අදාළ ජීප් රථය රජයට අයත් හෝ සොරකම් කළ එකක් බවට පොලිසිය සැකයක් මතුව ඇතැයිද දැනුම් දුන්නේය.

එම වාහන සම්බන්ධයෙන් ප්‍රකාශ ගැනීමට පොලිසියට පැමිණෙන ලෙස අවස්ථා ගණනාවකදී අදාළ සැකකරුට දැනුම් දුන්නද ඔහු පොලිසියට නොපැමිණ පොලිසිය මඟහැරීමට පටන්ගත් බවත් ඒ හේතුවෙන් ඔහු අත්අඩංගුවට ගැනීමට අවස්ථා ගණනාවකදී පොලිස් නිලධාරීන් ඔහුගේ නිවසට ගියද ඔහු නිවසේ නොමැති බව නිවැසියන් ප්‍රකාශ කළ බව දැනුම් දුන් ප්‍රධාන පොලිස් පරීක්ෂකවරයා සැකකරු විදේශ ගතවීමට හැකියාවක් ඇති හෙයින් සැකකරුට විදේශගත වීම වළකාලන නියෝගයක් නිකුත් කරන්නැයි ඉල්ලා සිටියේය.